Zaburu 91
91
I nuncana Kajaganina Kawasana Opu
91:1-16
1Mia modhadhina i nuncana kajaganina Aulataʼala Momalanga,
bheamboore i nuncana peulusana Kawasana Opu Mokokuasa,
2bheapogau i KAWASANA OPU,
"Ingkoomo o tampana peulusaku tee o bentena potaangiaku; Aulataʼalaku, iparacaeaku."
3Incia bhemorambasakako minaaka i katapu,
tee minaaka i panyaki imateaka.
4Incia bheasalibumbungiakako tee panina,
tee ingkoo bheuʼamani i nuncana peulusana.
Incia atoparacaea tee bheamembali katangkesi tee bentemu.
5Ingkoo inda bheumaeka tee balaa moumbana i wakutuu malo,
atawa o kahumbuni inda inamu-namu moumbana i wakutuu eo.
6Ingkoo inda bheumaeaka tee panyaki imateaka moumbana i nuncana kalalanda,
atawa tee kalelei ibinasaaka moumbana i wakutuu pontanga eo.
7Moomini sarewu mia amate i saripimu,
tee sapulu rewu mia amate i weta i kaanamu,
maka ingkoo inda bheucilaka.
8Ingkoo tangkanamo bheutontoa tee matamu karomu,
tee ukamatea tuaapa Aulataʼala bheahukumu mia madhaki.
9Roonamo KAWASANA OPU upamembalia tampana peulusamu,
tee Aulataʼala Momalanga upamembalia mbooresamu,
10siitumo ingkoo inda bheucilaka,
tee balaa bheamaridho minaaka i bhanuamu.
11 #
Mat. 4:6; Luk. 4:10-11. Roonamo Incia bheatumpu manga malaaʼekatina to apobhawa tee ingkoo,
mamudhaakana ajaganiko iapaipo uka o lingkaamu.
12Manga malaaʼekati sumai bheaangkako tee rua mbalia limana
mamudhaakana o aemu inda atosunu i bhatu.
13 #
Luk. 10:19. Singa tee ulo bheulempagia,
singa mangura tee ulo mokobisa bheulanda-landakia.
14Firimanina Kawasana Opu, "Roonamo mia momaasiakaaku, bhekupasalaamatia;
tee Iaku bhekujagani mia momatauna saroku.
15Wakutuuna incia agoraakaaku, siitumo Iaku bhekulawania;
Iaku bhekupobhawa tee incia i nuncana kaseke,
tee bhekupasalaamatia tee kumuliangia.
16Tee umuru marambe bhekupatumpua incana,
tee bhekususuakea ande Iaku bhemopasalaamatia."
Currently Selected:
Zaburu 91: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
