Mateyo 28

Okufûka kwa Yezu

(Mrk 16, 1-8; Luk 24, 1-10)

1Erhi olwa-Sabato lugera, oku mucêracêra gw’olusiku lurhanzi lw’omugobe, Mariya Magadalena n’owundi Mariya banaciyisha mpu barhangule ecûsho. 2Obwo igulu lyanacigeramwo omusisi munji, Malahika wa Nyakasane anaciyandagala arheng’emalunga, anaciyisha, ahirimya lirya ibuye analibwârhalakwo. 3Erhi ashushire omulazo, n’enyambalo yâge eri myêru nka lubula. 4Abalanzi erhi bamubona, bageramwo omusisi erhi bwôba burhuma, banabà nka mirhumba. 5Malahika abwîra balya bakazi, erhi: «Mwêhe murhayôbohaga; mmanyire oku mwalonza Yezu wabambagwa oku musalaba. 6“Arhaciri hano, bulya afûsire nka kulya aderhaga”. “Yishi mulole aha bâli bamuhizire”. 7“Munagende duba, mubwîre abaganda bâge, erhi”: “Anafûsire omu bafù, anammushokolîr’e Galileya; yo mwamubonera. Mbîre mmubwîzire”». 8Banacirhenga bimbirimbiri ebwa cûsho n’omurhima gubangalîre banasîmire bwenêne; kwo kulibirh’ibwîra abaganda bâge.

Yezu abonekera abakazi batagatîfu

9Yezu anacibashigâna omu njira, ababwîra, erhi: «Asingi». Nabo bamujaho, bamugwârha amagulu, baharâmya. 10Yezu anacibabwîra, erhi: «Murhayôbohaga, mugend’ibwîra balumuna#28, 10 Balumuna ba Yezu, zo Ntumwa zâge na ngasi boshi bashimba enyigîrizo zâge. bâni baj’e Galileya, yo bambonera».

Obulyâlya bw’abakulu b’Abayahudi

11Erhi babà bamagenda, balanzi baguma bajà omu cishagala, bashambalira abajinji b’abadâhwa ebyabîre byoshi. 12Nabo bashûbûzanya n’abagula, n’erhi babà bamaj’ihano, bahà abasirika ebirugu bîrhankaganjwa. 13Banababwîra, mpu: «Muderhe oku abaganda bâge bayishire budufu, bamuzimba ene muli îrò. 14N’omurhegesi akayish’imanya, rhwêne rhwamubwîra, arhammujire kurhi». 15Nabo abasirika bayanka birya birugu, banajira oku babwîragwa; n’obwo bunywesi bwanacilumizibwa omu Buyahudi boshi kuhika buno.

Yezu abonekera Entumwa e Galileya anazirhuma omu igulu lyoshi

16Balya baganda ikumi na muguma bôhe baj’e Galileya, oku ntondo Yezu abalaganyagya. 17Erhi bamubona, bamuharâmya; ci baguma barhindira. 18Yezu anacibashegeraho, ababwîra, erhi: «Obuhashe bwoshi bw’omu mpingu n’obw’igulu nabuhîrwe. 19Gendagi, muyigîrize abantu b’amashanja goshi, mubabatize oku izîno ly’Îshe n’Omugala na Mûka Mutagatîfu. 20Mubayigîrize okushimba ngasi hyoshi nammurhegesire. Nâni ndi haguma ninyu ensiku zoshi kuhika aha kuyûrha kw’igulu».

Currently Selected:

Mateyo 28: MKB

Highlight

Copy

Compare