Mateyo 27

Yezu ahêkwa emwa Bilato

(Mrk 15, 1; Luk 22, 66; 23, 1)

1Erhi buca, abajinji boshi n’abagula b’olubaga bajîra Yezu ihano, mpu bamuyîrhe, 2N’erhi babà bamâmushwêka, bamuhêkera Bilato, ye murhegesi.

Yûda acîmanika

3Obwo erhi Yûda wamulenganyagya abona atwîrwa okufà, omurhima gwamulya, agalulira abajinji n’abagula galya magerha mafundo asharhu, erhi: 4«Najizire kubî ene mpâna omukò mwêru-kwêru». Nabo banacimushuza, mpu: «Kurhi kwarhujira? Wêne wamanya!» 5Akwêba galya magerha omu ka-Nyamuzinda, agenda, acîmanika, 6Erhi abajinji bayanka galya magerha, banaciderha, mpu: «Kurhemêrîrwi okugahira omu mbîko, bulya gali ngulo ya mukò». 7Erhi bacibà bamaj’ihano, bagagula ishwa ly’omubumbi, mpu bakâbishamwo ebigolo. 8Co carhumire eryo ishwa liyirikwa, kuhik’ene, Ishwa lya Mukò, 9Ntyo kwanacibà kulya kwalêbagwa n’omulêbi Yeremiya, erhi: Banaciyanka galya magerha mafundo asharhu, yo ngulo batwîraga oyu abâna b’Israheli bâgerekaga, 10Banacigagula ishwa ly’omubumbi, nk’oku Nyakasane antegekaga.

Yezu embere za Bilato

(Mrk 15, 2-15; Luk 23, 2-5.18-25; Ywn 18, 28-40; 19, 4-16)

11Yezu anacihêkwa embere z’omurhegesi, n’omurhegesi amudôsa, erhi: «Ka we mwâmi w’Abayahudi?» Yezu amushuza, erhi: «Wakudesire». 12Ci erhi abajinji n’abagula bakâmulega, arhashuzagya cici. 13Bilato anacimubwîra, erhi: «Ka orhumvirhi ebyo byoshi badwîrhe bakuderhera?» 14Arhashuzagya oku kanwa ciru n’akaguma, kuhika nyamurhegesi asômerwa bwenêne. 15Ngasi lusiku lukulu, bwàli bwôrhere bw’omurhegesi okubalîkira mushwêkwa muguma, oyu banacîshozire. 16Hàli mushwêkwa muguma wali wajire irenge, ye wali Yezu oderhwa Baraba. 17Obwo erhi olubaga lucibà lulundumîne haguma, Bilato ababwîra, erhi: «Ndi mwalonza mmulikire, ka Baraba erhi Yezu, oderhwa Kristu?» 18Erhi anamanyire obwo oku bwâgalwa bamuhâniraga. 19Erhi acibà akola abwârhîre ekagombe, mukâge arhuma emunda ali, mpu bamubwîre, erhi: «Omanye orhacîhiraga omu lubanja lw’oyo mushinganyanya, bulya ene budufu nababîre bwenêne omu bilôrho erhi ye orhuma». 20Ci abajinji b’abadâhwa n’abagula bashumika olubaga mpu bahûne Baraba banayîse Yezu. 21Omurhegesi ashub’ibadôsa, erhi: «Ndi mulonzize ndîke muli abà bombi?» Banacishuza, mpu: «Baraba». 22Bilato anacibabwîra, erhi: «Kurhi najiraga Yezu oderhwa Kristu?» Boshi bashuza, mpu: «Abambwe oku musalaba». 23Ashub’idôsa olubaga, erhi: «Kubî kuci ajizire?» Banaciyâma kulusha, mpu: «Abambwe oku musalaba!» 24Erhi Bilato abona oku ntà luderho lwaciyumvibwa n’oku ehidugundu hyayisha hyayûshûka, kwo kuyanka amîshi, acîkalaba enfune embêre z’olubaga, anaderha, erhi: «Ndi mwêru-kwêru oku mukò g’oyu muntu; oku bwinyu!» 25Olubaga lwoshi lwashuza, lwaderha, mpu: «Omukò gwâge kuli rhwe n’oku bâna bîrhu!» 26Okubundi anacibalikira Baraba, n’erhi abà amashûrha Yezu emikoba, abahâye mpu abambwe oku musalaba.

Ecimanè c’emishûgi

(Mrk 15, 16-20; Ywn 19, 1-3)

27Abasirika b’omurhegesi banaciyanka Yezu, bamujâna omu lurhambà, bamuhirakwo olugamba lw’abasirika lwoshi. 28Banacimuhogola emyambalo yâge, bamuyambika ecishûli cidukula. 29N’erhi babà bamaluka ecimanè c’emishûgi, bamuhiraco omu irhwe, bamufumbasa olusheke omu kuboko kulyo. Bafukama embere zâge, banamushekera n’okuderha, mpu: «Asinge, mwâmi w’Abayahudi»! 30Banakamukâyirakwo, n’erhi barhôla lulya lusheke, bakamushûrhalo oku irhwe. 31Okuhandi erhi bayûs’imucinaguza, banacimuhogola cilya cishûli, bamuyambika emyambalo yâge, bamuhulukana, baj’imubamba oku musalaba.

Yezu abambwa oku musalaba

(Mrk 15, 21-27; Luk 23, 26-34.38)

32Erhi bahika omu njira, barhimâna omuntu w’e Kirena, ye Simoni; bamugwârha mpu arhwâze Yezu okubarhula omusalaba, 33Erhi bahika ahantu haderhwa Gologota#27, 33 Hantu h’empanga, erhi Kalvariyo., kwo kuderha mpu hantu h’empanga, 34banacimuhà amavu galimwo endulwè mpu anywe; ci erhi ayûs’ilabula, arhacilonzagya okuganywa. 35Erhi babà bamamubamba oku musalaba, bagabâna emyambalo yâge, bayiyesha cigole#27, 35 Mpu lyo akanwa k’omulêbi kayunjula, erhi: Bagabîne emyambalo yâni n’ecishûli câni baciyesha cigole (Lul 22, 19; Ywn 19, 24). . 36Banaciburhamala mpu bamulange. 37Banaciyandika aha nyanya ly’irhwe lyâge igwârhiro ly’olufù lwâge, mpu: «Oyu ye Yezu, Mwâmi w’Abayahudi». 38Banacibamba haguma naye bishumûsi bibiri, ciguma ekulyo, ecindi ekumosho kwâge.

Yezu ashekerwa anajacirwa oku musalaba

(Mrk 15, 29-32; Luk 23, 35-37)

39Abakâg’igera bakamujacira banadunda irhwe, 40mpu: «We shâba aka-Nyamuzinda, onashub’ikayunjuza omu nsiku isharhu, cirîkûzagye wênene akaba oli Mwene-Nnâmahanga, onahonekwo ogu musalaba!» 41Nabo abajinji b’abadâhwa bakâg’imushekera, banakâg’iderha haguma n’abashamuka b’ihano n’abagula, mpu: 42«Acizize abandi arhankanahash’icîciza yênene! Akabà ali Mwâmi w’Israheli, lêro amanukage kuli ogu musalaba, nîrhu rhumuyêmêre! 43“Mpu alangâlira Nyamuzinda”: “lêro Nyamuzinda amulîkûzagye akabà amuzigira! Akazâg’iderha, erhi”: “Ndi Mwene-Nnâmahanga!”» 44Ciru na birya bishumûsi byàli bibambirwe oku musalaba haguma naye byakâg’imujacira.

Yezu afà oku musalaba

(Mrk 15, 33-41; Luk 23, 44-49; Ywn 19, 29)

45Kurhenga izûba liyimanga#27, 45 kurhenga izûba liyimanga: Kurhenga nsâ ndarhu kuhika nsâ mwenda., omwizîzi gwabwîka ecihugo coshi kuhika amafuluko. 46Erhi kubà mafuluko, Yezu anaciyâma n’izù linene, erhi: «Eli, Eli, lama sabaktani?» Kwo kuderha: «Nyamuzinda wâni, Nyamuzinda wâni, carhumire ondeka?» 47Baguma muli balya bàhali erhi bayumva, banaciderha, mpu: «Amayakûza Eliya». 48Ho na halya, muguma muli bo alibirha, ayanka ecihôrholo, acivumvuliza, omu nkalishi, acîshwêkera oku lusheke, amuhà mpu anywe. 49Ci abandi bamubwîra, mpu: «Muleke rhulole erhi Eliya ayish’imuciza!» 50Obwo Yezu ashub’iyâma n’izù linene, arhengamwo omûka. 51Okubundi omwenda gw’olusîka gwàli mumanike aha karhî k’aka-Nyamuzinda mpu gusîke ahatagatîfu h’ebitagatîfu gwalalanguka mpande ibiri kurheng’enyanya kuhik’ahanshi; igulu lyanacigeramwo omusisi, amabuye gàhahanyuka. 52Enshinda zàfunuka, mibiri minji y’abatagatîfu bâli bafîre yafûka. 53N’erhi Yezu ayûs’ifûka, barhenga omu nshinda, bajà omu Cishagala Citagatîfu, banji bababona. 54Omukulu w’abasirika n’abandi bantu bakâg’ilanga Yezu haguma naye erhi babona igulu ligeramwo omusisi n’ebindi byabîre byoshi, bayôboha bwenêne, banaderha, mpu: «Nêci, kwo binali oyu muntu anali Mugala wa Nyamuzinda!» 55Hàli abakazi bakâg’ilâbira kuli, balya bâli bashimbire Yezu kurheng’e Galileya mpu bajè bamukolera. 56Muli bo mwâli Mariya Magadalena, na Mariya nnina wa Yakôbo na Yozefu, na nnina wa bene Zebedeyo.

Yezu abishwa

(Mrk 15, 42-47; Luk 23, 50-55; Ywn 19, 38-42)

57Erhi kucibà bijingo, muntu muhirhi muguma w’e Arimatiya anaciyisha, izîno lyâge ye Yozefu, naye àli mushimbûlizi wa Yezu. 58Anacijà emwa Bilato, amuhûna omubiri gwa Yezu. Bilato arhegeka obwo mpu bamuhêgo. 59Okuhandi Yozefu anaciyanka gulya mubiri, aguboha omu mwenda mwêru, 60agubisha omu nshinda mpyâhya àli acîhumbire omu lwâla; n’erhi abà amahirika ibuye linene omu lusò lw’enshinda, agenda. 61Obwo erhi Mariya Magadalena n’owundi Mariya bahali, baburhamîre embere z’ecûsho.

Abalanzi b’ecûsho

62Erhi kuca, lwo lusiku lukulikira amarheganyo#27, 62 Lwa karhanu, olusiku bakâg’irheganya Sabato., abajinji n’Abafarizeyi bashûbûzanya, baj’emwa Bilato. 63Banacimubwîra, mpu: «Waliha, rhwakengire oku erya ndyâlya yaderhaga, erhi ecizîne, erhi: “Hano kugera nsiku isharhu, nâfûka!” 64“Ci orhegeke ecûsho cilangwe kuhika olwa kasharhu, abaganda bâge barhag’iyish’imuzimba, irhondo babwîre olubaga, mpu”: “Anafûsire omu bafù! Na ntyo obwo bulyâlya buzinda bulushe oburhanzi”». 65Bilato anacibashuza, erhi: «Abalanzi abà, gendi mulange nk’oku mwalonza». 66Banacigenda, ecûsho bacihamika, banahira ibuye kw’ecimanyîso, banahasiga abalanzi.

Currently Selected:

Mateyo 27: MKB

Highlight

Copy

Compare