1 Timote 4
4
Ira Na Tinoni Vaivagigalai Sesekedi
1Ego na Gagala Tabuna sa poja lodakia sa pana totoso bebetodi aipira kaki tinoni sa kode mai balinga loa palenia sa na rarange ko mai tutiria sira na gagala sesekedi beto na vaivagigalai tadira na tomate. 2Na vaivagigalai vei aipira sa qai lame vei tadira na tinoni sesekedi qai vavadogoro mule veiniria na tuvisidi sira qarigu. Ira tinoni ira sa na monanadi sa sa tei taparugu vamatenia tu na patu dagalana. 3Ira na tinoni aipira sa qai vaisogarania na vaialava beto qai vatataburia sa na gagani. Ba na gagani inara sa na Tamasa tu sa vapodakaria ko ira qai rangea isa beto qai gigilai na sosoto sa mai tekuria pana paranga jongana. 4Ura doru vinapodaka tana na Tamasa sa na jongadi ko maike takilu pale goto mai tateku pana paranga jongana, 5ura na paranga tana Tamasa beto na vavara qai vamadiria.
Na nabulu jongana tana Karisito i Jisu
6Kode muna kai nabulu jongamu tana Karisito i Jisu sao vei muna vanonoganiria ao ira na tinoni lotu sira na vaivagigalai aipira beto vei muna meme vatalenigo na vaivagigalaina na oda rarange beto na vaivagigalai jongadi qu korapa tuti vikivokotoria. 7Ira na vivinei ikikeredi beto na gogoborodi beto na kepore veveidi sa mu uku paleniria. Goto mu ngurungausu vaneqinigo tu na pangagana na Tamasa. 8Ura na ngurungausu vaneqina na tini sa sa koleona iapeki poreveina, ba na pangagana tu na Tamasa sa sa poreveveina doru totoso, ura sa kolea na taringungutina na toa kopira beto na toa sa korapa lame. 9Na paranga tarangena sapi ko sa pada ko mina tateku vakatapa. 10Api sa na ginuana taqe pavu talenia beto taqe vaipera vivivania gita: ura taqe korapa totoravusu kukulinia gita sa na Tamasa toana, isa na inaalo tadira doru tinoni ko na inaalo isa sa tabata votu tadira qai rangea isa.
11Mu paranga vaneneqiniria beto mu vaivagigalainiria ao sira na sakasa aipira. 12Muke vamalumuria na tinoni ko mai vakepore veveinigo sa ao na tinoni koregamu, goto ao sa mi kai dodoro tutina tu tadira na tinoni rarange pana mua paranga, na mua uana, na mua vairoqu, na mua rarange beto na mua uana liosona. 13Mu aru tokaria sira na roiti aipira tinganai mana lame kamu ara: na tiro votuna na Kukuti Tabuna, na paranga vaivaneqi beto na vaivagigalai. 14Muke doro pale sa na vaivana sa kole tamu, isa qu tekua tonai qai kokorotainigo beto qai vaoponigo na limadi ira na tinoni mamata. 15Mu rove vakoriria beto mu junoniria na sakasa aipira, ko na ijoko sae tamu mai bati vakaberia ira doru tinoni. 16Mu doro kopunigo mekamu beto na mua vaivagigalai. Muke aru loloaria sira na roiti aipira. Ura vei muna roiti vei isa sao, sa kode muna alo mulenigo mekamu beto ira na tinoni qai nongorigo.
Currently Selected:
1 Timote 4: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
