1 Timote 5
5
Na Uana tana Tinoni Mamata lao tadira Goto Tinoni
1Muke toke sasururia sira na baragoso goto mu paranga vaneqi veiniria na tamamu mekamu sira. Ira na marene koregadi mu veiniria na tasimu marene. 2Ira na qoqoele mu veiniria na tinamu. Ira na rereko koregadi mu veiniria na lulumu pana doru uana liosona.
3Mu pangaganiria sira na qoqoele naboko qai naboko vaivasevi sosoto. 4Goto na naboko qoqoele sa pore tuna babi na ona mabusu, sa ira pira sa mai balau roiti votunia mai pana dia tatamana mekadi sa na soana vatarasaena na Tamasa ko mai beia na pavudi ira ketakoi qai pidoko votu lame vei. Ura na toa vei isa sa vaivaqera pa dodogoro tana Tamasa. 5Na naboko sa vaivasevi sosoto beto sa taloa vamekai sa sa totoravusia sa na Tamasa beto na rane na bongi sake korotonia na vavara beto na tetepa lao tana Tamasa. 6Goto na naboko sa vapugeleni qeqera kasia gusu na ona toa sa sa korapa toaona ba na tei matena tu. 7Ko mu paranga vaneneqiniria sira na sakasa aipira, ko ira na tinoni mi keporeniria na pake. 8Goto na tinoni sake dogoro kopuniria sira na turana mekana vevei ira pa ona tatamana sosoto mekana, poni sa isa sa kilu palenia isa sa na ona rarange beto ko sa ikere jolania na tinoni keporeona rarange sisa. 9Na naboko vevei gu api sa mu kuti vagorea ko mina tatoka: isa gu sa jola vonomongavulu na aorona, sa kame gu na marenena, 10na roiti jongadi sa roitiniria perangana na tagigilana vatale vevei na pausu koburu, na vakamu goto tinoni, na loqana na nenedi ira na tinoni tana Tamasa,#5.10 Na loqadi na nenedi ira na tinoni kamudi sa na tuti tadira pa totoso isa, totonai qai vakamuria sira na tinoni qai kamu pa ruma. na tokaniria ira na tinoni qai gosoro tapata beto na tutidi ira doru jongadi.
11Goto ira na naboko kokoregadi sa muke kuti vatomeria ura totonai sa neqi jolania na Karisito sa na dia nyonyorogua poni sa qai nyorogua vaialava bei. 12Ko qai teku tariniria sa na vaituti ura qai tetea na dia rarange qai maulu momoenia 13Beto ko isa tugu vei qai gigalainia sa na udapelu kole rererege vaikarovai ruruma gu. Ba nake udapelu gu mekana sa qai toania, goto qai vavavotu goboro paranga tugu, qai rara karovoria na dia ginugua na goto tinoni, beto qai pojaria na sakasava sake garo bai pojaria. 14Ko sa vei sa ara qa nyoroguania sa ira na naboko koregadi sa mai vaialavadia gu, mai isongo koburu, beto mai kopunia na dia tatamana, ko mi keporeniria na lolomo mai vakesanigita na paranga ikikeredi ira qai kanagita. 15Ura ira kaki naboko koregadi sa qai tei gabala vapele tutiadia tu si Setani. 16Na rereko rarange sa koledia na tavitina nanabokodi sa mi kopu vataleniria gu ko mike vajujunoa na ekelesia, ko na ekelesia mi boka tokaniria sira na nanaboko vaivasevi sosoto.
17Ira na tinoni mamata qai totoli vatale pana dia vaitoni sa na padadi mai tatabarania karu boko vinalavata, ko sa poreveveina jola sa muna veiniria sira qai pavu talenia na tarae beto na vaivagigalai. 18Ura sa paranga sa na Kukuti Tabuna, pira sau, <<Muke piko ngujupukua sa na okeseni totonai sa korapa tete vovoragaria na kiko,>> #5.18 Vavanau 25.4 (1 Koriniti 9.9). Na ginuana vei api sa vei ko mina boka ganigana kiko tugu vei ura sa roiti ko sa padana tugu mina tekua na tabarana.sau, beto ko <<Na tinoni roiti sa na padana tugu mina tekua na tabarana,>>#5.18 Luke 10.7; Matiu 10.10 sau. 19Na tinajutu sa tajutunia na tinoni mamata sa muke nongoria, goto vei karu babi kue tu bai dogoroni matadi bai pogoso lamenia sa na tinajutu poni sa mu nongoria ko mu pitua. 20Ira na tinoni mamata qai toania na toa selana sa mu uduku votuniria pa moedi doru tinoni, ko ira doru tinoni ba mai matagutu. 21Pa moena na Tamasa na Karisito i Jisu beto ira na mateana taviledi qa poja vaneneqinigo ara sao ko mu kopu vatataleniria sira na sakasa aipira. Tonai qu oqoro doro vilotia na sakasa poni muke vatoqo moea na mua vivile beto muke totoka kale. 22Muke oqani bebenyo vaoponiria na limamu ko mu vamadiria pana roitina sira na tinoni beto muke somanania na dia sela na goto tinoni. Mu kopu valioso mulenigo mekamu.
23Kopira muke buku gagale pie gu, goto mu tekua tugu vei iapeki vaini ko mi vajonganai na iapamu beto na vioro sa kakamugo.
24Na sela tadira kaki tinoni sa sa kabere vatatale gu ko sa momoeniria lao pa vaipitu, goto ira kaki na dia sela sa sa tuti liliguria. 25Sa vaitoto vei tugu na roiti jongadi tadira na tinoni ba qai kabere vatatale, ko ira qaike kabere vatale ba kode maike boka pae.
Currently Selected:
1 Timote 5: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
