1 Timote 3
3
Ira na Iviva Mamata pa Ekelesia
1Na paranga tarangena sa api. Na tinoni sa kukulinia na roiti tana tinoni kopu, poni sa na roiti jongana jola sa sa nyoroguania isa. 2Ko sa vei sa na tinoni kopu sa mina tinoni kepore ona pake, mina tinoni kame gu na maqotana, minake tinoni gua goboro, mina boka gaiti vatalea na roquna, mina pangaga na ona uana, mina tinoni vakamu goto tinoni, mina bokaona na vaivagigalai, 3minake tinoni didigere aruna, minake tinoni vavaipera goboro, goto mina tinoni vajongana lao tana goto tinoni, minake tinoni vainonomi, beto minake tinoni bulo poata. 4Na tinoni kopu sa boka toli vatalenia na ona tatamana mekana ko ira na tuna sa qai suvere vakaurai pana doru uana pangagana. 5Na tinoni sake balau tolinia sa nona tatamana mekana, sa ai mina vei mina boka doro kopunia isa sa na ekelesia tana Tamasa? 6Minake tinoni koni gabalana sisa, ura kita mi vapugelenia na roqu mulenia mekana ko mi vukele pana vaituti sa gosoria na bangaradi na tomate ikeredi. 7Beto ko sa poreveveina sa mina kai tinoni tapangagana tadira na tinoni pa peguruna sisa, ko minake tatupe pana vaipoja ikikeredi tadira na tinoni beto minake vukele pana sipata tana bangaradi na tomate ikeredi.
Ira na Tinoni Vaitokai pa Ekelesia
8Ira na tinoni vaitokai tugu vei sa mai tinoni tapangagadi, minake ngoja vaikale na dia paranga, maike tapiunia na bubuku vasoku vaini, maike nyaqo isisongodia pana soana selana. 9Mai aru vamaurunia na vonana liosona sa na gigalai golomona na rarange. 10Ko ira ba mai taviloto vatale mai tugu, ko vei mina kepore na dia pake poni sa qai tavamalumu ko mai tinoni roiti vaitokai.
11Ira na rereko vaitokai tugu vei sa mai tinoni tapangagadi, maike popoja vikere tinoni, maike tinoni gua goborodi, beto mai tarange pana doru dia uana.
12Na marene vaitokai sa mina kame gu na maqotana, mina boka totoli vataleniria na ona koburu beto na ona tatamana. 13Ura ira na tinoni qai vaitokai vatale sa qai teku isongia kai tuturuna jongana beto qai varene vatale pana dia rangena na Karisito i Jisu.
Na Vaivagigalai Sosotona
14Qa rovea sa nake sovaina beto mana lao kamugo sao. Ba qa kuti laoniria ara pana tamu sira na sakasa aipira 15ko vei mina mamavo sa na lao taqu poni ba ao muna tei gigilaimua tu sa na uana sa pada tana toania gita na tinoni pana tatamana tana Tamasa. Na tatamana isa sa na ekelesia tana Tamasa toana, ko na ekelesia isa sa na babara eveva beto na kokovana mauruna sa vamauria na vaivagigalai sosotona. 16Ko kepore kai tinoni mina boka vasekea sa na poreveveina jola na gigalai golomona na pangagana na Tamasa:
Isa sa bola votu pana tini masa,
sa taule votu na tuvisina pana gagala,
sa tabata tadira na mateana.
Sa tatarae tadira na tinoni karovodi,
sa tavasosoto pa kasia gusu,
sa tateku vasae pa neqi.
Currently Selected:
1 Timote 3: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
