1 Timote 2
2
Na Vavanauna na Vavara
1Ego ko sa vei sa, momoe, ara qa paranga vaneqinia ko mu vavara tetepa, vavara vaniria, tetepa tokaniria, beto mu paranga jongana vaniria lao tana Tamasa sira doru tinoni, 2ira doru babangara beto ira qai aruria na totoqona poreveveidi, ko gita ta isongia na toa bubulena beto na momosona pana doru oda uana pangagana na Tamasa beto na uana tuvisina. 3Na toa vavara vevei api sa sa jongana beto sa vaivaqera pana dodogoro tana Tamasa na oda inaalo, 4isa sa nyoroguaniria doru tinoni mai taalo ko mai lame tekua na gigalaina na sosotona. 5Ura kame gu sa na Tamasa, beto kame gu sa isa sa vaikarovainiria ira na tinoni beto na Tamasa, ko na tinoni vaikarovai isa sa na Karisito i Jisu. 6Isa sa vania na ona toa mekana ko na ruvatadi doru tinoni, ko na ule votuna sa gore votu pa ona totosona. 7Ko isa sa qa tavilenia na tinoni tarae beto na tinoni tagarunuqu sara (qa korapa pojai na sosotona sara, qake seseke) beto na tinoni vaivagigalai tadira na tinoni karovodi ko qa vaivagigalainia na rarange sosotona.
Na Uana Tadira na Rereko pana Totoso Vinatarasae
8Ego ko na nyorogua taqu sa ira na iviva marene doru eqa sa mai alakaniria na limadi ko mai vavara pana bulo liosona sake kolea na kokora beto na vavaiququmi. 9Ko qa nyoroguania tugu vei sa ira na iviva rereko ba mai vasaeniria na poko pangaga padadi na uana pangaga beto na tavagigala, maike vinyulu vagogotoria na vurungudi babi na sariniria na qolo babi na papaku babata jonga babi na poko sa sae gigiri na vaidi. 10Goto na roiti jongadi tu sa mai sariniria na dia toa isa vei sa dogoro padadi ira na iviva rereko qai vatarasaea na Tamasa. 11Na rereko sa mi nogoto ko mi tekuona gigalai pana doru uana vakole vakaurai. 12Ara qake vamalumia na rereko ko mina vaivagigalai babi babangarania sa na marene, goto na rereko sa mi nogoto tu. 13Ura i Adama mai tu sa sa taroiti vapodaka beto sa taroiti vapodaka si Ivi. 14Beto nake i Adama sa sa tatoni vapiru momoe, goto na rereko tu sa sa tatoni vapiru ko sa vukele pana sela. 15Ba na rereko sa mina taalo pana vapododi na koburu vei mai turu pana rarange, mai toania na toa vairoqu beto na toa liosona beto ko vei mai toaniria ira pana pangaga sa na toa aipira.
Currently Selected:
1 Timote 2: LGA
Highlight
Copy
Compare
Share
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
