إنجیل مَرقُس 14
14
تَدهین عیسیٰ بي بَیت عَنْیا
1یُومِین چان ضال لْعید الْپِسَخ وَ الْفَطیر. کُبار کاهِنین الْمَعبَد وَ مُعَلِّمین التُّورات چانُوا یِدُورون عَلَیٰ طَریق إلْلي بي حیله یِکُضّون عیسیٰ وَ یِقِتلونه، 2أمَّن چانُوا ایگولون: «مو بي أیَّام الْعید، خاف النَّاس إتْهیض.»
3وَکت إلْلي عیسیٰ بي مَدینة بَیت عَنْیا چان گاعِد عَلَیٰ الْسُفره بي بَیت شَمعون الْجُذامي، إیِّت مَراء بي ماعون مَرمَر إلْلي چان بيه عُطور غالي الثَّمَن، مِن سُنبُل الْخالِص، و کِسْرَت الْماعون، چِبِّت الْعُطُر عَلَیٰ رَأسه. 4أمَّن بَعَض مِن الْحاضِرین حُمگَوا، واحَد چان ایگول لِلْآخَر: «لِیش هَذا الْعُطُر بي هِل شِکِل کون یِتْلَف؟ 5چان ایصیر یِنْباع أکثَر مِن ثِلِث مِیَة دینار وَ یِنْعُطي أفلوسه لِلْفُقَراء.» وَ حِیل لامُوا ذیچ الْمَراء. 6أمَّن عیسیٰ گِلهُم: «خِلّوها بي حالها. لِیش إتْزَعلونها؟ هیَّه عِملَت طَیِّب بي حَگّي. 7کِل وَکِت الْفُقَراء مَعَکُم وَ أي وَکت إلْلي تِردون تِگِدرون إتْساعدونهُم، أمَّن أنا کِل وَکِت ما أکون عِندکُم. 8هَي الْمَراء إشْ ما گِدرَت، عِملَت. هیَّه بي هَذا الْعَمَل، دِهنَت جِسمي گَبل التَّدفین. 9بي الْحَقّ، أگِلکُم، بي کِل الْعالَم، وَین ما الْإنجیل یِنْوعِظ، عَمَل هَي الْمَراء هَم یِنْذُکُر.»
خیانَة یَهُودا
10بَعدِین یَهُودا الْأسخَریوطي إلْلي چان واحَد مِن ذاکول الْأثنَعَش شَخُص، راح عِند کُبار الْکاهِنین خاطِر یِسَلِّم ألهُم عیسیٰ. 11ذاکول وَکت إلْلي سِمعَوا حَچي یَهُودا، فُرحَوا وَ عاهِدُوه یِنْطونه أفلوس. چا هُوَّ چان یِدَوِّر فُرصَه خاطِر یِسَلِّم عیسیٰ.
عَشاء الْأخیر
12بي أوَّل یُوم عید الْفَطیر إلْلي یِذِبحون طُلي الْپِسَخ، تِلامیذ عیسیٰ سِألُوا مِنَّه: «وَین إترید إنروح وَ إنجَهِّز لَک خاطِر تَأکِل عَشاء الْپِسَخ؟» 13هُوَّ وَدَّه أثنَین مِن تِلامیذه وَ گِلهُم: «روحوا لِلْمَدینه؛ أهناک یِلاگیکُم زِلمه إلْلي شایِل إمدانَة ماي. روحوا وَراه. 14وَین ما دَخَل، گولوا لِصاحِب ذاک الْبَیت، ”الْمُعَلِّم ایگول، وَین مُضیفي خاطِر أَکِل عَشاء الْپِسَخ مَعَ تِلامیذي؟“ 15وَ هُوَّ یِراویکُم طابِق فُوگ الْبَیت إلْلي چِبیر وَ مَفروش وَ جاهِز. أهناک جِهزوا ألنا.» 16بَعدِین التِّلامیذ راحُوا لِلْمَدینه، لِگُوا کِل شي مِثِل ما چان گایِل ألهُم وَ جَهِّزُوا الْپِسَخ.
17وَکت إلْلي صار اللَّیل، عیسیٰ مَعَ أثنَعَش تِلامیذه راح أهناک. 18وَکت إلْلي چانُوا گَاعدین عَل سُفره وَ یَأکلون أکِل، عیسیٰ گال: «بِالْحَق، أگِلکُم واحَد مِنکُم إلْلي گاعد یَأکِل مَعَي أکِل، یِسَلِّمني لِلْعَدو.» 19ذاکول حِزنُوا وَ واحَد مِن بَعد الثَّاني سِأَل مِنَّه: «أنا خُو مو ذاک الشَّخُص؟» 20عیسیٰ گال: « إیکون واحَد مِنکُم أنتُم الْأثنَعَش شَخُص، ذاک إلْلي یِغَمِّس مَعَي بي الطَّاسه. 21ابن الْإنسان، مِثِل ما مِکْتوب عَنَّه، ایروح، أمَّن یا وَیل عَلَیٰ ذاک إلْلي یِسَلِّم ابن الْإنسان لِلْعَدو. أحسَن لِه چان إلْلي أبَد ما وُلِد.»
22بَعَدهُم چانُوا مَشْغولین بي الْإکِل إلْلي عیسیٰ کَض الْخُبُز وَ مِن بَعَد ما شِکَر الْإلَه، ثِلَمه وَ أنطه لِلتِّلامیذ وَ گال: «کُضّوا، هَذا جِسمي.» 23بَعدِین کَض الْکَأس وَ مِن بَعَد ما شِکَر الْإلَه، أنْطاه ألهُم وَ الْجَمیع شُرْبَوا مِنَّه. 24وَ گِلهُم: «هَذا دَمّي لِعَهد الْیِدید إلْلي یِنْصَب لِخاطِر چِثیرین. 25بِالْحَق، أگِلکُم إلْلي بَعَد ما أشْرَب مِن مَحصول الْعَنَب لِحَد یُوم إلْلي أشُرْبه جديدًا، بي مَلَکوت الْإلَه.»
26بَعدِین بَعَد ما گَرَوا تَرنیمه، راحُوا صُوب یِبَل زِیتون.
نَبُوَّة أنکار پِطرُس
27عیسیٰ گِلهُم: «کِلکُم تِعِثْرون لِأن مِکتوبه،
«”أنا راح أضْرُب الرّاعي
وَ الْغَنَم تِتْطَشَّر.“
28أمَّن مِن بَعَد قیامي، گَبُلکُم راح أروح لِمَنطَقة الْجَلیل.» 29پِطرُس گِلَّه «حَتَّیٰ لُو الْجَمیع یِعثَر، أنا أبَد ما راح أعْثَر.» 30عیسیٰ گِلَّه: «بِالْحَق، أگِلَک إلْلي الْیُوم، نَعَم هَي اللَّیله، گَبُل لا یْصیح الدّیچ مَرتِین، ثِلِث مَرّات تِنْکُرني!» 31أمَّن پِطرُس بي تَأکید چِثیر گال: «لُو ایصیر لازِم أموت مَعَک، ما راح أنُکرَک.» باجي التِّلامیذ هَم هِیچ گالُوا.
بِستان جِتْسیماني
32بَعدِین راحُوا لِمَکان بي أسِم جِتْسیماني وَ أهناک عیسیٰ گِل لِتِلامیذه: «گِعدوا أهنا، خاطِر أنا أندْعي.» 33بَعدِین أخِذ مَعَه پِطرُس وَ یَعقوب وَ یُوحَنَّا، وَ إتْوَتَّر وَ گِلهُم: 34«نَفسي حَزینه لِحَد الْمُوت. ضُلّوا أهنا وَ سِهْروا.» 35بَعدِین إتْقَدَّم إشْوُیه، طاح عَلَیٰ التَّراب وَ إنْدَعه لُو ایصیر ذیچ السَّاعه تِتعَده مِنَّه. 36هُوَّ هِیچ گال: «أبّا، أبي، کِل شي ألَک مُمکِن. بَعِّد هَذا الْکَأس مِنّي، أمَّن مو بي رادتي بَلْ بي رادتَک.» 37وَکت إلْلي رِجَع، شافهُم نایمین. چا گال لِپِطرُس: «شَمعون، أنتَ نایِم؟ ما چِنِت تِگدَر تِسهَر ساعه؟ 38أسهَروا وَ إنْدِعوا خاطِر لا تْطیحون بي الْأمتِحان. الرّوح مِشتاقه أمَّن الْجِسِم ضَعیف.» 39چا مَرَّه أخرَیٰ راح وَ إنْدَعه نَفس الدُّعاء. 40مِن رِجَع، لِگاهُم بَعَدهُم نایمین، لِأن أعیونهُم چانَن ثِجیلات. ذاکول ما چانُوا یِدرون شي گِلونْلِه. 41بَعدِین عیسیٰ ثالِث مَرَّه إیِّه عِند التِّلامیذ وَ گِلهُم: «بَعَدکُم نایمین وَ تِسْتَراحون؟ بَعَد بِس! وُصلَت ساعَة الْإمقَرَّره. هَسّه ابن الْإنسان یِسَلّمونه بي إید الْمُذنِبین. 42گوموا، خِلْ إنروح. هَسّه إلْلي یِسَلِّمني، یُوصَل مِن الطَّریق.»
أعتقال عیسیٰ
43عیسیٰ بَعده چان یِحچي إلْلي فِرِد مَرَّه یَهُودا، واحَد مِن ذاکول الْأثنَعَش شَخُص، مَعَ جَماعَة مُسَلِّحین بي گِرِز وَ سِیف، إیَّوا مِن صُوب کُبار الْکاهِنین وَ مُعَلِّمین التُّورات وَ الْمَشایِخ. 44مُسِلِّم عیسیٰ چان مُنطي نِیشان لِأشخاص إلْلي چانُوا مَعَه وَ گایِل ألهُم: «هُوَّ ذاک إلْلي أبوسه؛ کُضّوه وَ أخذوه بي حِفاظه شَدیده.» 45وَکت إلْلي وُصَل لِذاک الْمَکان، بي وَکِتها إتْگَرَّب لِعیسیٰ وَ گال: «یا مُعَلِّم!» وَ باسَه. 46بَعدِین ذاکول الْأشخاص طاحُوا عَلَیٰ عیسیٰ وَ مِسکُوه. 47أمَّن واحَد مِن الْحاضِرین سِلَت سِیفه، وَ ضَرَب خادِم کاهِن الْأعظَم وَ گَص إذنه. 48عیسیٰ گِلهُم: «أنا إمسَیلِبچي إلْلي یایِّن تِمِسکوني بي گِرِز وَ سِیف؟ 49کِل یُوم بي حُضورکُم چِنِت أعَلِّم بي الْمَعبَد وَ ما مِسَکتوني. أمَّن کون تِتْحَقَّق کُتُب الْمُقَدَّسه.» 50بَعدِین جَمیع التِّلامیذ عافُوه وَ شِردُوا.
51شاب إلْلي بِس چان لافلِه أُگماش عَلَیٰ جِسمه، مِشه وَراء عیسیٰ. ذاک هَم کَضُّوه، 52أمَّن شي إلْلي چان عَلَیٰ جِسمه عافه وَ عَریان شَرَد.
مُحاکِمه بي حُضور شُوراء الْیَهُود
53أخذُوا عیسیٰ عِند کاهِن الْأعظَم. أهناک جَمیع کُبار الْکاهِنین وَ الْمَشایِخ وَ مُعَلِّمین التُّورات چانُوا مِلْتَمّین. 54پِطرُس هَم مِن بِعید راح وَراء عیسیٰ لِحَد ما وُصَل لِحوش بَیت کاهِن الْأعظَم. چا أهناک، یِم النَّار، گَعَد مَعَ الْحُراس خاطِر یِدَفّي نَفسه. 55کُبار الْکاهِنین وَ جَمیع أهل الشُّوراء چانُوا وَراء شُهود ضِد عیسیٰ خاطِر یِقِتلونه، أمَّن ما لِگُوا شي. 56لِأن چِثیرین شِهْدُوا بي الچِذِّب ضِد عیسیٰ، أمَّن شَهادِتهُم ما چانَت تِشبَه بَعَض. 57بَعدِین چِم شَخُص إتْقَدِّمُوا وَ شِهْدُوا ضِدَّه بيالچِذِّب، گالُوا: 58«إحنَا بي نَفِسنا سِمَعناه إلْلي چان ایگول، ”هَذا الْمَعبَد إلْلي مَبْني بي إید الْبَشَر أخَرْبَه وَ بي ثِلِث تِیَّام راح أبْني مَعبَد آخَر إلْلي ما یکون صَنعَت إید الْبَشَر.“» 59أمَّن شَهادِتهُم هَم ما چانَت تِشبَه بَعَض. 60بَعدِین کاهِن الْأعظَم گام وَ جِدَّام الْجَمیع سِأَل مِن عیسیٰ: «هیچ ما تْجاوُب؟ شِنهي هَي إلْلي ضِدَّک یِشِهدون؟» 61أمَّن عیسیٰ ضَل ساکِت وَ ما جاوَب. مَرَّه أخرَیٰ کاهِن الْأعظَم سِأَل مِنَّه: «هَل أنتَ مَسیح الْمُوعود، ابن الْإلَه الْمُتَبارِک؟» 62عیسیٰ گِلَّه: «أنا هُوَّ، وَ إتْشوفون ابن الْإنسان إلْلي گاعِد عَلَیٰ إید یِمْنَة الْقُوَّه، ایّي مَعَ غِیوم السَّماء.» 63بَعدِین کاهِن الْأعظَم شِگ زیجه وَ گال: «بَعَد شِنهو حاجه لِلشّاهِد؟ 64سِمَعتوا کُفرَه. شِنهو حُکُمکُم؟» ذاکول کِلهُم أنْطوا حُکُم إلْلي جَزائَه مُوت. 65بَعدِین بَعَضهُم ضَلَّوا یِتِفلون عَلِیه؛ ذاکول شِدُّوا أعیونه وَ بي وَکت إلْلي چانُوا یِضُربونه، چانُوا ایگولون:«تِنَبَّأ!» الْحُراس هَم کَضُّوه و ضُربُوه.
أنکار پِطرُس
66وَکت إلْلي پِطرُس بَعدَه چان حَدِر، بي الْحوش، وَحده مِن خدامات کاهِن الْأعظَم هَم إیِّت أهناک 67وَ شافِته إلْلي یِم النَّار یِدَفّي نَفسه. ذیچ الْمَراء بي دِقّه باوَعَت لِه وَ گالِت: «أنتَ هَم چِنِت مَعَ عیسیٰ النَّاصِري.» 68أمَّن پِطرُس نِکَر وَ گال: «ما أدري وَ ما أفتِهِم شِتْگولین!» گال هَي وَ دِش بي مَدخَل الْبَیت. بي هِل وَکِت الدّیچ صِیَّح. 69مَرَّه أخرَیٰ، عِین ذیچ الْخادمه طاحَت عَلِیه وَ گالِت لِأشْخاص إلْلي چانُوا مُوگفین أهناک: «هَذا الْزِلمه واحَد مِن ذاکول.» 70أمَّن پِطرُس بَعَد مَرَّه هَم نِکَر. بَعَد إشْوُیه، أشخاص إلْلي چانُوا مُوگفین أهناک، مَرَّه أخرَیٰ گالُوا لِپِطرُس: «بِدون شَک أنتَ هَم واحَد مِن ذاکول، لِأن أنتَ مِن الْجَلیل.» 71أمَّن پِطرُس گام یِلْعَن وَ حِلَف و گال: «هَذا الْزِلمه إلْلي إتْگولونه، ما أعُرفه!» 72بي لَحظَتها، الدّیچ مَرَّه ثانیه صِیَّح. بَعدِین پِطرُس أتذَکَّر حَچي عیسیٰ إلْلي چان گایِل لِه: «گَبُل لا الدّیچ یِصَیِح مَرتِین، ثِلِث مَرَّات تِنْکُرني». چا گَلبه إنْجَرَح وَ گام یِبچي.
Currently Selected:
إنجیل مَرقُس 14: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
