إنجیل مَرقُس 13
13
نِیشان نَهایَة زَمان الْحاضِر
1وَکت إلْلي عیسیٰ چان یِترِک الْمَعبَد، واحَد مِن تِلامیذه گِلَّه: «یا مُعَلِّم، باوِع! شِنهو مِن صَخَر وَ شِنهو مِن بِنیان عَظیم!» 2أمَّن عیسیٰ گِلَّه: «إتْشوف کِل هَذا بِناء الْعَظیم؟ ما تُبقَیٰ صَخره عَلَیٰ صَخره، بَلْ کِلَّه یِنْهِدِم.»
3وَ وَکت إلْلي عیسیٰ چان گاعِد عَلَیٰ یِبَل زِیتون مُقابیل الْمَعبَد، پِطرُس وَ یَعقوب وَ یُوحَنَّا وَ آندریاس عَلَیٰ أنفِراد سِألُوا مِنَّه: 4«گِل ألْنا یِمتَه یوگعَن هِل وَقایِع وَ شِنهو عَلامَة گُرُب زَمان تَحَقُّقهِن؟» 5عیسیٰ گِلهُم: «کونوا واعیین خاطِر أحَد لا یِزَلِفکُم مِن الطَّریق. 6چِثیرین إیّون بي أسمي وَ ایگولون، ”أنا هُوَّ“ وَ یِزَلفون چِثیرین مِن الطَّریق. 7مِن تِسِمعون عَن الْحُروب وَ أخبار الْحُروب یوصَل لِإذانکُم، لا تِختَرشون. کون یِحِدثَن هِیچ وَقایِع، أمَّن النَّهایه بَعَدهي ما واصله. 8ایگومون قُوم عَلَیٰ قُوم وَ حُکومَه عَلَیٰ حُکومَه أخرَیٰ. تیّي زَلازِل بي أماکِن مِختَلفه وَ ایصیر گَحَط. أمَّن هَذا بِس بِدایَة وُیَع الْمِیِّب إلْلي فاصِلَة الْوُیَع أتقِل وَ أتقِل.
9«وَ أمَّن أنتُم كونوا واعين، لِأن یِسَلْمونکُم لِلْمَحاکِم وَ بي مَحَل عِبادَة الْیَهُود یِضُربونْکُم وَ لِخاطري تُوگفون بي حُضور الْوالین وَ الْمُلوک خاطِر تِشِهدون مُقابیلهُم. 10أوَّل کون الْإنجیل یِنْوعُظ لِکِل الْأقوام. 11چا وَکت إلْلي یِكُضّونْکُم وَ یَأخذونکُم لِلْمَحکَمه، مِن گَبُل لا تْلومون إلْلي شِتْگولون، بَلْ کِل شي إلْلي بي ذاک الْوَکِت یِنْعُطي ألکُم، گولوه؛ لِأن أنتُم مو الْمُتَکَلِّمین، بَلْ روحُ الْقُدُس. 12الْأخو، یِسَلِّم الْأخو وَ الْأب، یِسَلِّم ابنه لِلْمُوت. وَ یِگومون الْأولاد عَلَیٰ والدِینهُم، وَ یِسَبِّبون مُوتهُم. 13النَّاس کِلها تِکرَهکُم لِخاطِر أسمي؛ أمَّن کِلمَن یِضُل وافي لِحَد النَّهایه، یِنجَح.
14«أمَّن مِن شِفتوا ذاک ”مَکروه الْمُخَرِّب“ وَ الکَریه وَ الْنَجِس بي مَکان إلْلي ماکون إیکون، حاطّینه بي مَکان المُقَدَّس، بي ذاک الوَکِت ذاکول إلْلي إیکونون بي مَنطَقة الْیَهودیَّه، خِلْ یِشِردون لِلیِبال؛ لِیِفهَم القارئ. 15وَ کِلمَن إیکون فُوگ الْبَیت، لا یِنزِل وَ لا یِدیش الْبَیت خاطِر یَأخِذ شي؛ 16وَ کِلمَن إیکون بي الْمَزرَعه، لا یِرجَع لِلْبَیت خاطِر یَأخِذ عَبایته. 17یا وَیل عَلَیٰ الْحَوامِل وَ الْأمَّهات إلْلي یِرَضعَن بي ذِکِن الْأیَّام! 18إنْدِعوا هِذِن الْوَقایِع لا یِصیرِن بي الشِّتاء. 19لِأن بي ذِنیچ الْأیَّام إتْصیر مُصیبه إلْلي مِثِلها مِن بِدایَة الْعالَم إلْلي الْإلَه خَلَقها لِهَسّه مو صایره وَ أبَد هَم ما تْصیر. 20وَ لُو الرَّب مو إمگَصِّر ذِنیچ الْأیَّام، چان وَلا بَشَر نَجَح. أمَّن لِخاطِر الْمُنتَخَبین، إلْلي هُوَّ أختارهُم، گَصَّر ذِنیچ الْأیَّام. 21بي ذاک الزَّمان، لُو أحَد یِگِلکُم: ”باوِع، مَسیح أهنا“، لُو ”باوِع، هُوَّ أهناک!“ لا تْأَجنون. 22لِأن مَسیحین کَذَبه وَ أنبیاء کَذَبه ایگومون وَ راح یِعِملون مُعجِزات خاطِر لُو مُمکِن، یِزَلفون الْمُنتَخَبین مِن الطَّریق. 23چا کونوا واعین، لأن گَبُلها، گِلتِلکُم کِل هِذِن.
24«أمَّن بي ذِنیچ الْأیَّام، مِن بَعَد ذیچ الْمُصیبه،
«”الشَّمِس تُظْلَم
وَ الْگُمَر بَعَد ما یِنَوِّر.
25النُّجوم یِطیحَن مِن السَّماء
وَ نَظم وَ ثِبات السَّماء یِهتَزَن.“
26بَعدِین النَّاس یِشوفون ابن الْإنسان إلْلي بي قُوَّه وَ مَجِد عَظیم ایّي بي الْغِیوم. 27هُوَّ راح یِوَدّي الْمَلائِکه خاطِر یِجَمعَن ذاکول إلْلي مِختارهُم، مِن أربَع زَوایا الْعالَم، مِن أَقْصَىٰ مَکان الْأرض لِأَقْصَىٰ مَکان السَّماء.
28«هَسّه، أتْعَلِّموا هَذا الدَّرِس مِن سِدرَة التّین: بي وَکت إلْلي فُروعها یِخَضِّرَن و تِنْطي وَرَگ، تِفتَهمون إلْلي الْگِیض جِریب. 29بي هِلْ شِکِل، کِل ما إتْشوفون ایصیرَن هِذِن الْأشیاء، تِفتَهمون إلْلي یِیِّت ابن الْإنسان جِریبه، بَلْ عَلَیٰ الْباب. 30بَالْحَق، أگِلکُم راح یُبقَیٰ هَذا الْجیل لُمَّن ایصیر کِل هَذا. 31السَّماء وَ الْأرض یِنْمِحَن، أمَّن حَچیي أبَد ما یِنمِحي.
أنتِظار لِرَجعَة الْمَسیح
32«وَلا أحَد یُعرُف ذاک الْیُوم وَ ذیچ السَّاعه غِیر الْأب؛ حَتَّیٰ مَلائِکَة السَّماء وَ الْابِن هَم ما یِعُرفون. 33چا ضُلّوا ساهرین وَ واعین، لِأن ما تِدرون ذاک الزَّمان یِمته یُوصَل. 34مِثِل شَخص إلْلي إمْسافِر وَ بي وَکت الرّوحَه، جَعَل خِدّامه لِشُغل الْبَیت، وَ کَلَّف کِل واحَد شُغُل خاص وَ أمَر النّاطور هَم یِسهَر. 35چا أنتُم هَم ضُلّوا ساهرین، لِأن ما تِدرون صاحِب الْبَیت یِمته ایّي، بی اللَّیل لُو نُص اللَّیل، بي وَکِت صیاح الدّیچ لُو بي الْفَجُر. 36خاف هُوَّ فِرِد مَرَّه ایّي وَ یِشوفکُم نایمین. 37شي إلْلي أگِلکُم، أگوله لِلْجَمیع: ضُلّوا ساهرین!»
Currently Selected:
إنجیل مَرقُس 13: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
