إنجیل مَرقُس 11
11
عیسیٰ کَمَلِک یِدخَل أورشَلیم
1وَکت إلْلي وُصلَوا مَدینَة بِیت فاجي وَ بَیت عَنْیا إلْلي چانَن جِریبات لِأورشَلیم عَلَیٰ یِبَل زِیتون، عیسیٰ وَدَّه أثنَین مِن تِلامیذه 2وَ گِلهُم: «روحوا لِقَریه إلْلي جِدَّامکُم. أوَّل ما دَخَلْتوا، راح تِلگون یَحَش مَربوط إلْلي لِهَسّه أحَد مو راکبه. فوکّوا رِشِمتَه وَ یِبّوه. 3لُو أحَد سِأَل مِنکُم: ”لِیش هِیچ إتْسُوّون؟“ گولوا: ”الرَّب ایریده وَ إبسَع یِرَجعَه أهنا.“» 4ذاکول الْأثنِین راحُوا وَ بَرّا بي الْعَجِد لِگُوا یَحَش إلْلي چان مَربوط جِدَّام فِرِد باب. چا فوکُّوه. 5بي ذاک الْوَکِت، بَعَض أشخاص إلْلي چانُوا مُوگفین أهناک سِألُوا: «لِیش إتْفوکّون رِشِمتَه؟» 6ذاکول الْأثنَین جاوُبُوا مِثِل ما عیسیٰ چان گایِل ألهُم؛ چا خِلُّوهُم یِرْحون. 7بَعدِین یابُوا الْیَحَش عِند عیسیٰ، حَطُّوا عیبیهم عَلِیه، وَ عیسیٰ رَکَب. 8چِثیر مِن النَّاس هَم فِرشُوا عیبیهم عَلَیٰ الطَّریق وَ بَعَض هَم فُروع الْأشجار إلْلي چانُوا گاطعینهِن مِن الْمَزارِع، چانُوا یِفِرشونهِن بي الطَّریق. 9أشخاص إلْلي چانُوا یِمْشون جِدَّامه وَ ذاکول إلْلي چانُوا یِتِبعونه، بي صایِح چانُوا ایگولون:
«هوشیعانا!»
«إمبارَک ذاک إلْلي ایّي بي أسم الرَّب!»
10«إمبارَک مَلَکوت أبونا داوود إلْلي یوصَل!»
«هوشیعانا بي عَرش الْأعلَیٰ!»
11چا عیسیٰ إیِّه لِأورشَلیم وَ راح لِلْمَعبَد. أهناک نَظَر عَلَیٰ کِل شي إلْلي چان حَوالِیه، أمَّن چِن الْوَکِت چان مِتْأخِّر مَعَ ذاکول أثنَعَش شَخُص راح لِمَدینَة بَیت عَنْیا.
عیسیٰ بي الْمَعبَد
12یُوم التَّالي، بي وَکت الطَّلْعَه مِن بَیت عَنْیا، عیسیٰ یاع. 13مِن بِعید شاف سِدرَة تین إلْلي چان بیها وَرَگ؛ چا راح جِدَّام خاطِر ایشوف بیها فاکِهه لُو لا. مِن إتْگَرَّب، ما لِگه شي غِیر وَرَگ، لِأن بَعده ما چان واصِل مُوسِم التّین. 14چا خَاطب الْسِدره گال: «مِنَّا وَ هِیچ، بَعَد ما أحَد یَأکِل مِن فاکِهْتِچ!» التِّلامیذ سِمعَوا هَي.
15وَکت إلْلي وُصلَوا لِمَدینة أورشَلیم، عیسیٰ دَخَل الْمَعبَد وَ ضل یِطرِد أشخاص إلْلي أهناک چانُوا یِبیعون وَ یِشْتِرون. هُوَّ گولَب طاولَة الصَّرافین وَ بَساط بِیاعین الْحَمام 16وَ ما سِمَح لِأحَد یِعْبُر مِن بِین صَحن الْمَعبَد لِحَمل الْأجناس. 17بَعدِین عَلِّمهُم وَ گال: «مو مِکْتوب إلْلي،
«”بِیتي یِتسَمّیٰ بَیت الدُّعاء لِکِل الْأقوام“؟
أمَّن أنتُم صِنَعتوه ”عیش الْإمسَیلِبچیه“.»
18کُبار الْکاهِنین وَ مُعَلِّمین التُّورات مِن سِمعَوا هَي، گامُوا یِدَورون عَلَیٰ طَریق لِقَتله، لِأن چانُوا یِخافون مِنَّه، چِن کِل الْجَمعیَّه چانُوا مِتْحَیّرین مِن تَعالیمه. 19مِن صار الْغُروب، عیسیٰ وَ تِلامیذه طَلعَوا مِن الْمَدینه.
سِدرَة التّین یِبْسَت
20الْفَجِر، بي الطَّریق، شافُوا سِدرَة التّین إلْلي چانَت یابسه مِن الْعِرِج. 21پِطرُس أتذَکَّر السَّالفه وَ گال لِعیسیٰ: «یا مُعَلِّم، شوف! سِدرَة التّین إلْلي لَعَنِتها، یِبسَت.» 22عیسیٰ جاوُب: «آمِنوا بي الْإلَه. 23بِالحَق، أگِلکُم، لُو أحَد ایگِل لِهَذا الْیِبَل، ”إنْشِلِع مِن مَکانِک، وَ طیح بي الْبَحَر،“ وَ بي گَلبه ما یِشِک بَلْ یُؤمِن بی شي إلْلي ایگوله ایصیر، راح ایصیر لِه. 24چا أگِلکُم، کِل شي إلْلي تِطُلْبونه بي الدُّعاء، آمِنوا إلْلي حَصَلتوه، وَ راح ایصیر ألکُم.
25«چا وَکت الدُّعاء، لُو أکو شي بي گلوبکُم عَلَیٰ أحَد، عِفو عَنَّه، خاطِر أبوکُم هَم إلْلي بي السَّماء، یِعِف أخطائکُم. 26أمَّن لُو أنتُم ما تِعْفون، أبوکُم إلْلي بي السَّماء هَم ما یِعِف أخطائکُم.»
سُؤال عَن سُلطَة عیسیٰ
27ذاکول مَرَّه أخریٰ إیَّوا لِأورشَلیم. وَکت إلْلي عیسیٰ چان یِمشي بي الْمَعبَد، کُبار الْکاهِنین وَ مُعَلِّمین التُّورات وَ الْمَشایِخ إیَّوا عِندَه، 28سِألُوا: «بي یا رُخصَه تِعمِل هِل أعمال؟ یاهو مُنْطیک هَذا الْأقتدار حَتَّیٰ تِعمِل هِل أعمال؟» 29عیسیٰ بي الْجَواب گال: «أنا هَم عِندي سُؤال مِنکُم. أنْطوني جَواب خاطِر أنا هَم أگِلکُم بي یا أقتدار أعمِل هِل أعمال. 30تَعمید یَحیَّیٰ چان مِن صُوب الْإلَه لُو مِن صُوب الْإنسان؟ جاوبو.» 31هُمّا إستِشاروا بَعَضهُم وَ گالُوا: «لُو إنگول، ”چان مِن صُوب الْإلَه“، ایگول، ”چا لِیش ما آمَنتوا بيه؟“ 32لُو إنْگول، ”چان مِن صُوب الْإنسان“...» لِأن چانُوا یِخافون مِن النَّاس وَ الْجَمیع چانُوا یِعتَبرون یَحیَّیٰ بي الْحَقیقه نَبي. 33چا جاوُبَوا عیسیٰ: «ما نِدري.» عیسیٰ گال: «أنا هَم ما أگِلکُم بي یا أقتِدار أعمِل هِل أعمال.»
Currently Selected:
إنجیل مَرقُس 11: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
