لوقا 9
9
مُهِمَّة أثنَعَش تِلمیذ
1عیسیٰ راد ذاکول الْأثنَعَش تِلمیذ وَ جَمَّعهُم وَ أنْطاهُم قُدرَه وَ أقتدار خاطِر یِطُلعون أرواح الْشَیطانیّه وَ یِشفون الْأمراض؛ 2وَ وَدّاهُم لِیْوَعظون بي مَلَکوت الْإلَه وَ یِشفون الْمَرضیٰ. 3وَ گِلهُم: «لا تَأخذون شي لِلسَّفَر، لا عَصّا، لا صُرَّه، لا خُبُز، لا أفلوس وَ لا قِمیص زایِد. 4بي یا بِیت إلْلي دَخَلتوا، أُبقوا بي ذاک الْبِیت، لِوَکت إلْلي تِتِرکون ذاک الْمَحَل. 5لُو النَّاس ما قِبلَتکُم، بي وَکِت تَرک مَدینَتهُم، إنِکتُوا أتراب ریلِیکُم خاطِر إتکون شَهادَه إلْلي غَضَب الْإلَه ایّي عَلِیهُم.» 6چا التِّلامیذ چانُوا یِرحون مِن قَریه لِقَریه أخریٰ وَ وَین ما یوصلون، چانُوا یِبَشّرون یِیِّت مَلَکوت الْإلَه وَ یِشفون الْمَرضیٰ.
7وَ أمَّن وَصَل خَبَر کِل هِذِن الْوَقایِع بي إذان هیرودیس الْحاکِم. هیرودیس چان ضال حَیران وَ مِتحَیِّر، لِأن بَعَض چانُوا ایگولون عیسیٰ هُوَّ یَحییٰ إلْلي گایِم مِن الْمُوتیٰ. 8بَعَض آخَر چانُوا ایگولون نَبي إیلیا ظَهَر، وَ بَعَض هَم چانُوا ایگولون واحَد مِن أنبیاء گَبُل إستَحیَّه. 9أمَّن هیرودیس گال: «أنا گَطَعِت رَأس یَحییٰ. چا یاهو هَذ إلْلي أسمَع هِل أشیاء عَنَّه؟» وَ چان یِسعي ایشوف عیسیٰ.
إطعام خِمِس تالاف شَخُص
10وَکت إلْلي رِجعَوا الرُّسُل، خَبِّرُوا عیسیٰ مِن کِل شي إلْلي چانُوا عاملین. بَعدِین أخَذهُم مَعَه لِمَدینه بي أسِم بِیْت صَیْدَا خاطِر أهناک یُبقون وَحَدهُم. 11أمَّن چِثیرین عُرفُوا هَي وَ مِشَوا وَرائهُم. عیسیٰ هَم إتقَبَّلهُم وَ حاچاهُم مِن مَلَکوت الْإلَه وَ أشخاص إلْلي چانُوا عایزین مُعالِجه، شِفاهُم.
12جِریب الْغُروب، ذاکول الْأثنَعَش تِلامیذه إیَّوا عِندَه وَ گالُوا: «رَخِّص الْجَماعَه خاطِر یِرحون لِلْقُرَیٰ وَ مَزارِع الْأطراف خاطِر یِلگون أکِل وَ سَکَن لِنِفِسهُم، چِن أهنا مَکان بِعید عَن کِل شي.» 13عیسیٰ بي الْجَواب گال: «أنتُم أنْطوهُم أکِل.» گالُوا: «إحنَا ما عِندنا شي غِیر خِمِس خُبزات وَ سِمِچتَین، إلّا إنروح وَ نِشتِري أکِل لِکِل هَل ناس.» 14أهناک چانُوا حُدود خِمِس تالاف زِلمه. عیسیٰ گِل لِتِلامیذه: «گَعدوا النَّاس بي فِریق خِمسین خِمسین نَفَر.» 15التِّلامیذ هِیچي عِملُوا وَ گَعِّدُوا الْجَمیع. 16بَعدِین عیسیٰ کَض الْخِمِس خُبزات وَ الْسِمِچتَین، باوَع لِلسَّماء وَ بارَکهِن، ثِلَمْهِن وَ أنْطا لِلتِّلامیذ خاطِر یِقَدمونهِن لِلنَّاس. 17چا الْجَمیع کِلُوا وَ شِبعَوا وَ بُقَیٰ أثنَعَش سِلَّه هَم مِن إفْضالة الْأکِل.
إعتِراف پِطرُس عَن عیسیٰ
18فِرِد یُوم عیسیٰ چان یِنْدِعي لِوَحده وَ بِس تِلامیذه چانُوا مَعَه. سِأَلهُم: «النَّاس إتگول أنا یاهو؟» 19جاوُبَوا: «بَعَض ایگولون أنتَ یَحییٰ الْمُعَمِّد، بَعَض آخَر ایگولون أنتَ نَبي إیلیا، وَ بَعَض هَم یِعُرفونَک واحَد مِن أنبیَاء أیَّام گَبُل إلْلي إستَحیاء.» 20عیسیٰ سِأَلهُم: «أنتُم شِتْگولون عَنّي؟ أنا یاهو؟» پِطرُس جاوَب: «أنتَ مَسیح مُوعود الْإلَه.»
21بَعدِین عیسیٰ مِنَعهُم وَ أمَر لا یِگولون هَي لِأحَد، 22وَ گال: «کون ابن الْإنسان یِتعَذِّب چِثیر وَ یِرُفضونه الْمَشایِخ وَ کُبار کاهِنین الْمَعبَد وَ مُعَلِّمین التُّورات وَ یِنقِتِل وَ بي یُوم الثّالِث ایگوم.»
23بَعدِین گال لِلْجَمیع: «لُو أحَد ایرید یِتْبَعني، کون یِنکُر نِفسه، کِل یُوم یِحمِل صَلیبه، وَ ایّي وَراي. 24لِأن کِلمَن ایرید یِنَجّي نَفسه، یِخسَرها؛ أمَّن کِلمَن لِخاطري یِخسَر نَفسه، يِنَجّیها. 25شِنهي فایِده لِلْإنسان إلْلي یِربَح کِل الدِّنیا، أمَّن یِخسَر نِفسه لُو یِتلِفْها. 26لِأن کِلمَن یِسْتَنکِف مِنّي وَ مِن حَچیي، ابن الْإنسان هَم یِسْتَنکِف مِنَّه، ذاک الْوَکِت إلْلي ایّي بي مَجده وَ مَجد الْأب وَ مَلائِکَة الْمُقَدَّسه. 27بِالْحَق أگِلکُم، بَعَض أهنا مُوگفین وَ لِوَکت إلْلي ما یِشوفون مَلَکوت الْإلَه، ما یِذوگون الْمُوت.»
تَغییر وَیِه عیسیٰ
28حُدود ثِمِن تِیَّام مِن بَعَد هَذا الْحَچي، عیسیٰ أخَذ پِطرُس وَ یُوحَنَّا وَ یَعقوب وَ راح عَلَیٰ فِرِد یِبَل خاطِر یِنْدِعي. 29بي ذاک الْحال إلْلي چان یِنْدِعي، لُون وَیهه إتْغَیَّر وَ هِدمه صار أبیَض وَ إتنَوَّر. 30فَجأةً أثنَین زِلِم، مُوسیٰ وَ نَبي إیلیا، ظُهرَوا وَ گامُوا یِحچون مَعَه. 31ذاکول چانُوا ظاهرین بي مَجد وَ چانُوا یِحچون عَن مُوت عیسیٰ إلْلي عَن قَریب کون یِحدَث بي أورشَلیم وَ بي هَي تِتحَرَّر النَّاس. 32پِطرُس وَ إلْلي چانُوا مَعَه چانُوا نَعسانین چِثیر، أمَّن وَکت إلْلي گِعدَوا وَ وَعَوا، شافُوا مَجِد عیسیٰ وَ ذاکول الْأثنِین زلِمِ إلْلي چانُوا مُوگفین یِمَّه. 33وَکت إلْلي ذاکول الأثنَین چانُوا یِرحون مِن یِم عیسیٰ، پِطرُس گال: «یا مُعَلِّم، زِین إلْلي إحنَا مُوجودین أهنا! خِلّي نِنصُب ثِلِث مَظَلّات، وَحده ألَک، وَحده لِمُوسیٰ وَ وَحده هَم لِإیلیا.» هُوَّ ما چان یُعرُف إش گاعِد ایگول. 34هَي الْإحچایه بَعَدها چانَت عَلَیٰ لِسان پِطرُس إلْلي ظُهرَت غِیمه وَ صارَت عَلِیهُم. خافُوا وَکت إلْلي غَطَّتهُم الْغِیمه. 35بَعدِین وَصَل نَداء مِن الْغِیم إلْلي «هَذا هُوَّ ابني إلْلي مِختارَه؛ أسِمعوا لَه!» 36وَ وَکت إلْلي إنگُطَع الصُّوت، شافُوا عیسیٰ لِوَحده. التِّلامیذ حِفظُوا هَي بِیناتهُم، وَ بي ذاک الزَّمان ما خَبِّرُوا أحَد مِن شي إلْلي چانُوا شایفین.
شَفاء وَلَد الْمِتلَبِّس روح شَیطانیّه
37یُوم التَّالي، وَکت إلْلي نِزلَوا مِن الْیِبَل، جَمعیَّه چِثیره تِلاگُوا مَعَ عیسیٰ. 38فَجأةً زِلمه مِن بِین الْجَمعیَّه صاح: «یا مُعَلِّم، أترَجّاک إتْشوف ابني، لِأن ابني الْوَحید. 39فِرِد روح فَجأةً إتکُضَّه وَ هُوَّ بي لَحظَتها یِصرَخ وَ یِتْشَنَّج، بي شِکل إلْلي حَلگه ایوَقُّف. هَي الرّوح بي صُعوبَه إتْتَیهه، وَ تِتِرکه مَجروح. 40أنا أترَجِّیت تَلامیذَک إلْلي یِطُلعونها مِنَّه، أمَّن ما گِدرَوا.» 41عیسیٰ جاوَب: «یا جیل الْبِدون إیمان وَ مُنحَرِف، لِحَد یِمته أکون وَیَّاکُم وَ أتحَمِّلکُم؟ یِب ابنَک أهنا.» 42بي ذاک الْوَکِت إلْلي الْوَلِد چان ایّي، روح الْشَیطانیّه طَگِته عَل گاع وَ شَنِّجَتَّه. أمَّن عیسیٰ عاتَب ذیچ روح الْخَبیثه وَ شِفَیٰ الْوَلِد وَ سِلِّمَه لِأبوه. 43جَمیع النَّاس إتحَیِّرُوا مِن عَظَمَة الْإلَه.
بي ذاک الْحال إلْلي الْجَمیع چانُوا مِتعَجبین مِن أعمال عیسیٰ، هُوَّ گال لِتَلامیذه: 44«بي دِقّه خِلّوا بي بالکُم شي إلْلي أرید أگِلکُم: ابن الْإنسان یِتْسَلَّم بي إید النَّاس.» 45أمَّن ما دِرکُوا مَنظورَه؛ بَل ضَل إمْخَبَئ مِنهُم خاطِر لا یِفتَهمون قَصده؛ وَ چانُوا یِخافون یِسِألون مِنَّه عَن هَي.
الْعَظَمَه بي شِنهي؟
46فِرِد یُوم بِین التِّلامیذ صار هَذا الْبَحَث إلْلي یاهو مِن بِیناتهُم أعظَم مِن الْجَمیع. 47عیسیٰ إلْلي چان عالِم بي أفکارهُم، کَض فِرِد طُفِل وَ خِلّاه یِمَّه، 48وَ گِلهُم: «کِلمَن یِقبَل هَذا الْطُفِل بي أسمي، قابِلني؛ وَ کِلمَن یِقبَلني، قابِل الْأموَدّیني. لِأن بِیناتکُم ذاک الْشَخُص أعظَم إلْلي أیکون أضغَر مِن الْجَمیع.»
49یُوحَنَّا گال: «یا مُعَلِّم، شِفنا شَخُص إلْلي بي أسمَک چان یِطَلِّع روح شَیطانیّه، أمَّن مِنَعناه لِأن ما چان مِن عِندنا.» 50عیسیٰ گال: «لا تِمِنعونه، لِأن کِلمَن مو ضِدکُم، مَعَکُم.»
رَفُض عیسیٰ بي فِرِد قَریه سامِریَّه
51وَکت إلْلي چان یِتگَرَّب زَمان صُعود عیسیٰ لِلسَّماء، صَمَّم وَ تِوُجَّه صُوب أورشَلیم 52چا وَدَّه رُسُل گَبله إلْلي راحُوا لِوَحده مِن قُرَیٰ السّامِریین خاطِر یِجَهزون لِه مَکان. 53أمَّن نَاس أهناک ما قِبلُوه، لِأن چان ایروح لِأورشَلیم. 54وَکت إلْلي تِلامیذه، یَعقوب وَ یُوحَنَّا، شافُوا هَي، گالُوا: «یا سِیِّدنا، هَل أترید إنگول تِنزِل نار مِن السَّماء وَ تِهلِک جَمیعهُم؟» 55أمَّن عیسی إلْتِفَت ألهُم وَ عاتَبهُم. وَ گال: «ما تِدرون أنتُم مِن یا روح! 56لِأن ابن الْإنسان، مو یَاي خاطِر یِهلِک نُفوس النَّاس، بَل خاطِر یِنَجّيها.» بَعدِین راحُوا لِقَریه أخریٰ.
ثَمَن مُتابِعَة عیسیٰ
57بي الطَّریق، فِرِد شَخُص گِل لِعیسیٰ: «وَین ما إتروح، أتِبعَک.» 58عیسیٰ جاوَب: «الْواویه عِندهُم إحیور وَ طُیور السَّماء عیش، أمَّن ابن الْإنسان، ما عِندَه مَکان یِحُط رَأسه.» 59عیسیٰ گِل لِفِرِد شَخُص آخَر: «أتبَعني.» أمَّن هُوَّ جاوَب: «یا سِیِّدي، أوَّل رَخُّصني خِل أروح وَ مِن بَعَد مُوت وَ دَفِن أبوي أتِبعَک.» 60عیسیٰ گِلَّه: «خِلّي الْمُوتیٰ، تِدفِن أمواتها؛ أنتَ روح وَ أوْعِظ بي مَلَکوت الْإلَه.» 61بَعَد واحَد گال: «یا سِیِّدي، أتِبعَک، أمَّن أوَّل رَخُّصني خاطِر أرجَع وَ وَدِّع أهَل بِیتي.» 62عیسیٰ بي الْجَواب گال: «أحَد إلْلي یُکرُب وَ یِباوِع لِوَراء، ما یِستاهِل مَلَکوت الْإلَه.»
Currently Selected:
لوقا 9: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
