لوقا 7
7
إیمان قائِد رومي
1وَکت إلْلي عیسیٰ تِمَّم کِل حَچیه مَعَ النَّاس، إیّه لِکَفَرناحوم. 2أهناک چان ضابُط رومي وَ تَحَت أمرَه چان مِیَة جِندي. چان عِندَه عَبِد عَزیز عَلِیه. الْعَبِد چان مَریض وَ بی حالة الْمُوت. 3الْضابُط وَکت إلْلي سِمَع عَن عیسیٰ، وَدّا لَه چِم شِیخ مِن الْیَهُود خاطِر یِردون مِنَّه ایّي وَ یِشفي عَبده. 4ذاکول إیَّوا عِند عیسیٰ وَ چِثیر دَخِّلُوا وَ گالُوا لَه: «هَذا الْزِلمه یِستِحِق إتْسَوّي هَي الْمَحَبَّه بي حَگّه، 5لِأن یِحِب قُومنا وَ هَم بِنَیٰ ألنا مَحَل عِبادَه.» 6چا عیسیٰ راح وَیَّاهُم. وَکت إلْلي وَصَل جِریب لِلْبِیت، ذاک الْضابُط وَدَّه چِم شَخُص مِن صُدقانه عِند عیسیٰ، بي هِل رِساله إلْلي: «یا سِیِّدي، لا تَعِّب نِفسِک، لِأن ما أسْتَحِق تیّي لِبِیتي. 7بي هِل سَبَب، حَتَّیٰ ما حِسِبِت نِفسي مِستِحِق خاطِر أیّي عِندَک. بِس گول کِلمه إلْلي یِشفي خادمي. 8لِأن أنا نِفسي شَخُص تَحت الْأمُر. عِندي جِنود هَم تَحَت أمري. أگِل لِواحَد، ”روح“، ایروح؛ أگِل لِلْآخَر، ”تَعال“، ایّي. أگِل لِعَبدي، ”أعمِل هَذا الشّي“، یِعمِل.» 9وَکت إلْلي عیسیٰ سِمَع هَذا الشّي، إتْحَیَّر وَ إلْتِفَت عَلَیٰ الْجَماعَه إلْلي چانُوا إیّون وَراه وَ گال: «أگِلکُم، هِیچ إیمان هَم حَتَّیٰ بِین بَني إسْرائیل ما شِفِت.» 10وَکت إلْلي أشخاص إلْلي چان إموَدّیهُم رِجعَوا لِلْبِیت، لِگُوا الْعَبِد مِتْشافي.
أحیَاء ابن الْأرمَله
11بَعَد چِم وَکِت، عیسیٰ راح لِمَدینه بي أسِم نَائین. التِّلامیذ وَ جَماعه چِثیره هَم راحُوا مَعَه. 12وَکت إلْلي وَصَل جِریب باب الْمَدینه، شاف یَأخذون مِیِّت إلْلي چان ابن الْوَحید لِأرمَله. چِثیرین مِن أهالي الْمَدینه هَم چانُوا وَیَّاها. 13الرَّب وَکت إلْلي شافها، گَلبه أحتَرَگ ألها وَ گال: «لا تِبچین.» 14بَعدِین إتْگَرَّب وَ لِمَس التّابوت. أشخاص إلْلي چانُوا یِحِملونه، وُگفَوا. عیسیٰ گال: «یا شاب، أگِل لَک، گوم!» 15الْمِیِّت گَعَد وَ گام یِحچي! عیسیٰ أنطاه لِوالِدته. 16الْجَمیع خافُوا وَ بي حال إلْلي چانُوا یِحِمدون الْإلَه، چانُوا ایگولون: «ظَهَر بِیناتنا نَبي چِبیر. الْإلَه یَاي لِمُساعِدَة قُومه.» 17خَبَر هَذ عَمَل عیسیٰ أنتَشَر بي کِل مَنطَقة الْیَهُودیَّه وَ أطرافها.
شَک یَحییٰ عَن عیسیٰ
18تِلامیذ یَحییٰ خَبِّرُوا یَحییٰ مِن کِل هِذِن الْوَقایِع. چا هُوَّ راد أثنِین مِنهُم 19وَ وَدّاهُم عِند عیسیٰ بي هِل رِساله: «هَلْ أنتَ ذاک إلْلي کون ایّي، لُو نِنتَظِر شَخُص آخَر؟» 20ذاکول الْأثنِین إیَّوا عِند عیسیٰ وَ گالُوا: «یَحییٰ الْمُعَمِّد وَدّانا خاطِر نِسِألَک هَلْ أنتَ ذاک إلْلي کون ایّي، لُو نِنتَظِر شَخُص آخَر؟» 21بي ذیچ السّاعَه، عیسیٰ شِفیٰ چِثیر مِن الْأمراض وَ الْأوجاع وَ أرواح الْخَبیثه وَ فِتِّش أعیون چِثیر مِن الْعِمیان. 22چا بي جَواب الرُّسُل گال: «روحوا وَ کِل شي إلْلي شِفتوه وَ سِمَعتوه، گولوا لِیَحییٰ، الْعِمیان یِفَتِّشون وَ الْعِریان یِمشون وَ الْجُذامیّون یِشفون وَ الطُّرشان یِسِمعون وَ الْمُوتیٰ یِحیون وَ یِبَشرون الْفُقَراء. 23خِیعون ذاک إلْلي لا یِشِک بیَه.»
24وَکت إلْلي رُسُل یَحییٰ راحُوا، عیسیٰ أبتِدَء عَنَّه بي الْحَچي وَ گال لِلْجَماعَه: «لِشُوفَة شِنهو چِنتوا رایحین لِلصَّحراء؟ لِشُوفَة گُصبَه إلْلي تِهتَز مِن الْهَواء؟ 25لِشُوفَة شِنهو رِحتوا؟ زِلمه إلْلي لابِس هِدِم ناعِم؟ شوفوا، ذاکول إلْلي یِلِبسون أهدوم فاخره وَ یِعیشون بي التَّجَمُّل، هُمّا بي قُصور الْمُلوک. 26چا لِشُوفَة شِنهو چِنتوا رایحین؟ لِشُوفَة نَبي؟ نَعَم، أگِلکُم أحَد إلْلي أفضَل مِن النَّبي هَم. 27ذاک هُوَّ إلْلي مِکتوب عَنَّه بي کُتُب الْمُقَدَّسه:
«”شوف، أوَدّي رَسولي گَبلَک
وَ هُوَّ راح یِجَهِّز طَریقَک.“
28أگِلکُم إلْلي أحَد أکبَر مِن یَحییٰ ما وَلَد مِن أمَّه؛ أمَّن أضغَر واحَد بي مَلَکوت الْإلَه، أکبَر مِنَّه.»
29کِل النَّاس إلْلي سِمعَوا هَذا الْحَچي، حَتَّیٰ مُجَمِّعین الْضَریبه عِلنَوا إلْلي الْإلَه عادِل، لِأن بي إید یَحییٰ چانُوا مِتعَمدین غُسل التَّعمید. 30أمَّن فِرقَة الْفَریسیین وَ الْفُقَهاء رِفضُوا لِنِفِسهُم إرادَة الْإلَه بي سَبَب إمتِناعهُم مِن غُسل التَّعمید مِن إید یَحییٰ.
31عیسیٰ إستَمَر بي الْکَلام وَ گال: «چا، بِش أشَبِّه ناس هَذا الْجیل؟ شي شابْهون؟ 32یِشابْهون أطفال إلْلي یِگِعدون بي السّوگ وَ ایگولون لِلْآخَر:
«”عِزِفنالْکُم ناي، ما رِگَصتوا؛
نِحنالکُم، ما لِطَمتوا.“
33لِأن إیّه یَحییٰ الْمُعَمِّد إلْلي لا چان یَأکِل أکِل وَ لا چان یِشرَب شَراب؛ گِلتوا، ”مِتلَبِّس روح شَیطانیّه.“ 34إیّه ابن الْإنسان، اللی یَأکِل وَ یِشرَب؛ إتگولون، ”زِلمه إکّال وَ شاروب خُمُر، صَدیق مُجَمِّعین الْضَریبه وَ الْمُذنِبین.“ 35أمَّن أعمال وَ کَلام الْإنسان یِثَبْتَن إلْلي عِندَه حِکمه لُو لا.»
تَدهین عیسیٰ بي إید مَراء مُذنِبه
36فِرِد یُوم واحَد مِن عُلَماء فِرقَة الْفَریسیین عِزَم عیسیٰ لِبِیته. چا راح لِبِیت ذاکِ الْفَریسي وَ گَعَد عَلَیٰ السُّفرَه. 37وَ شوف، بي ذیچ الْمَدینه، چانَت إتعیش مَراء مُذنِبه إلْلي مِن سِمعَت عیسیٰ ضَیف بي بِیت ذاک الْفَریسي، یابِت وَیَّاها ماعون مَرمَر مِتْروس مِن الْعُطور 38وَ هیَّه باچیه وَراء عیسیٰ، وُگفَت یِم ریلِیه إلْلي چان إمَّدِّدْهِن عَلَیٰ السُّفرَه حَسَب عاداتهُم. بَعدِین بي قَطَرات إدموعها گامَت تِغسِل ریلِین عیسیٰ وَ نَشِّفَتْهِن بي شَعَرها. بَعدِین حَبِّت ریلِیه وَ عَطِّرَتهِن. 39وَکت إلْلي فَریسي الْإمعَزِب شاف هَي، گال مَعَ نِفسه: «لُو هَذا الْزِلمه صِدِگ چان نَبي، چان عَرَف هَيِ الْمَراء إلْلي تِلِمسه یاهي وَ إشلون مَراء، چان عَرَف إلْلي مُذنِبه.» 40عیسیٰ گِلَّه: «یا شَمعون، أرید أگِل لِک شي.» گال: «إتفَضَّل یا مُعَلِّم!» 41عیسیٰ گال: «شَخُص چان یِطلُب نَفَرِین: مِن واحَد خِمِس مِیَة دینار، و مِن الْآخَر خِمسین دینار. 42أمَّن لِأن ما چان عِندهُم شي یِنْطونه، عَف عَن دِین أثنِینهُم. هَسّه إتْظُن یاهو مِنهُم أکثَر راح یِوُدَّه؟» 43شَمعون جاوَب: «أظُن ذاک إلْلي چان أکثَر مَطلوب وَ عَف عَنَّه.» عیسیٰ گال: «صَحیح گِلِت.» 44بَعدِین أَشَّر صُوب ذیچ الْمَراء وَ گال لِلْشَمعون: «إتْشوف هَي الْمَراء؟ أنا إیِّت لِبِیتَک، وَ أنتَ مَا یِبِت ماي لِغِسِل ریلِي، أمَّن هَي الْمَراء غِسلِت ریلِي بي دموعها وَ نَشِّفَتهِن بي شَعَرها! 45أنتَ ما حَبِّتني، أمَّن هَي الْمَراء مِن وَکِت دِشتي، ما بَطِّلَت مِن حَب ریلِي. 46أنتَ ما دَهَّنِت رَأسي، أمِّن هيَّه عَطِّرَت ریلِي. 47چا أگِل لِک، ذُنوبها الْچِثیره إنغُفرَن بي سَبَب چِثرَة مَحَبَّتها. أمَّن ذاک إلْلي أقَل إنغُفَر، أقَل هَم ایسَوّي مَحَبَّه.» 48چا إلْتِفَت لِذیچ الْمَراء وَ گال: «إنْغُفرَن ذُنوبِچ!» 49الضِّیوف واحَد گال لِلْآخَر: «هَذا یاهو إلْلي یِغفِر الذُّنوب هَم؟» 50عیسیٰ گال لِذیچ الْمَراء: «إیمانِچ نِجّاچ، روحي بي السَّلامه!»
Currently Selected:
لوقا 7: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
