لوقا 19
19
زَکّا مُجَمِّع الْضَریبه
1عیسیٰ دَخَل بي مَدینَة أَریحا وَ چان یِتعَدَّه مِن بِینها. 2أهناک چان فِرِد غَني، بي أسِم زَکّا، رَئیس مُجَمِّعین الْضَریبه. 3هُوَّ راد ایشوف عیسیٰ یاهو، أمَّن مِن گُصُر قامته وَ أزدِحام الْجَمعیَّه ما چان یِگدَر. 4بي هَل سَبَب، رُکَض جِدَّام وَ صَعَد عَلَیٰ فِرِد سِدره خاطِر ایشوفَه، لِأن عیسیٰ چان یِتعَدَّه مِن ذاک الْطَریق. 5وَکت إلْلي عیسیٰ وَصَل لِذاک الْمَکان، باوَع فُوگ وَ گِلَّه: «زَکّا، أسرَع وَ أنزِل إلْلي الْیُوم کون أضُل بي بَیتَک.» 6زَکّا بي سُرعَه نِزِل وَ بي فَرحَه خِذاه لِبَیته. 7النَّاس وَکت إلْلي شافُوا هَي، کِلهُم إشتِکُوا إلْلي: «رایِح لِعَزیمه بي بِیت فِرِد مُذنِب.» 8وَ أمَّن زَکّا گام مِن مَکانه وَ گال لِعیسیٰ الرَّب: «سِیِّدي، هَسّه أَنْطي نُص أموالي لِلْفُقَراء، وَ لُو مَأخِذ شي بِدون حَگ مِن أحَد، أرَجِّع لِه أربَع أضعاف.» 9عیسیٰ گال: «الْیُوم الْنَجاح دَخَل بي هَذا الْبَیت، چِن هَذا الْزِلمه هَم ابِن إبراهیم. 10لِأن ابن الْإنسان یَاي خاطِر یِدَوِّر الضّایِع وَ یِنَجّيه.»
مَثَل الْمَلِک وَ عَشُر خِدَّام
11بي ذیچ الْحال إلْلي ذاکول چانُوا یِسِمعون هَذا الْحَچي، عیسیٰ بي باجي حَچیه، یاب فِرِد مَثَل، لِأن چان جِریب لِأورشَلیم وَ النَّاس چانُوا یِفَکرون مَلَکوت الْإلَه یِظهَر بي ذاک الزَّمان. 12چا گال: «ابِن شَخُص شَریف راح لِمَکان بِعید خاطِر مِن طَرَف الْأمبَراطور یِتْعَیَّن مَلِک دیرته وَ بَعدِین یِرجَع. 13چا، راد عَشُر أشخاص مِن خِدَّامه وَ أنْطه لِکِل واحَد سِکَّة ذَهَب وَ گال: ”لِحَد رَجِعتي تاجِروا بي هِل أفلوس.“ 14أمَّن نَاس إلْلي چان قَرار یِحکُم عَلِیهُم، چانُوا یِکُرهونه؛ ذاکول وَدَّوا وَراء طُوارِش بي هِل رِساله إلْلي: ”إحنَا ما نرید هَذا الشَّخُص یِحکُم عَلِینا.“ 15مَعَ کِل هَذ، هُوَّ صار بي مَقام مَلِک وَ رِجَع. چا گال ایصیحون لِخِدَّام إلْلي چان مُنْطيهُم أفلوس، خاطِر یُعرُف کِل واحَد إشگَد مِتْنَفِّع. 16الْأوَّلي إیّه وَ گال: ”یا سِیِّدي، سِکّتَک رابحَه عَشُر سِکّات أخریٰ.“ 17گِلَّه: ”عَفّیه، یا خادِم الْطَیِّب! چِن بي الْقَلیل چِنِت أمین، أنْطیک حُکومَة عَشُر مُدُن.“ 18الثَّاني إیّه وَ گال: ”یا سِیِّدي، سِکّتَک رابحَه خِمِس سِکّات أخریٰ.“ 19لِذاک هَم گال: ”أُحکُم عَلَیٰ خِمِس مُدُن.“ 20بَعدِین الْآخَر إیّه وَ گال: ”یا سِیِّدي، هَي سِکّتَک! مِلفوفه بي وُصلَة أُگماش، حِفَظِتها. 21لِأن چِنِت أخاف مِنَّک، چِن أنتَ زِلمه عاصي. شي إلْلي مِنته حاطّه، تَأخذه، وَ شي إلْلي مِنته شاتله، تِحُصده.“ 22گِلَّه: ”یا خادِم الشَّریر، حَسَب أحچایتَک أَحکُم عَلِیک. أنتَ إلْلي چِنِت تُعرُف أنا زِلمه عاصي، شي إلْلي ماني حاطّه آخذه، وَ شي إلْلي ماني شاتله أحُصده، 23لِیش ما أنطِیت أفلوسي لِلصَّرافین خاطِر وَکت إلْلي أرجَع، أخِذهِن مَعَ رِبِحْهِن؟“ 24چا گال لِلْحُضّار: ”أخذوا السِّکّه مِنَّه وَ أُنطوها لِذاک إلْلي عِنده عَشَر سِکّات.“ 25گِلُوا لِه: ”یا سِیِّدنا، ذاک هُوَّ عِنده عَشُر سِکّات!“ 26جاوَب: ”أگِلکُم کِلمَن إلْلي عِندَه، یِنْعُطي لِه أکثَر؛ أمَّن ذاک إلْلي ما عِندَه، شي إلْلي عِندَه هَم یِنْوُخِذ مِنَّه. 27وَ هَسّه ذاکول عِدواني إلْلي ما چانُوا یِردون أَحکُم عَلِیهُم یِبوهُم أهنا وَ أقِتْلوهُم جِدَّامي.“»
عیسیٰ یِدخَل أورشَلیم کِمَلِک
28مِن بَعَد هَذا الْحَچي، عیسیٰ سُبَگ الْآخَرین وَ راح لِأورشَلیم.
29مِن وَصَل جِریب لِبَیت فاجي وَ بَیت عَنْیا إلْلي چان فُوگ یِبَل، وَدَّه أثنَین مِن تِلامیذه وَ گال: 30«روحوا لِقَریه إلْلي جِدَّامکُم. وَکت إلْلي دَخَلتوا، تِلگون یَحَش مَربوط إلْلي لِهَسّه أحَد مو راکبه. فوکّوا رِشِمتَه وَ یِبوه أهنا. 31لُو أحَد سِأَل مِنکُم: ”لِیش إتْفوکّونه؟“ گولوا: ”الرَّب یِریده.“» 32الْمُرسَلین راحُوا وَ لِگُوا کِل شي مِثِل ما عیسیٰ چان گایِل ألهُم. 33وَ وَکت إلْلي چانُوا یِفوکون إرباط الْیَحَش، أصحابه گِلُوا ألهُم: «لِیش إتْفوکون إرباطه؟» 34جاوُبُوا: «الرَّب ایریده.» 35ذاکول یابُوا الْیَحَش عِند عیسیٰ. بَعدِین حَطُّوا عَباهُم عَلِیه وَ گَعِّدُوا عیسیٰ عَلَیٰ الْیَحَش. 36بي حال إلْلي عیسیٰ چان یِمشي جِدَّام، النَّاس چانُوا یِفِرشون ذِبونهُم عَلَیٰ الطَّریق. 37وَکت إلْلي وَصَل جِریب لِسِرْساحَة یِبَل زِیتون، جَماعَة تِلامیذه کِلهُم، شِکرُوا الْإلَه بي فَرحَه وَ بي صُوت عَالي، لِخاطِر کِل مُعجِزات إلْلي چانُوا شایفین مِنَّه، 38گالُوا إلْلي:
«إمبارَک مَلِک إلْلي ایّي بي أسم الرَّب!
إتکون سَلام وَ سَلامه بي السَّماء وَ الْمَجد بي عَرش الْأعلیٰ!»
39بَعَض مِن عُلَماء فِرقَة الْفَریسیین مِن بِین الْجَمعیَّه گالُوا لِعیسیٰ: «یا مُعَلِّم، عاتِب تِلامیذَک!» 40بي الْجَواب گال: «أگِلکُم لُو هِذول یِسِکتون، الْصَخَر ایگوم یِصَیِّح!»
41چا مِن إتگَرَّب لِأورشَلیم وَ شاف الْمَدینه، بِچَیٰ عَلِیها 42وَ گال: «یارِیت أنتي هَم چِنتي إتْشَخُّصین إلْلي بي هِل یُوم شِنهو إیِّب لِچ السَّلام وَ السَّلامه. أمَّن حِیف إلْلي أمخَبَئ مِن أعیونِچ. 43یُوصَل زَمان إلْلي عِدوانِچ یِبْنون ألهُم مَلجَأ وَ مِن کِل جِهَه یِحاصرونِچ، وَ یِضَیگون عَلِیچ السّاحَه؛ 44وَ یِهِدمونِچ وَ یِقِتلون أولادِچ بیچ. وَ ما تُبقیٰ صَخرَه عَلَیٰ صَخرَه؛ لِأن غِفَلتي مِن مُوعِد یِیِّت الْإلَه لِمُساعِدتِچ.»
عیسیٰ بي الْمَعبَد
45بَعدِین عیسیٰ دَخَل بي صَحن الْمَعبَد وَ إبتِدَء بي طَرد الْبِیّاعَه، 46وَ گال ألهُم: «مِکتوب إلْلي ”بَیتي إیکون بَیت الدُّعاء“؛ أمَّن أنتُم جِعَلتوه عیش الْإمسَیلِبچیَّه.»
47عیسیٰ کِل یُوم چان یِعَلِّم بي الْمَعبَد. أمَّن کُبار الْکاهِنین وَ مُعَلِّمین التُّورات وَ مَشایِخ الْقُوم چانُوا وَراء قَتله، 48أمَّن ما چانُوا یِلگون طَریق إلْلي یِعِملون قَصِدهُم، لِأن النَّاس کِلها چانُوا وایِد مِشتاقین لِسِمِع حَچیه.
Currently Selected:
لوقا 19: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
