إنجیل یُوحَنَّا 7
7
عیسیٰ ایروح لِعید الْخیَم
1مِن بَعَد هَذ، عیسیٰ چان یِفتَر بي مَنطَقة الْجَلیل، لِأن ما چان یِرید یِضُل بي مَنطَقة الْیَهُودیَّه، لِأن الْیَهُود چانوا وَراء قِتلَه. 2عید خیَم الْیَهُود چان جِریب. 3چَا خُوّان عیسیٰ گِلولَه: «أترِک أهنا وَ روح لِمَنطَقة الْیَهُودیَّه خاطِر تِلامیذَک یِشوفون أعمال إلْلي إتْسُوّیهِن، 4لِأن کِلْمَن یِرید یِنعُرُف، ما یِعمِل بي الْخَفاء. أنتَ إلْلي إتسُوّي هِل أعمال، راوي نَفسَک لِلْعالَم.» 5لِأن حَتَّیٰ خُوّانه هَم ما چانُوا مُؤمِنین بيه. 6چَا عیسیٰ گِلهُم: «وَکتي بَعده ما واصِل، أمَّن یِناسِبکُم أي وَکِت. 7الْعالَم ما یِگدَر یِکرَهکُم أمَّن یِکرَهني، لِأن أنا أشهَد إلْلي أعماله شَر. 8أنتُم روحوا لِلْعید، أنا هَسّه ما أیّي لِهَذا الْعید، لِأن وَکتي بَعده کامِل ما واصِل.» 9عیسیٰ گال هَي وَ بُقیٰ بي مَنطَقة الْجَلیل.
10أمَّن بَعَد ما خُوّانه راحُوا لِلْعید، هُوَّ هَم راح، أمَّن مو عَل مَکشوف بِل بي الْخَفاء. 11چَا الْیَهُود، بي وَکِت الْعید چانُوا یِدَورون عَلِیه وَ چانُوا یِسِألون: «وَین ذاک الْزِلمه؟» 12وَ بِین النَّاس چِثیر چانُوا یِحچون وَ یِدَردِمون عَنَّه. بَعَض چانُوا ایگولون: «زِلمه طَیِّب.» أمَّن بَعَض آخَر چانُوا ایگولون: «لا! بَل یِضَیِّع طَریق النَّاس.» 13أمَّن لِأن چانُوا یِخافون مِن الْیَهُود، أحَد ما چان یِحچي عَل مَکشوف عَنَّه. 14أمَّن وَکِت إلْلي تَعَدِّن نُص أیَّام الْعید، عیسیٰ إیّه لِصَحن الْمَعبَد وَ أبتِدَء بي التَّعلیم. 15بي هِل سَبَب الْیَهُود إتْحَیِّرُوا، چانُوا یِسِألون: «هَذا الْزِلمه إلْلي مو مِتعَلِّم عِلم الدّین، إشلون یِگدَر إیکون عِندَه هِیچ عِلِم؟» 16عیسیٰ بي الْجَواب گال: «تَعالیمي مو مِن عِندي، بَل مِن ذاک إلْلي إموَدّیني. 17لُو واحَد صِدِگ یِرید یِعمِل رادَة الْإلَه، یُعرُف هَل هَي التَّعالیم مِن الْإلَه لُو أنا أگولهِن مِن نَفسي. 18ذاک إلْلي یِتکَلَّم مِن نَفسه، وراء مَجد لِنَفسه، أمَّن ذاک إلْلي رایِد مَجد الْإموَدّيه، صادِق وَ أي چِذبه ما بيه. 19مو مُوسیٰ أنْطاکُم الشَّریعَه؟ أمَّن وُلا واحَد مِنکُم یِعمِل بیها. چَا لِیش شادّین أحزام لِقَتلي؟» 20النَّاس جاوُبُوا: «أنتَ مِتْلَبِّس روح شَیطانیّه! یاهو إلْلي وَراء قَتلَک؟» 21عیسیٰ بي جَوابهُم گال: «أنا عِمَلِت فِرِد شُغله وَ کِلکُم إتْحَیَّرتوا مِنها. 22مُوسیٰ أنْطاکُم حُکم الْطَهارَه وَ بي هِل أساس، بي یُوم الْشَبّات هَم إتْطَهرون الْأولاد، هَي مو مِن مُوسیٰ بَل چانِت مِن أبَّهات الْقُوم. 23چا لُو الْإنسان هَم بي یُوم الْشَبّات یِطَهرونه خاطِر یِحتَرمون شَریعَة مُوسیٰ، چَا لِیش غاضبین مِن هَي إلْلي شِفَیت کِل جِسم الْإنسان بي یُوم الْشَبّات؟ 24لا تْحُکمون حَسَب الظّاهِر، بَل أحُکموا بِالْحَق.»
رَدَة فَعل النَّاس عَن کَلام عیسیٰ
25چَا، بَعَض مِن أهالي أورشَلیم گالُوا: «مو هَذا ذاک إلْلي قاصدین قَتله؟ 26شوفوا إشلون یِتکَلَّم عَل مَکشوف وَ ما یْگِلولَه شي! هَل مُمکِن کُبار الْقُوم بي الْواقِع عارفین إلْلي هُوَّ مَسیح الْمُوعود؟ 27إحنَا نُعرُف هَذا الْزِلمه إمْنَین یَاي، أمَّن وَکت إلْلي یِظْهَر مَسیح الْمُوعود، ما أحَد یِعرُف إمْنَین یَاي.» 28بَعدِین عیسیٰ بي وَکت التَّعلیم بي الْمَعبَد، نادَه بي صوت عالي: «تِعُرفوني وَ تِدرون أنا إمْنَین. أمَّن أنا مو یَاي مِن صُوبي. ذاک الْإموَدّیني هُوَّ الْحَقّ؛ وَ أنتُم ما تِعُرفونه. 29أمَّن أنا أعُرفه، لِأن أنا مِنَّه وَ هُوَّ إموَدّیني.» 30چَا رادُوا یِعْتِقلونه، أمَّن أحَد مامِد إید عَلِیه، لِأن ساعته بَعَدهي ما چانَت واصله. 31بي هِل حال، چِثیر مِن ذیچ الْجَماعه آمِنُوا بي عیسیٰ. ذاکول چانُوا ایگولون: «هَل مِن ایّي مَسیح الْموعود، ایراوي نِیاشین أکثَر مِن هَذا الْزِلمه؟»
32أمَّن وُصَل لِإذن فِرقَة الْفَریسیین إلْلي النَّاس عَنَّه هِیچ ایگولون وَ یِدَردِمون. چَا کُبار الْکاهِنین وَ فِرقَة الْفَریسیین، وَدَّوا حُراس الْمَعبَد خاطِر یِعْتِقلونه. 33هِنّوب عیسیٰ گال: «بَعَد وَکِت قِلیل أنا مَعَکُم، وَ بَعدِین أروح صُوب الْإموَدّیني. 34إتدَوْرون عَلِي، أمَّن ما تِلگوني؛ وَ أهناک إلْلي أنا مُوجود، أنتُم ما تْگِدرون تِیّون.» 35چَا الْیَهُود واحَد چان ایگول لِلْآخَر: «هَذا الْزِلمه وَین ایرید ایروح إلْلي إحنَا ما نِگدَر نِلگاه؟ هَل یِرید ایروح عِند یَهُود الْإمطَشَّرین بِین الْیونانیین وَ یِعَلِّم الْیونانیین؟ 36شِنهو چان قَصده إلْلي گال، ”إتدَوْرون عَلِي أمَّن ما تِلگوني؛ وَ أهناک إلْلي أنا مُوجود، أنتُم ما تْگِدرون تِیّون“؟»
أنهار مَاي الْحَیَاة
37یُوم الْأخیر إلْلي چان أهَم یُوم الْعید، عیسیٰ وُگَف وَ بي صُوت عالي گال: «کِلْمَن عَطشان، خِل ایّي عِندي وَ یِشرَب. 38کِلْمَن یُؤمَن بیِه، مِثِل ما کُتُب الْمُقَدَّسه گایلات، مِن أعمَاقه یِجرَن أنهار مَاي الْحَیَاة.» 39عیسیٰ گال هَي الْإحچایه عَن روح الْإلَه، إلْلي ذاکول إلْلي یُؤمِنون بيه، یِلگونه؛ لِأن روح الْإلَه بَعده ما چان مِنْعُطي لِأحد، لِأن عیسیٰ بَعده ما چان مِتْمَجِّد.
أختِلاف بِین النَّاس عَن عیسیٰ
40بَعَض مِن الْجَماعه، مِن سِمعَوا هَذا الْحَچي گالُوا: «بِالْحَق هَذا الْزِلمه هُوَّ ذاک نَبي الْمُوعود.» 41الْآخَرین چانُوا ایگولون: «هَذا مَسیح الْمُوعود.» أمَّن بَعَض آخَر چانُوا یِسِألون: «چَا مَسیح الْمُوعود یِظْهَر مِن مَنطَقة الْجَلیل؟ 42چَا کُتُب الْمُقَدَّسه مو گایلات إلْلي مَسیح الْمُوعود إیکون مِن نَسِل دَاوُد وَ یِظْهَر مِن بَیْت لَحِم، قَریه إلْلي دَاوُد چان یِعیش بیها؟» 43چَا بِین النَّاس صار أختِلاف عَن عیسیٰ. 44بَعَض رادُوا یِعْتِقلونه، أمَّن أحَد مامِد إید عَلِیه. 45چَا حُراس الْمَعبَد رِجعَوا صُوب کُبار الْکاهِنین وَ فِرقَة الْفَریسیین. ذاکول سِألُوا مِنهُم: «لِیش ما یِبتوا عیسیٰ؟» 46الْحُراس جاوُبُوا: «لِهَسّه، شَخُص مو حاچي مِثِل هَذا الْزِلمه!» 47چَا الْفَریسیین گالُوا: «أنتُم هَم إنْغِشِیتوا؟ 48هَل مِن کُبار الْقُوم لُو الْفَریسیین اکو أحَد مُؤمِن بيه؟ 49طَبعاً لا! أمَّن هِل جِمَاعه إلْلي ما یِعُرفون شي مِن الشَّریعَه، مِلْعونین.»
50نیقودیموس، واحَد مِن الْفَریسیین إلْلي گَبُل چان رایِح عِند عیسیٰ، گال: 51«شَریعَتنا هَل تِحکُم أحَد بِدون ما أوَّل تِسمَع إحچایته وَ تِعرُف شِمْسُوّي؟» 52بي الْجَواب گالُوا: «هَل أنتَ هَم جَلیلي؟ أفحَص وَ شوف وُلا نَبي گایِم مِن مَنطَقة الْجَلیل.» 53بَعدِین کِل واحَد راح لِبِیته.
Currently Selected:
إنجیل یُوحَنَّا 7: ACM
Highlight
Copy
Compare
Share
Want to have your highlights saved across all your devices? Sign up or sign in
©️2024 Korpu Company
