إنجیل یُوحَنَّا 12

تَدهین عیسیٰ

1سِت أیَّام گَبُل عید الْپِسَخ، عیسیٰ إیّه لِبَیت عَنْیا، مَکان إلْلي یِعیش بيه ایلعازَر، ذاک إلْلي عیسیٰ گَوَّمه مِن الْمُوتیٰ. 2أهناک لِتَکریمه أنْطُوا عَشاء. مارتا چانَت تِستَضیف وَ ایلعازَر مِن جُملَة أشخاص إلْلي مَعَ عیسیٰ چان گاعِد عَلَیٰ السُّفره. 3بي ذاک الْوَکِت، مَریَم یابَت حُدود نُص لیتَر عُطور غالیه مِن سُنبُل خالِص. عَطِّرَت ریلِین عیسیٰ وَ بي شَعَر رَأسها یِبِّسَتهِن، الْبَیت إنْتِرَس مِن ریحَة الْعُطور. 4أمَّن یَهُودا الْأسخَریوطي، واحَد مِن تِلامیذ عیسیٰ، إلْلي بَعدِین سِلِّمَه لِلْعَدو، گال: 5«لِیش هَذا الْعُطُر ما إنبَاع بي ثِلِث مِیَة دینار، خاطِر أفلوسه یِنْعُطَن لِلْفُقَراء؟» 6هُوَّ ما گال هَي مِن حَرگَة گَلبه لِلْفُقَراء، بَل لِأن چان حَرامي؛ وَ چان مَسئول حَفظ چیس الْأفلوس وَ چان ایبوگ مِن أفلوس إلْلي چانَن یِنحَطَّن عِندَه. 7چَا عیسیٰ گال: «خِلّوها بي حالها! لِأن هَذا الْعُطُر چانِت إمْخِلّیته لِیُوم دَفني. 8الْفُقَراء کِل وَکِت مَعَکُم، أمَّن أنا مو کِل وَکِت مَعَکُم.»

9جَمعیه چِثیره مِن الْیَهُود، وَکت إلْلي سِمعَوا عیسیٰ أهناک، إیَّوا خاطِر مو بِس یِشوفون عیسیٰ، بَل ایلعازَر هَم إلْلي چان إمگُومَه مِن الْمُوتیٰ. 10چَا کُبار الْکاهِنین قَرِّرُوا یِقِتلون ایلعازَر هَم، 11لِأن چان صایِر سَبَب چِثیرین مِن الْیَهُود یِدیرون وُیوهْهُم مِنهُم، وَ یُؤمِنون بي عیسیٰ.

عیسیٰ یِدخَل إلَیٰ أورشَلیم کَمَلِک

12یوم التَّالي، جَمعیه چِثیره إلْلي چانُوا یَایین لِلْعید، سِمعَوا إلْلي عیسیٰ هَم گاعد ایّي لِأورشَلیم. 13چَا، چانُوا کاضّین بیدِهُم سَعَف مِن نَخَل وَ أستَقبِلُوه. ذاکول بي صُوت عالي چانُو ایگولون:

«هوشیعانا!

أمبارَک ذاک إلْلي

ایّي بي أسم الرَّب،

أمبارَک مَلِک إسرائیل!»

14عیسیٰ لِگه یَحَش وَ رَکَب عَلِیه؛ مِثِل ما مِکْتوب:

15«لا تْخافین! یا بِنت صَهیون،

شوفي مَلِکِچ گاعد ایّي،

راکِب عَلَیٰ یَحَش!»

16تِلامیذه أوَّل ما فْتِهمُوا هَي الْأمور، أمَّن وَکت إلْلي عیسیٰ إتْمَجَّد، إتْذَکِّرَوا إلْلي هِذِن کِلهِن چانَن مَکْتوبات عَنَّه وَ بي ذاک الشِّکِل هَم چانُوا عَاملین بیه.

17جَماعه إلْلي چانُوا مَعَ عیسیٰ بي وَکت إلْلي نادَیٰ ایلعازَر مِن الْگَبُر وَ گَوَّمه مِن الْمُوتیٰ، بَعَدهُم چانُوا یِشِهدون عَلَیٰ هِل واقِعه. 18چِثیر مِن النَّاس هَم بي هِل سَبَب أستَقبِلُوه، لِأن چانُوا سَامعین هِیچ نِیشان ظَهَر مِنَّه. 19چَا فِرقَة الْفَریسیین واحَد گِل لِلْآخَر: «شوفوا إلْلي ما تُوصلون مَکان؛ باوعوا إلْلي کِل الْعالَم تَابعینه.»

الْیونانیین طالبین زیارَة عیسیٰ

20بِین أشخاص إلْلي چانُوا یَایین لِلْعِباده بي الْعید، بَعَض مِنهُم چانُوا یونانیین. 21ذاکول إیَّوا عِند فیلیپُس، إلْلي چان مِن أهَل مَدینَة بَیت صِیْدا الَّذي بي مَنطَقة الْجَلیل، وَ گِلولَه: «یا سِیِّدنا، إنرید إنْشوف عیسیٰ.» 22فیلیپُس إیّه وَ گال لِآندریاس، وَ أثْنَینهُم راحُوا گِلُّوا لِعیسیٰ. 23عیسیٰ گِلهُم: «وُصلَت ساعه إلْلي یِتْمَجَّد ابن الْإنسان. 24بِالْحَق، بِالْحَق، أگِلکُم، لُو حَبِّة الْحُنطه ما تْطیح بي الْگاع وَ ما تْموت، إتْضُل وَحَدها؛ أمَّن لُو إتْموت چِثیر تِثْمَر. 25أحَد إلْلي یِحِب نَفسه، یِخسَرها. أمَّن کِلْمَن بي هِل عالَم یِکرَه نَفسه، یِحفَظها لِحَیَاة الْأبَدیَّه. 26ذاک إلْلي یِرید یِخدِمني، کون یِتْبَعني؛ وَ مَکان إلْلي أنا مُوجود، خادمي هَم إیکون موجود. شَخُص إلْلي یِخدِمني، أبوي راح یِرفَع رَأسه.

عیسیٰ یِتکَلَّم مِن مُوتْته

27«هَسّه نَفسي مِتوَتره. شِگول؟ ”یا أباه! نِجّیني مِن هَي السَّاعه“؟ أمَّن لِهِل قَصِد وُصَلِت لِهَي السَّاعه. 28یا أباه! مَجِّد أسمَک!» بَعدِین إیّه صُوت مِن السَّماء إلْلي: «مَجَّدِت وَ بَعَد هَم أمَجِّد.» 29چَا نَاس إلْلي چانُوا أهناک وَ سِمْعَوا هَي، گالُوا: «چان رِعید.» الْآخَرین گالُوا: «فِرِد مَلاک حاچَه.» 30عیسیٰ گال: «هَذا النِّداء ألکُم چان، مو ألي. 31هَسّه وَکت الْقَضاء عَلَیٰ هَذا الْعالَم؛ هَسّه رَئیس هَذا الْعالَم یِنذَب بَرّا. 32وَ أنا وَکت إلْلي أنرُفُع مِن الْأرض، أسحَب الْجَمیع صُوبي.» 33هُوَّ بي هَذا الْحَچي، چان یِأَشِّر عَلَیٰ طَریقَة مُوت إلْلي چانَت تِنتَظره. 34النَّاس گالُوا: «مِثِل ما سِمَعنا مِن التُّورات، مَسیح الْمُوعود یُبقیٰ لِلْأبَد، چَا إشلون إتگول ابن الْإنسان کون یِنرُفُع؟ یاهو ابن الْإنسان؟» 35عیسیٰ گِلهُم: «لِحَد وَکِت قَلیل، النّور مَعَکُم. چَا لِحَد وَکت إلْلي عِندکُم النّور، إمشوا، خاف یِغَطّیکُم الظَّلام. ذاک إلْلي یِمشي بي الظَّلام، ما یِدري وَین ایروح. 36لِحَد وَکت إلْلي مَعَکُم النّور، آمِنوا بي النّور خاطِر إتْصیرون أولاد النّور.»

عَدَم إیمان النَّاس

وَکت إلْلي گال هَذا الْحَچي، راح مِنَّاک و أختِفیٰ عَنهُم. 37مَعَ هَذ إلْلي عیسیٰ ظَهَر نِیاشین چِثیره جِدَّام أعیونهُم أمَّن ما آمِنُوا بيه. 38بي هِل شِکِل کَلام إشعیَاء النَّبي إتْحَقَّق إلْلي چان گایِل:

«یا رَب، یاهو، إمْأَجِّن رِسالِتنا،

وَ إذْراع الرَّب عَلَیٰ مِن إنْکِشَف؟»

39مِثِل ما إشعیَاء النَّبي، هُوَّ بي غِیر مَکان چان گایِل، ذاکول ما گِدْرُوا یُؤمِنون، لِأن:

40«ذاک عامي أعیونهُم

وَ عاصي گُلوبهُم،

خاطِر لا یِشوفون بي أعیونهُم،

وَ لا یِفتَهمون بي گُلوبهُم،

وَ لا یِرِجعون لِأشفیهُم.»

41إشعیَاء بي هِل سَبَب گال هَي إلْلي شاف مَجده وَ تِکَلَّم عَنَّه.

42مَعَ هَذ کِلَّه، حَتَّیٰ چِثیر مِن کُبار الْقُوم هَم آمِنُوا بي عیسیٰ، أمَّن مِن خُوف فِرقَة الْفَریسیین، ما قَرَّوا بي إیمانهُم، خاف یِطَردونهُم مِن مَحل عِبادَة الْیَهُود. 43لِأن چانُوا یِحِبّون تَمجید النَّاس أکثَر مِن تَمجید الْإلَه.

44بَعدِین عیسیٰ نادَهُم وَ گال: «کِلْمَن یُؤمِن بیِه، مو مُؤمِن بیِه، بَل مُؤمِن بي الْإموَدّیني. 45کِلْمَن شافني، شایِف الْإموَدّیني. 46أنا یَاي بي الْعالَم بي مَقام نور خاطِر کِلْمَن یُؤمِن بیِه، ما یِضُل بي الظَّلام. 47لُو أحَد یِسمَع کَلامي، أمَّن ما یِطیعَه، أنا ما أحکُم عَلِیه؛ لِأن ماني یَاي خاطِر أحکُم عَل عالَم، بَل یَاي خاطِر أنِجِّحْهُم. 48شَخُص إلْلي ما یِقبِلني وَ ما یِقبِل کَلامي، اکو ألَه حاکِم آخَر؛ ذاک کَلام إلْلي گِلته، هُوَّ یِحکُم عَلِیه بي یُوم الْأخیر. 49لِأن أنا ما إتْکَلَّمِت مِن نَفسي، بَل أبوي إلْلي وَدّاني أمَرني شِگول وَ مِن شِنهي أتکَلَّم. 50وَ أنا أعرُف إلْلي أمرَه هُوَّ حَیَاة الْأبَدیَّه. چَا شي إلْلي أنا أگوله تَماماً مِثِل شي إلْلي أبوي گاله خاطِر أگوله.»

Currently Selected:

إنجیل یُوحَنَّا 12: ACM

Highlight

Copy

Compare