أعمال الرُّسُل 19
19
پولُس بي أفِسُس
1وَ أمَّن وَکت إلْلي آپولس چان بي مَدینَة قُرنتُس، پولُس بَعَد ما عِبَر مِن نَواحي الْمَرتَفعه، وُصَل إلَیٰ مَدینَة أفِسُس. اهناک لِگالِّه چِم تَلمیذ 2وَ سِئَل مِنهُم: «هَلْ وَکت إلْلي آمَنتوا، حَصلتوا روح الْقُدُس؟»
گالوا: «إحنَا حَتَّیٰ ما سِمَعنا إلْلي روح الْقُدُس موجود.»
3گال ألهُم: «چا شِنهو مِن تَعمید تِعَمِّدتوا؟»
گالوا: «تَعمید یَحیَّیٰ.»
4پولُس گال: «تَعمید یَحیَّیٰ، چان تَعمید التَّوبه. هُوَّ چان ایگول لِلنَّاس آمَنوا بي ذاک إلْلي مِن بَعدي ایّي، یَعني بي عیسیٰ.» 5مِن سِمعَوا هَي، تِعَمِّدوا بي أسم عیسیٰ الرَّب. 6وَکت إلْلي پولُس حَط إید عَلِیهُم، نِزَل عَلِیهُم روح الْقُدُس، بي شِکِل إلْلي گامَوا یِحچون بي غِیر لُغات وَ تِنَبَّأَوا. 7ذاکول الْزِلِم، چانُوا جِریب أثْنَعَش شَخُص.
8بَعدِین پولُس راح لِمَحَل عِبادَة الْیَهُود، أهناک ثِلِث تِشهُر بي جُرأه چان یِتْکَلَّم وَ یِتْباحَث عَن مَلَکوت الْإلَه وَ یَاب ألهُم دَلائِل مُقنِعَه. 9أمَّن بَعَضهُم چانُوا یِعاندون وَ ما یؤمَنون وَ جِدَّام عِین الْجَمیع چانُوا یِشِتمون ”أهل الطَّریقه“. چا پولُس إتْبَعَد مِنهُم وَ أخَذ الْتِلامیذ مَعَه وَ کِل یُوم چان یِباحِث وَ یِتْکَلَّم بي مَجلس تیرانوس. 10تَعَدِّن سِنتین بي هِل شِکِل وَ بي هِل مُدَّه، کِل ساکنین أیالَة آسیا، إش یَهُود وَ إش یُونانیین، سِمعَوا کَلام الرَّب.
أولاد إسکیوا
11الْإلَه بي إید پولُس چان یِظهَر مُعجِزات مُحَیرَّه، 12بي شِکِل إلْلي النَّاس دیسامیل وَ أگماش إلْلي چان لامِس جِسمه، چانُوا یَأخذونهِن لِشَفاء الْمَرضیٰ وَ أمراضهُم چانِت تِشفیٰ وَ تِخرَج مِنهُم أرواح الْخَبیثه.
13چَا بَعَض مِن الْیَهُود إلْلي چانُوا مُخرجین الْجِنُون هَم سِعَوا یِسِمون أسم عیسیٰ الرَّب عَلَیٰ أشخاص إلْلي چان بيهُم أرواح خَبیثه. ذاکول چانُوا یِگولون: «إنْحَلِفکُم بي ذاک عیسیٰ إلْلي پولُس یِخطَب بيه!» 14أشخاص إلْلي هِیچ چانُوا یِعِملون، چانُوا سِبِع أولاد إسکیوا إلْلي چان واحَد مِن کُبار کاهَنین الْیَهُود. 15أمَّن روح الْخَبیثه چانَت إتگول: «أعرَف عیسیٰ وَ أعرَف پولُس هَم، أمَّن أنتُم یاهُم؟» 16چا زِلمه إلْلي چانَت بیه روح الْخَبیثه هِجَم عَلِیهُم وَ بي شِکِل ضَرَبهُم وَ فاز عَلِیهُم إلْلي شِردَوا مِن ذاک الْبَیت عَریانین وَ مَجروحین.
17وَکت إلْلي کِل ساکِنین أفِسُس، إشْ یَهُودی وَ إشْ یُونَاني، عِلمَوا بي هَذا الْأَمُر، صار بیهُم خوفه، بي شِکِل إلْلي مِن بَعَدها چِثیر چانُوا یِحتَرمون أسم عیسیٰ الرَّب. 18و چِثیر أشخاص إلْلي آمِنَوا، تِقَدِمَّوا وَ عَل مَکشوف أعتِرفَوا بي أعمالهُم. 19چِثیرین هَم إلْلي مِن گَبُلها چانُوا سَحاحرَه، یَابُوا کِتاباتهُم وَ حِرگوهِن جِدَّام الْجَمیع. وَکت إلْلي حِسبَوا سِعر الْکُتُب چان خِمسین ألف دِرهَم. 20بي هِل شِکِل، کَلام الرَّب چان یِنتِشَر وَ یِقوَّیٰ.
21بَعَد هِل وَقایِع، پولُس بي روح الْإلَه قَرَّر إلْلي مِن طَریق إیالَة مَقدونیه وَ أَخائیه، یِرجَع لِأورشَلیم. چا گال: «مِن بَعَد روحتي لِهناک، کون أزور روم هَم.» 22بَعدِین وَدَّه أثنَین مِن مُعَاوِنینه، تیموتائوس وَ إراستوس إلَیٰ مَقدونیه وَ هُوَّ بُقَیٰ مُدَّه بي أیالَة آسیا.
أغتشاش بي أفِسُس
23بي هَذا الْزَمان، صَار أغتشاش چِبیر عَن ”أهل الطَّریقه“. 24فِرِد صائِغ فِضَّه بي أسم دیمیتریوس إلْلي یِصنَع تِماثیل مِن فِضَّه مِن آرتِمیس وَ مِن هِل طَریق چان إمْوَصِّل رِبِح چِثیر لِأهل الْصَناعه، 25جِمَع هِذول وَ کِل أهل هَي الْصَناعه وَ گال ألهُم: «یا ساده، تِدرون إلْلي هَي الْشُغله، سَبَب زِیادَة کِسِبنا. 26أمَّن مِثِل ما تِشوفون وَ تِسِمعون، هَذ پولُس مو بِس بي أفِسُس، بِل تَقریباً بي کِل آسیا، إمْقِنَع وَ زالِف چِثیرین، هُوَّ ایگول الْآلِهه إلْلي إنصِنعَن بي إید الْبَشَر ماهِن آلِهه. 27چا هَذا الْخَطَر أکو إلْلي مو بِس کِسِبنا یِقِل، بِل هَذ مَعبَد إلَهِتنا الْچِبیره آرتِمیس هَم یِحقَر وَ هیَّه تِفقِد عَظَمتها إلْلي تِنْعِبِد بي کِل آسیا وَ الدِّنیا.»
28وَکت إلْلي سِمعَوا هَي، بي شِدَه غِضبَوا وَ صاحَوا إلْلي «عَظیمه هیَّه آرتِمیس الْأفِسُسیین!» 29صارِت شوشه بي کِل الْمَدینه! النَّاس مِتَحده هِجمَوا صوب مِیدان الْمُبارات وَ خِذَوا مَعَهُم گایوس وَ آریستارخوس سَحِل، إلْلي چانُوا مِن أهل مَقدونیه وَ مِن مُتابِعین پولُس. 30پولُس راد یِدخُل بِین الْجِمعیَّه، أمَّن الْتَلامیذ ما خِلَّوا. 31حَتَّیٰ بَعَض مِن مَقامات أیالَة آسیا إلْلي چانُوا مِن أصحابه، وَدّولِه رِسَاله وَ رادَّوا مِنَّه لا یِحَط ریلِه بي مِیدان الْمُبارات.
32الْجَمعیَّه چانَت غاضبه. الْکِل چانُوا یِصیحون وَ کِلمَن چان ایگول شي وَ أکثر النَّاس ما چانَت تِدري إلمِن یَایه. 33الْیَهُود، چانُوا دافعین اسکندر جِدَّام، وَ بَعَض مِن بِین الْجَمعیَّه چانُوا یِنطونه أوامُر. هُوَّ أشَر ألهُم بي إیده وَ رادهُم یِسِکتون وَ سَعَیٰ یِعرُض دفاعیه. 34أمَّن وَکت إلْلي النَّاس عَرفوه یَهُودي، کِلهُم بي فِرِد صوت حُدود ساعتین صاحُوا: « عَظیمه هیَّه آرتِمیس الْأفِسُسیین!»
35بي الْأخیر، ناطور الْمَدینه سِکَّت الْجَمعیَّه وَ گال: «یا زِلِم أفِسُس، یاهو إلْلي ما یِعرُف مَدینة أفِسُس إلْلي هیَّه حارِسَة مَعبَد آرتِمیس الْچِبیره وَ تِمثالها إلْلي نازِل مِن السَّماء؟ 36چا چِن هَي الْحَقایق ما تِنِّکُر، کون تِهدون وَ بي عَجِله لا تِعِملون شُغله. 37هِل زِلِم إلْلي یِبتوهُم أهنا، ما سِرقَوا مِن مَعبَدنا وَ لا کُفرَوا بي إلَهِتنا. 38چا لو دیمیتریوس وَ زُمَلائه الْصُناع عِندهُم شِکایه مِن أحَد، بیبَان الْمَحکمه مِفتوحه وَ الْوالیین هَم حاضرین. یِگِدرون یَأخذون شِکایتهُم أهناک. 39أمَّن لو عِندکُم مِسئَله أخریٰ، کون إتحِلونها بي جِلِسات مَجلِس الْمَدینه. 40لِأن خاف إلْلي لِخَاطِر وَقایِع الْیُوم، نِنتِهِم بي الْشوشه. لو هِیچ ایصیر ما بینا إنیِّب عِذَر لِهِل أغتشاش.» 41گال هَي وَ فَرَق الْجَمعیَّه.
Currently Selected:
أعمال الرُّسُل 19: ACM
Highlight
Share
Compare
Copy
Want to have your highlights saved across all your devices? Sign up or sign in
©️2024 Korpu Company
