أعمال الرُّسُل 18
18
پولُس بي قُرِنتُس
1مِن بَعَد هَي، پولُس تَرَک مَدینة آتِن وَ راح لِمَدینة قُرِنتُس. 2أهناک إتعَرَّف عَلَیٰ زِلمه یَهُودي بي أسِم آکیلا، مِن أهالي پونتوس إلْلي تُوّا چان یَاي مَعَ مَرته پْریسکیلا مِن ایطالیا، لِأن کْلودیوس الْقِیصَر چان آمُر إلْلي الْیَهُود کِلهُم یِتُرکون روم. پولُس راح لِزیارِتهُم، 3وَ مِنَّاک إلْلي شُغُلته چانَت تَصنیع الْخیَم، ضَل عِندهُم وَ گام یِشتُغُل. 4هُوَّ کِل شَبّات چان یِتْسائِل وَ یِتْباحَث مَعَ الْیَهُود وَ الْیونانیین بي مَحَل الْعِباده وَ چان یِسعَیٰ یِقنَعهُم.
5وَکت إلْلي سیلاس وَ تیموتائوس إیَّوا مِن مَقدونیه، پولُس حَط کِل وَکته لِلْوَعظ وَ چان یِبَشَّر الْیَهُود إلْلي عیسیٰ هُوَّ مَسیح الْمُوعود. 6أمَّن وَکت إلْلي خالِفُوه وَ شَتِّمُوه، لِلْإعتِراض نِکَت إتراب عَبایته وَ گِلهُم: «دِمکُم بي رُگبِتکُم! أنا بَريء مِنَّه. مِنَّا وَ هِیچ، أروح عِند الْغِیر یَهُود.» 7بَعدِین غَیَّر مَکانه مِن مَحَل الْعِباده وَ راح لِبَیت تیتوس یوستوس إلْلي چان شَخُص إلْلي یِعبِد الْإلَه وَ بَیته چَان لاصِگ بي مَحَل الْعِباده. 8أمَّن کْریسپوس، رَئیس مَحَل الْعِباده، مَعَ کِل أهِل بَیته آمِنُوا بي الرَّب. وَ هَم چِثیر مِن أهالي قُرِنتُس مِن سِمعَوا الرِّساله، آمِنُوا وَ إتعَمِّدُوا.
9فِرِد لِیله الرَّب بي الْرُؤیَاء گال لِپولُس: «لا تْخاف! إتکِلِّم وَ لا تِسکِت! 10لِإن أنا مَعَک وَ ما أحَد ایمِد إیده عَلِیک خاطِر یِأذّیک، چِن عِندي نَاس چِثیره بي هَي الْمَدینه.» 11چا، پولُس سِنه وَ نُص ضَل أهناک وَ عَلِّمْهُم کَلام الْإلَه.
12أمَّن وَکت إلْلي گالیو چان والي أَخائیه، الْیَهُود إتَّحدَوا وَ هِجمُوا عَلَیٰ پولُس وَ سِحلوه لِلْمَحکَمه، 13وَ گالُوا: «هَذا الْشَخُص یِجبُر النَّاس إلْلي یِعِبدون الْإلَه خَلاف الشَّریعَه.»
14مِن پولُس راد یِحچي، گالیو گال لِلْیَهُود: «لُو چان جُرم لُو جِنایه، چان صار عَندي دَلیل أسمَع شِکوَتکُم. 15أمَّن لِأن الْمُوضوع عَلَیٰ کَلِمات وَ أسامي وَ شَریعَتکُم، چا أنتُم حِلّوها. أنا ما أرید أقضي عَلَیٰ هِیچ أمور.» 16چا طَرَدهُم مِن مُقابیل کُرسي الْقَضاء. 17ذاکول هَم کِلهُم هِجمُوا عَلَیٰ سوسْتِنِس، رئیس مَحَل الْعِباده وَ ضُربُوه جِدَّام کُرسي الْوالي. أمَّن گالیو أبَد ما أهتَم.
رَجعَة پولُس لِأنطاکیه
18پولُس بَعَد إقامه طَویله بي قُرِنتُس، وَدَّع الْخُوّان وَ مِن طَریق الْبَحَر راح لِسوریه. بي هَي السَّفره، پْریسکیلا وَ آکیلا هَم چانُوا مَعَه. هُوَّ بي کِنخْریه زِیِّن رَأسه، لِأن هِیچ چان نَاذِر. 19مِن وُصلَوا لِأفِسُس، تَرَک ذاکول إلْلي چانُوا إمْسافرین مَعَه وَ هُوَّ راح لِمَحَل الْعِباده وَ تِباحَث مَعَ الْیَهُود. 20طُلبُوا مِنّه مُدّه أکثَر یِضُل مَعَهُم، أمَّن ما قِبِل 21وَ وَدَّعْهُم وَ گال: «لُو الْإلَه ایرید بَعَد هَم أیّي یِمکُم.» بَعدِین رُکَب الْمَرکَب وَ تَرَک أَفِسُس. 22بي الْقِیصَریّه نِزَل مِن الْمَرکَب وَ راح لِأورشَلیم وَ مِن بَعد ما زار الْکِلیسه، مِشه لِأنطاکیه. 23مُدّه ضَل أهناک وَ بَعَد هَم راح لِلْسَفَر، چان یِفتَر بي کِل مَنطقَة غَلاطیه وَ ناحیَة فْریجیه وَ چان یِقَوّي التِّلامیذ.
آپولُس بي جُرأه یِتکَلَّم بي أفَسُس
24بي ذِکِن الْأیَّام، شَخُص یَهُودي، بي أسِم آپولُس، مِن نَاس إسکَندَریّه، إیّه لِأفِسُس. هُوَّ چان حَچاي مُحترَف وَ چان عِنده عِلِم چِثیر مِن کُتُب الْمُقَدَّسه؛ 25چان مِتعَلِّم بي طَریق الرَّب وَ چان یِتکَلَّم بي حَماس الرّوح وَ بي دَقّه چَان ایعَلِّم عَن عیسیٰ، وَلُو بِس چان عِنده عِلِم مِن تَعمید یَحییٰ. 26هُوَّ بي جُرأه إبتَدَء بي الْتَکَلُم بي مَحَل عِبادَة الْیَهُود. مِن پْریسکیلا وَ آکیلا سِمعَوا کَلامه، خِذُوه لِبَیتهُم وَ بي دِقّه أکثَر عَلِّمُوه طَریق الْإلَه.
27وَکت إلْلي آپولُس قُصَد یِسافِر لِإیالَة أَخائیه، الْأخوَه شَجِّعُوه وَ کِتبُوا لِلْتِلامیذ إلْلي یِستَقبِلونه بي شَعَف. آپولُس مِن وُصَل أهناک، أشخاص إلْلي بي واسِطة لُطف الْإلَه چانُوا إمْآمنین، ساعَدهُم چِثیر. 28لِأن جِدَّام الْکِل چان یِتباحَث مَعَ الْیَهُود وَ چان یِرفُض عَقایِدهُم بي دَلائِل قَویّه، وَ مِن کُتُب الْمُقَدَّسه چان یِثَبِّت إلْلي عیسیٰ هُوَّ مَسیح الْمُوعود.
Currently Selected:
أعمال الرُّسُل 18: ACM
Highlight
Share
Compare
Copy
Want to have your highlights saved across all your devices? Sign up or sign in
©️2024 Korpu Company
