1Samweli 24
24
Daudi ammbone ikia Sauli
1Sauli pajakelubuka kuhuma kukomana na Apilisti, bumpwagila ana Daudi jubii ku mbuga juku Engedi. 2Ndienu, Sauli jaajukua alonda elupu itatu bajahangwi bababii nganganganga nakanopi kuhuma mu nndema gwoti guku Izilaeli, jajenda kuntaputa Daudi na bandu baki pandu pabapakema malibu ga holoku. 3Sauli pajabiya jutenda kuboka, jahika ku likolu limu lelabii pambipi ni kisisi si likondoo, jajingala homu mu likolu ili kulijangati. Daudi na bandu baki babiya atemi nkati ngani ji likolu heli. 4Bandu baka Daudi bapwaaga, “Lisoba lela lejugupwagila Bambu Sapanga kubanga jiihika ili kuguhenga gwaawesa abaja baku nawehapa wanhengila egwibona sapi, lelenu juhikiki.” Ndienu Daudi annzendila Sauli mbolimboli kuhuma mu nyuma, jasekula lupeta lwi ingobu jaki. 5Daudi wabina mwoju waki ndaba jasekwi lupeta lwii ingobu jaka Sauli sanga mweni kumanya. 6Jaapwagila bandu baki, “Bambu Sapanga jumbengaliya, niinhenga lihengu ngati heli kwaka bambu wangu joampaki mahuta na Bambu Sapanga. Niihenga lihengu ngati heli palongi jaka mundu jojuwe Bambu Sapanga annzakania mahuta ili jubiya bambu nkolongu.” 7Kwa malobi haga, Daudi jaakolua bandu baki baanhenge liyaa Sauli. Jaakana bantenda sindu.
Ndienu Sauli jajema, nukupita mu likolu jaendaliya na sapwali jaki. 8Mwenikatai, Daudi najombi jajumuka, japita mwi likolu nukunkema Sauli, “Bambu wangu, bambu nkolongu!” Bambu nkolongu Sauli pajalinga munyuma, Daudi japega magoti, nukujinama mbaka pai ili kutende isima Sauli. 9Ndienu ampwagila, “Ndaba ja kii waajoanee bandu babugupwagi, ‘Linga! Daudi jupala kuguhenga liyaa?’” 10Henu linga lelenu gubweni kwa miu gaku wamweti, pawabii ku likolu Bambu Sapanga janyangatiya nuguwesa. Bandu bangi bambwagila nugukoma, lakini nenga nugubonila ikia. Napwaaga nganuguhumisi wa bambu wangu ndaba wehapa huhaguliwi na Bambu Sapanga sukugujakanii mahuta. 11Mwaatati bangu, nndinga kipandi si ingobu jaku mu kuboku jangu, senzekwi mwiingobu jaku sanga kugukoma, guwesa henu kumanya ana sakaka kwa nepani nga nu mmbaja wala ngasenutende giliya. Nepani ngasenuguhengi kihakau lakini wehapa gundaputa gungoma. 12Bambu Sapanga juamua kati jangu na wehapa. Jombi jugulepa kisasi lakini nepani nganuguhumisa. 13Kombuka misali ja mwandi jejipwaaga, Kuhuma kwa bandu biliya gapita mahengu giliya. Lakini nepani nganuguhenge sindu sokapi siliya. 14Wehapa wabambu nkolongu juku Izilaeli linga mundu jogupala kunkoma! Boo, ndaba jakii gumpwatali na mundu ngati nenga? Nepani mii pe ngati jimbwa jejikuike au lihonzu! 15Ndienu, Bambu Sapanga nu jubiya mundu jukuamuu kati jangu na wehapa. Jombi ndi julilingaliya lijambu heli, jungengaliya nukunhoko kuhuma mu maboku gaku.
16Daudi pajajomula kupwaaga, Sauli japwaaga, “Boo sakaka lee wa Daude?” Sauli jalela kwa sauti. 17Ndienu ampwagila Daudi, “Wehapa guhenga gagapalika kupeta nepani, gunepi gaammboni, jenipe nepani nuguhengi giliya. 18Lelenu gulangi namuna egubii waamboni kwangu. Ngasewangomiki hata ngati Bambu Sapanga janhenga gunhwesa. 19Boo, ana mundu ankamwi mbaja waki juwesa kundeka jujenda sape? Kwa legunhengi, Bambu Sapanga jugupengaliya lelenu! 20Ndienu, manyiki kubanga sakaka wibiya wa bambu nkolongu juku Izilaeli nu ubambu ukolongu waku wiitenda kugangamaliswa pai ju ulongosi waku. 21Lakini gunapila kwaka Bambu Sapanga, kubanga ngawailapu ibeleku yangu, wala kwaputa liina langu kuhuma mu ulongu wa atati bangu.” 22Daudi anndapila Sauli.
Ndienu Sauli jakelubuka panyumba jaki lakini Daudi na bandu baki bajenda pandu paajoba.
Currently Selected:
1Samweli 24: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
