1Samweli 23
23
Daudi juokoo musi uku Keila
1Ndienu Daudi ampwagila, “Joaninya, Apilisti akomana na bandu ba musi uku Keila na anyaga ilebi mwi ibanza yu kupete inganu.” 2Ndienu, Daudi anndoba Bambu Sapanga malobi, “Boo, nyenda nakakomana na Apilisti hababa?”
Bambu Sapanga jajibua, “Hena, jenda wakakomana na Apilisti na ukugukombola musi uku Keila.”
3Lakini bandu baka Daudi bumpwagila, “Ana tubii pamba pa Yuda tutenda kujogopa ndaba Sauli juwesa kuhika kutulapula, kwibiya boo ana tupiti ku Keila na kukomana na alonda buku Pilisti?” 4Ndienu, Daudi anndoba kabee Bambu Sapanga, najombi Bambu Sapanga ampwagila, “Jumuka gujenda ku Keila ndaba naagujangatiya waawesa Apilisti.” 5Ndienu, Daudi jajenda ku Keila pamu na bandu baki, na koni jakomana na Apilisti bingi nu kukamuu ng'ombi hingi. Ndienu Daudi jaokua bandu buku Keila.
6Abiazali, mwana waka Ahimaleki, pajatilila kwaka Daudi ku Keila, jajenda ni kizibau suku nngolu.
7Sauli pabumpwagila kubanga Daudi juhiki ku Kelila, japwaaga, “Sapanga anhengiki nunhwesa ndaba jilipungi mweni sukujingi mu musi gogubii nu lumatu na matanga gagabii na makomeu.” 8Ndienu, Sauli jaakema alonda buku Keila nu kukomana nabu, ili kumpengale Daudi pamu na bandu baki.
9Daudi pajajoa mipangu jiliya kupete jombi, ampwagila nngolu Abiazali, “Leta pamba kizibau saka nngolu.” 10Ndienu Daudi jaloba, “Mwaa Bambu Sapanga, Sapanga jwa Aizilaeli, sakaka nepani ntumisi waku, nyoini ana Sauli jupanga kuhika musi uku Keila ndaba nepani mi pamba. 11Boo, bandu buku Keila biimbelika kwake? Boo Sauli jitenda kuhelela, ngati ntumisi waku ejajoana? Sapanga jwa Aizilaeli mpwagila ntumisi waku.”
Najombi Bambu Sapanga japwaaga, “Sauli jiitenda kuhika.”
12Daudi jalalukiya kabee, “Boo bandu buku Keila biitenda kungengale nepani pamu na bandu bangu kwaka Saule?”
Najombi Bambu Sapanga jajibua, “Biitenda kutukamula.”
13Ndienu Daudi na bandu baki babube babiya ngati mia sita, baboka nukujenda pokapi pabawesa kujenda. Sauli pajajoa ana Daudi jutili kuhuma ku Keila, jakotuka kujenda ku Keila.
Daudi mu nndema uku itombi
14Ndienu, Daudi jahigaliya mu lukoba, mu nndema uku itombi yu mwiitengu ja musi uku Zifu. Sauli antaputa kila lisoba, lakini Sapanga anzangatiya Daudi kunhwesa Sauli. 15Daudi jamanya Sauli juhikiki ili kunkoma. Daudi jabiya jutama mu kitengu suku Zifu ku Holeshi. 16Yonasani mwana waka Sauli ampwata Daudi ku Holeshi angangamalisa mwoju nu kupwaaga Sapanga jutenda kugulenda. 17Yonasani ampwagila, “Wijogopa, atati bangu Sauli ngabagupati. Wehapa wibiya wa bambu nkolongu juku Izilaeli, nepani niibiya ndenda kugujangati. Hata Sauli atati bangu jilimanyi lijambu heli.” 18Haba boti abeli, bahenga lilaganu palongi jaka Bambu Sapanga. Daudi jahigaliya ku musi uku Holeshi na Yonasani jajenda kunyumba jaki.
19Sauli pajabiya jakona ku Gibea, bandu buku Zifu bunzendila kumpwagila, “Daudi jujoba mundema witu gogubii na ngomi ku Holeshi, ku itombi ya Hakila, yeibii upandi u kusini guku Yeshimoni. 20Henu, bambu nkolongu guhika ili gunhengila segukipa, ku upandi witu, lihengu litu libiya kumbeka Daudi mu ulongosi waku.”
21Sauli jaajibua, “Mwanganya sakaka monee ikia, Bambu Sapanga jumpengaliya. 22Nnzendaninya, nhakikisa kabee, mmanya pandu pajujoba, na nya joambweni pandu hapa, ndaba ambwagi kubanga jombi ndi nnzanza ngamaa. 23Nndingalakiya kila upandi mmanya pandu pajujobiki, ndienu nnetila majambu goa. Ndienu niijenda pamu na mwanganya ana jibiya jakona hoku, ndienu nepani nantaputa kati ja maelupu goti ga bandu bu nndema uku Yuda.”
24Ndienu, bakelubuka ku musi uku Zifu, bunndonguliya Sauli. Kipindi sehesi, Daudi na bandu baki babiya mu lukoba lwa Maoni, mu ligomba luku Alaba upandi uku kusini guku Yeshimoni. 25Sauli na bandu baki batumbuliya kuntaputa Daudi. Lakini Daudi paampwagila majambu haga, jajenda kujoba ku malibu, gagabii ku kitengu suku Maoni nu kutama hoku. Sauli pajajoa majambu ge haga jajenda kuntaputa Daudi ku kitengu suku Maoni. 26Sauli na bandu baki babiya upandi gumu guku itombi na Daudi na bandu baki babiya upandi gongi guku kitombi. Daudi pajabiya jutila, Sauli najombi jabiya junhegale kunkamuu Daudi. 27Hapa ndi mundu jumu annzendila Sauli nu kumpwagi, “Nhika nnyata Apilisti baakoma bandu bu munndema.” 28Ndienu, Sauli anndeka kumpwatali Daudi, jajenda kukomana na Apilisti. Ndii ndaba pandu jehapa bapakema, “Lilibu lukutila.” 29Daudi jaboka pandu hapa, jajenda kutama pandu pukujoba pi likolu la musi uku Engedi.
Currently Selected:
1Samweli 23: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
