1Samweli 25
25
Kuwa kwaka Samweli
1Ndienu, Samweli jutenda kuwa, nabombi Aizilaeli boti bakusanyika ili kwalobalake. Buntaga panyumba jaki ku Lama.
Daudi na Abigaeli
Egapeta haga Daudi jajenda mu lukoba luku Palami. 2Kwabii na mundu jumu ku musi uku Maoni jojabiya julomba nukulombesa hindu pambipi na musi uku Kalumeli. Japuga makondoo gaki na kwagaseku mangoma. Jabiya mundu jojubii na mali gingi ngamaa, jabiya na makondoo elupu itatu ni imbui elupu jimu. 3Mundu hoju ankema Nabali nu nhwanamundu ankemika Abigaili. Abigaili jabii mmbomba jojubii na malangu na jojunyambiki. Lakini Nabali jabiya mundu jojusuki na jojubii ni inyela kabee jabiya ju lukolu lwaka Kalebu.
Nabali jabiya juseku mangoma ga makondoo ku Kalumeli, 4na Daudi pajabii ku lukoba jajoana Nabali jabii jugaseku makondoo mangoma ku Kalumeli. 5Ndienu jaatuma akakombu komi, jaapwagila, “Nnzendaninya kwaka Nabali ku Kalumeli mukumpwagila malobi gango. 6Mukumpwagila ana Daudi jutenda kugulamuki ana, ‘Lukwali lubiya kwaku, ni kilongu saku na goti gagubi naku. 7Nyoini kubanga ugaseku mangoma makondoo gaku mbala gumanya kubanga alimi baku pababii pamu na twepani, natwepani ngasetwatei sindu siliya. Kabe kipindi soti pababii pamu na twepani ku musi uku Kalimeli, ngasebaajibii sindu sokapi. 8Ana waalaluki bagupwagila akakombu bangu haba ajetakaliwi palongi jaku, ndaba tuhikiki kipindi sa matola. Gupepa koku waapekiya sokapi segubii naku atumisi baku haba nanepani mwana waku Daudi.’ ”
9Akombu baka Daudi bala bajenda kumpwagi Nabali ngati ejaalagalakiya Daudi. Ndienu balendaliya lijibu laka Nabali. 10Ndipala Nabali jaajibua atumisi baka Daudi, “Daudi ndi nyanye? Mwana waka Yese ndi nyane? Masoba gani abii atumisi bingi babaatila aka bambu babu. 11Boo, nyukua mabumunda gangu, masi gangu ni inyama jenaasinzi baaseku mangoma ga makondoo gangu kwaapeke bandu baahiki pamba ngasemanyiki koahuma?”
12Ndienu akakombu baka Daudi bakelubuka nukumpwagi Daudi ejaajibua Nabali. 13Ndienu, Daudi jaapwagila bandu baki, “Kila mundu jukonga upanga waki mukibunu.” Kila mundu jakonga upanga waki, na Daudi jakonga upanga waki, bandu mia nsesi bumpwata Daudi na bandu mia ibeli bahigaliya ni misigu.
14Nkombu jumu jwaka Nabali ampwagila Abigaili nhwanu waka Nabali, “Daudi jaatuma bandu kuhuma ku lungwenza ili kunndamuki bambu witu. Lakini jombi jatenda kwaatondo.” 15Lakini bandu haba babiya baamboni ngamaa kwitu, ngasebutuhumise ni kipindi soti patwaabii naku ku lungwenza ngasebutujibi sokapi. 16Butulenda ikilu na muhi kipindi soti setwabii kwabu tulima makondoo. 17Henu guholaliya sapi lijambu heli liwesa kuleta ngondu kwaka bambu witu na bandu bu munyumba jaki. Jombi Nabali ndi mundu juliya na ngakuba jojuwesa kulonge naku.
18Abigaili jahenga nnyata, jajukua mabumunda mia ibeli ni mipuku mibeli ya ngosi yeitweli divai ni inyama ja makondoo nhwanu jeateliki sapi na kilu saba yi ilombi ikalangi ni ingonyu mia jimu ya zabibu ijomu ni mabumunda ga tini mia ibeli na hindu yoti jiikwea mu maponda. 19Jaapwagila atumisi baki bala, “Longuliya! Nepani ngiti nukujengaliya.” Lakini ngaseampwagi nndomi waki.
20Pajabiya jukwei liponda laki nu juhele pi ligomba li kitombi apalapa jaketangana na Daudi jakahika koni jubii na bandu baki atenda kunhiki upandi waki. 21Daudi jabiya juholale, “Ndaba jaki nabiya nonda mali goka gaka Nabali ku lukoba sanga kupata sindu sokapi na nga sindu saki sokapi sekihobiki, najombi junepiki mabaja kwa gaamboni ganunhengi. 22Sapanga ndi jungoma nepani. Ana kilabu pulukela niibiya ngasenaakomiki akanalomi baki boti.”
23Abigaili paambona pee Daudi, jahelala mala jimu kuhuma kunani ji liponda laki japega magoti nukujinama mbaka pai palongi jaka Daudi. 24Jililekala pa magolu nu kumpwagi Daudi, “Bambu wangu makosa goti gabiya gangu nepani. Gupepa koku nuguloba nongila nawehapa nepani ntumisi waku. Nuguloba gunyoaninya malobi gaka ntumisi waku. 25Wanholale Nabali, jombi ndi mundu jwiliya ndaba elibii liina laki Nabali, ndi najombi ejubi. Jombi ankema Nabali na sakaka ndi mundu nng'ang'a. Bambu wangu akakombu bala pawaatuma, nepani ntumisi waku ngasenaabweni. 26Ndienu Bambu wangu, napa kwaka Bambu Sapanga jojubii mwomi na egubii wa mwomi, kubanga ndaba Bambu Sapanga jugupengalii wiilepesa kisasi sakwakoma nu kupata lawama, waaleka abaja baku na bandu boti babuguholale majambu giliya abiya ang'ang'a ngati Nabali. 27Bambu wangu, nuguloba gujopa nhupi jenze jenuguleti, na waapekiya bandu baku babugupwatiki. 28Nuguloba gunekakiya nepani ntumisi waku. Bambu Sapanga jagupekiya akakilongu baabii nganganganga ndaba wehapa wa bambu wangu, gukomana ngondu yaka Bambu Sapanga. Kipindi soti sukutama kwaku gagupata majambu gokapi giliya. 29Ana kupiti bandu bugupwatalii nu kupala kugukoma, Bambu Sapanga, Sapanga waku, jakulamisa kutama kwaku pamu na baabii bomi. Lakini kutama kwa abaja baku kwihobila kutali, ngati mundu ejuleke lilibu kwa kombeu. 30Bambu Sapanga hejiibia juguhengi gaamboni goti gajugulagi, na kuguhagu kuba bambu nkolongu juku jwa Aizilaeli, 31wehapa bambu wangu, ngawiikubi na sababu jukuligana wala kutemuliwa na mwoju kulengana nu kukoma sanga sababu sukulepa kisasi. Lakini bambu wangu, Bambu Sapanga pajiibiya juguhengi gaamboni, nuguloba gungombuka nepani ntumisi waku.”
32Daudi ampwagila Abigaili, “Julumbalika Bambu Sapanga, Sapanga jwa Aizilaeli, jojugutumiki lelenu kuketangana na nepani. 33Nndumbaliya Bambu Sapanga jojugupeki isima yukumpengale nepani kuba na makosa gukukoma nukulepesa kisasi nepani namweti. 34Sakaka, Bambu Sapanga, Sapanga jwa Aizilaeli, jumbengali ili na guhumisa wehapa. Lakini napa kwaka Bambu Sapanga juku Izalaeli jojubii mwomi ndaba ana nga wakahengiki nnyata kuhika kuketangana na nepani, sakaka kilabu pulukela nga mwanalomi jokapi jwaka Nabali jojakahigaliyaje kuba mwomi.” 35Ndienu, Daudi jajopa hindu yoti yeyuye Abigaili jabiya andeti, ampwagila Abigaili, “Kelubuka kunyumba jaku su lukwali. Linga nepani nagajoini gawapwaga, nu kuloba kwaku nukujopiki.”
36Abigaili pajakelubuka kunyumba, anketaninya Nabali juhenga tipati ngolongu panyumba jaki ngati bambu nkolongu. Nabali jabiya jutogule ngamaa mu mwoju jaki ndaba jabiya julobii ngamaa. Ndienu ngaseampwagila sokapi mbaka pulukela. 37Pulukela Abigaili pajalinga nndomi waki kulobe kwaki kuhengwiki mu mutu, anndandila majambu goa, apalapa Nabali jatenda kutenguka, jabiya ngati lilibu.
38Lisoba la komi mwenikatai, Bambu Sapanga anndapula Nabali jatenda kuwa.
39Daudi pajajoa Nabali jutei kuwa japwaga, “Julumbalika Bambu Sapanga joandepiki kisasi Nabali sukundondo, najombi Bambu Sapanga junyepisi nepani ntumisi waki kuhenga makosa. Bambu Sapanga andepiki Nabali ku ubaja waki.”
Ndienu Daudi jaatuma bandu ili bukunsumbila Abigaili jubiya nhwanamundu. 40Atumisi baka Daudi pabahika kwaka Abigaili ku Kalimeli, bumpwagila, “Daudi jututumiki kugujuku wakabiya gu nhanu waki.”
41Abigaili jajumuka nukupega magoti nukujinama mbaka pai palongi jabu kupwaga, “Nepani ndi ntumisi pena, mii tayali kugolo magolu ga atumisi baka bambu wangu.” 42Abigaili jahenga nnyata jajumuka nu kukwela panani ji liponda laki. Jaboka nu kupwatana na atumisi baki akammbomba nhwanu, jajenda na atumisi baka Daudi, najombi jabiya nhwanu waka Daudi.
43Kabee Daudi anzukua Ahinoamu kuhuma ku musi uku Yezieli. Ndienu boti abeli haba babiya akaahanu baki. 44Kipindi se hesi, Sauli ampia Mikali kamwali waki jojuwe jabiya nhwanu waka Daudi, ili anzukua Paliti mwana waka Laishi, kuhuma musi wa Galimu.
Currently Selected:
1Samweli 25: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
