Taitọs 1

Sịbịpị

1Mịị diri ma ịrị Pọl ḅara saghịḅom, ịrị anịị Tamuno ma ómóniḅọ pịghị Jizọs Krais fịrịmaḅọ, ori i tọọm ḅẹ́ a mú Tamuno sẹlẹakịapụ ma daa karakáráma sị n minini nyáná bẹ ḅara sị pịghị karakárá ma nimi mịẹsị nnị ine ibima Tamuno ma dua, 2mịị karakárá ma ḅụ ḅọ́rọ́ túminị́ tọ́rụ́ dighinyẹ nyánam gbámásó duma nyáná ḅụ, Tamuno ine epeletibịghaḅọ ma mị duma minini wa pịrịm tuminikiri na saghịgha sa, 3anị karakárá sa ori anị diepághámam ori oku ḅụ. Mịma anị ọ saghị i ḅarabie suanyẹ a pịghị dugho wásámam Tamuno wámịna Ḅọ́rọ́maḅọ tọ́ọ i pịrị ḅara.

4Mị diri ma a gịẹ pa Taitọs fịrịmaarị ị́yẹ́ karakárá tụ́wọ wamịnị mamgba nyáná minima ma ḅụ.

Tamuno Daḅọ na Jizọs Krais wámịna Ḅọ́rọ́maḅọ ori tọ́rụ́kụrụkụ́rụ́ na diin pa ọ pịrịị.

Taitọs Nwángịarị Fịrị Krete Ḅụ

5Mịma go anịị a go ị wáriso nyẹ Krete ogbosúányẹ ḅụ, sị ị kọọ sị mịẹ na ibinyẹ mamgba mịẹ fama bẹ ḅara, sị pịghị Tamuno kubiri ogbo ma ḅụ sẹ́nịapụ tọ́ọ ámá gonyẹ́ gonyẹ́ ḅụ. A dugho ị pịrịnyẹ ma pa biekóróma ḅẹ́, 6Tamuno kubiri ogbo sẹnịḅọ anị bịpị ḅụ lánaibịgha tumḅọ, gbẹ́rẹ́ taa ngéré nyánáḅọ, ori awọ pịghị Krais ḅụ mininiapụ. Nnị n nimibịghaa ḅẹ́ nnị kụ́rọ sịbịbie awọ anịgha bịpị pughugha awọ. 7Tamuno kubiri ogbo sịbịdáḅọ anịị Tamuno fịrị ma ḅara fịnịḅọ, ori ma anịị bịpị ḅụ lánaibighaḅọ, opuamịẹnyẹ tumḅọgha, owi tẹ́mẹ́ nyánágha, iru ḅụ tọ́rụ́ḅamaghaḅọ, ama owu ḅẹ́lẹ́maghaḅọ anịgha igbii pụghọ nyánághaḅọ. 8Tụ́ma igoniapụ datérémadi, ibinyẹ ḅẹlẹma ḅọ, ine ḅụ ọlọḅọ, karakárányẹ mịẹarịḅọ, oju pa tọ́ntọ́ ḅụ warịḅọ, ḅụ ọlọ karakárányẹ pịrịḅọ. 9Ọ karakárá ẹ́gẹ́rẹ́ ọlọ kụ́rọ́mabẹm nnị pa o die ḅara, ori ine ọ dawọḅo karakárányẹ ma pa jẹ́apụ die pịghị irimaarịapụ daá tụ́ụ́ma.

10Ḅẹ́ tọghaapụ imi osigha nyáná kụrọnyanáapụ pịrịghaapụ, sị ofori ofori nyẹ dughoarịapụ pịghị mịẹsị jẹ́apụ n minini. Mịma anị jẹa Juuapụ Krais ḅụ ḅo mininimáapụ mịẹarịnyẹ. 11Mịná túminị́ ma árị ḅẹ́ sị n bịpị gbẹm nnị diearịnyẹ ma ḅụ, tegó nnị tọgha wárị gbọrụ daá irimaarị, nnị die na ḅụgbẹ́gha dienyẹ ma ḅụ ḅọ́rọ́. Nnị mịma mịẹarị ḅụ́gịrịrị igbii pụghọ gosi. 12Nna ikiakoroapụ ma ḅụ gbẹ́rẹ́ḅọ dughom ḅẹ́, <<Kreteapụ ma nnị sámámgba epeletiapụ.>> Sịbị kụrọ pirinama fịnị ḅárá anịị n fịnị ḅára, fịrị ịnyọ nyanagha opufịnyẹ fị́fị́apụ. 13Mịị dugho págháma nyẹ ma tụ́manyẹ, anịgo kụrọma igani n pịrị sị nna minini kpain fịnị bẹ ḅara 14sị n mịnị sa nyána ofori ofori Juuapụ lụghụ pịrịbịgha ḅara na pịghị karakárá ma sịghịmaapụ tọ́ọ warị ologho. 15Siiamịẹnyẹ kóróma nyánágháapụ nna tẹ́mẹ́bie nyẹ gonyẹ́ gonyẹ́ ibima fiafiam. Kụ́ma ịlọ́lị kóróma nyánáapụ pịghị Krais ḅụ mininighaapụ, nna tẹ́mẹ́bie na nna kóróma gbẹ́rẹ́sa pilemam. 16Nnị bịpị ḅụ dughoarị ḅẹ́ n Tamuno nimim, kụ́ma nna mịẹnyẹ ḅụ nnị o pighiarị. Mịị túminị́ ma nnị Tamuno ḅụ siiapụ, nnị pịghị ọ bịpị pughugha, nnị ibi pịrị gbẹ́rẹ́ fịrị sọ ofori.

Currently Selected:

Taitọs 1: IBY

Highlight

Copy

Compare