Taitọs 2
2
Pa Tamuno Kubiri Ogbo Ma Diebẹnyẹ
1Kụ́ma ịrị Tamuno karakárá dienyẹ ma na kura dienyẹ ma die. 2Sẹnị owiapụ ma die ḅẹẹ, n tẹ́mẹ́ ọlọ, osigha nyáná nna ḅụ pịrị, ine ḅụ ọlọ, kụ́rọ sẹ nna minini ḅụ, nna ḅẹlẹma ḅụ na pịghị nna ngịrịma ḅụ. 3Anị gbẹ́rẹ́ ḅara ma dugho sẹnị ẹ́rẹ́ámáapụ ma pịrị ḅẹ́ nnị nna ḅụ pa tọ́ntọ́ ḅụ warị ẹ́rẹ́ámáapụ duma kọọ na ibiḅara, n kị́nị́ dughosima ma anịgha omoni sọ iru pịrị kụ́ma nnị ibi nyẹ pa jẹ́apụ die. 4Anịsa nnị ine ẹ́rẹ́awọ ma dighipághámaḅobẹm ḅẹ nnị nna deeapụ na nna awọ ḅẹlẹma, 5nnị ine ḅụ ọlọ, bie fíafía ḅụ fịnị, ibima nna wárị tákubiri, ibitẹ́mẹ́ nyáná, ḅụ sitéréma nna dee pịrịapụ, sị túminị́ sii ẹ́gẹ́rẹ́kọọ Tamuno ḅara saghị ḅo oku ma pịrịbịgha ḅara.
6Anị gbẹ́rẹ́ ḅara ma ásáawọ ma ḅẹẹ, nnị nna ḅụ ọlọ. 7Nyẹ́ gonyẹ́ gonyẹ́ ḅụ, ịḅụ die ḅẹ́ ị sẹ ibiamịẹnyẹ pa tọ́ma bẹnyẹ pịrịm, ị́yẹ́ dienyẹ ḅụ, sẹ karakárá pịrị, pịghị i diearịnyẹ ma pa nyẹ́sị. 8I nyẹ́diearị sáá, túminị́ ine ị dughosimabịgha ibi ẹ́gẹ́rẹ́ pa ị́yẹ́ dienyẹ ma die si ị́yẹ́ iruonaapụ ḅụ́gịrịrị bẹ ḅárá. Tegó nnị ḅara pụnụ nyẹ nyánágha nnị go wa dughosima bẹnyẹ.
9Ómóniapụ die ḅẹ́ nnị ḅụsímínímá nna nyánáapụ pịrị nyẹ gonyẹ́ gonyẹ́ ḅụ pịghị n tẹ́mẹ́ ḅẹlẹma bẹnyẹ mịẹ. Nnị n bịpị pághárabịgha 10anịgha n fúrú. Anịmanakaragha, nnị nna ḅụ die ḅẹ́ nna nyánáapụ ine nna ḅụ biegbánábẹm, mịma ḅụ ḅọ́rọ́ Tamuno wámịna Dụaḅọ́rọ́maḅọ dienyẹ ma kị́nị́mamgba anị ḅẹ́lẹ́mabẹm asọ mamgba ḅụ.
11Ḅẹẹ Tamuno tọ́rụ́kụrụkụ́rụ́ dụaḅọ́rọ́ma akuoarị nyẹ anị ḅụ pa túminị́ mamgba diemam. 12Anị tọ́rụ́kụrụkụ́rụ́ ma diearị ḅẹ́, Tamuno bie ófórigha duma sịghị pịghị tuminikiri ma tọ́rụ ḅẹlẹ sịghị warị ḅụ ọlọ duma kọọ, tụ́ghụ́ sẹ na Tamuno dighi ḅáláfa duma kọọ mị tuminikiri ma ḅụ, 13wa boma éné ma kúruarị sa, wámịna tọ́rụ́ dighinyẹ nyáná éné ma anịị wámịna opu Tamuno na wámịna Dụaḅọ́rọ́maḅọ Jizọs Krais ipine na ḅo bẹ sa. 14Ori ọḅụ pa wa pịrịm sị ori wa duapághámaḅoo bẹ ḅara siiamịẹnyẹ gonyẹ́ gonyẹ́ ḅụ sị mịẹsị wa fíafía, fịnị ori ngéré pịrị túminị́, sị sámámgba dọghụarị ḅẹ́ wa ibifịrị nwángị.
15Mịnanyẹ ma die, ị́yẹ́ sịbịdaa kụ́rọ ma pa n tẹ́mẹ́ kụrọma pịghị igani ị naarịapụ pịrị. Minima gbẹ́rẹ́ḅọ so idighisima.
Currently Selected:
Taitọs 2: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
