2 Timoti 4
4
Pọl Dugho Timoti Pịrịm Ḅẹ́ Ori Ịnyọsua Ori Fịrị Nwángịị
1Tamuno na Krais Jizọs tórúku, ḅẹ́rẹ́kọ dumaapụ na fịịapụ pịrịbẹḅọ tegó ḅẹ ọ pịghị sima ḅoarị sị ḅoo taa ámányánáḅọ ḅara, a kụrọma i ḅẹ́m ḅẹẹ, 2oku ma dugho wásáma, arịị ḅẹ́ ị anị dugho wásámaarị sáá ma karakárá o karakáragha o mịẹsị nnị akanyaḅo, iganịị pịghị nna tẹ́mẹ́ mịẹ kụ́rọ́maá, ị pịghị ngịrịma ḅara pa nyẹ́diearị ḅara. 3Sáá ma ḅoarị túminị́ mịnị birifama karakárá dienyẹ ma pịrịbịgha sáá, nnị nna ḅụ tarị nyẹ duabẹm, sị nyẹ́dieapụ táa tụndụrụma nna ḅụ pịrị, nna biri náa dọghụnyẹ pa n die bẹapụ. 4Nnị nna biri pa jẹ́ angaá wárim nnị karakárányẹ ma náa dọghụgha gosi, tụ́ma birifama lụghụ pughubẹm. 5Kụ́ma, ịrị ịḅụ pa gbẹ́rẹ́ ngaa sẹ́ma warị asọ gonyẹ́ gonyẹ́ ḅụ, inema nyána tọ́rụ́siarị pịrị, ibi oku ma dugho wásámaarị ḅo fịrị ma nwángịị, pịghị ị́yẹ́ fịrị gonyẹ́ gonyẹ́ nwángịị Tamuno ómóniḅọ ḅara.
6Kụ́ma ịrị ma, ị́yẹ́ duma nnị ọsụ saramam sọ ḅọ́rọ́ igwagwaá iru, sáá láamam a mị tuminikiri warisoo bẹ sáá. 7A ibi owu sọmam, mangị ma a mangị mú sịbị lámam, a pịghị minini ma wárịmam. 8Mị́sa sághị bịpị muu karakárá ibiamịẹnyẹ ogunu fịnị ikuruarị anịị Kị́nị́nyánáḅọ ma karakárá ḅẹ́rẹ́kọḅọ ma pa ị pịrịbẹnyẹ anị éné ma, ịrị ngéréghaa, kụma ḅẹlẹma ḅụ ori ḅoo ma kúruarịapụ mamgba.
Pọl Pa Timoti Pịrị Ọḅarakuu Againma
9I ine ḅara mịẹsị álála i damaḅoo.
10Demas mị tuminikiri ma ḅẹ́lẹ́mam gosi ori i kọ́rọ́ma soó Tẹ́salonaika múm. Kresensi soó Galesia múm, Taitọs warị Dalimasia muu. 11Luk ngéré anịị ịrị na fịnịḅọ. Mak akị sị ori na ḅoo tegó ori ine ḅárásua ị pịrịbẹm ị́yẹ́ fịrị ḅụ. 12A Tisikọs fịrịmaa Ẹ́fịsọs múm. 13I ḅo bẹ sáá, a suarị ọgọnọ bịtẹ a wáriso nyẹ Kapọs ḅarabie Troas ḅụ akuoo i pịrị, ị́yẹ́ diri mamgba akuoo, dada nnị nama apara pa mịẹ angaá nyẹ ma.
14Alegizanda tinpotery fịrịnwangịarịḅọ ma kpọma siinyẹ pa ị mịẹm; Kị́nị́nyánáḅọ ọ gbẹ́bẹm ọ mịẹnyẹ ḅụ. 15Ịrị sọ ibima ịḅụ ẹbị ọ fịnị angaá tegó o kụ́rọ ḅara pa wámịna oku ma dasẹ́mam.
16A tarị ḅẹ́rẹ́kọ ḅụ sẹ sáá, gbẹ́rẹ́ḅọ sọ i nana sẹgha, a ḅara na ịḅụ pighim; kị́nị́mamgba i kóróma soom. Tamuno anị kịẹ ọ pịrịmaá! 17Kụ́ma Kị́nị́nyánáḅọ ma ịrị na fịnịm sị pighi ịnyọ pa i pịrịm, anịgosi a ine bifụfụụ́ oku ma dugho wásáma juughaapụ gonyẹ́ gonyẹ́ pịrịm ḅẹ́ n náa; n pịghị i duapághámaḅom ọkụ nama ma bịpịbie. 18Kị́nị́nyánáḅọ i dua pághámaḅobẹm siinyẹ gonyẹ́ gonyẹ́ bie, si diin ḅụ ị́yẹ́ akị sobie ori amadakiri ma muubẹm. Boma ma fịnị ori ma pịrị muu ḅẹsá ḅẹsá láa. Anị ọkọ fịnịị.
Kunema Sịbịpị
19A sịbịpị fịrịma Pirisiliya na Akwila siim na pịghị Onesiforọs wárịapụ. 20Erastọs Kọrịntị ḅụ fịnịm, a warị Trofimọs wáriso Milẹtọs ḅụ ori obikiri ḅụ imim gosi. 21Ị́yẹ́ ịnyọ láa ḅara mịẹsị ḅoo oḅuu sáá ma na kiri laagha sáá.
Eubulusiii, Pudensi, Lainusi na Kilọdia fịrịmam ḅẹ́ a obii, mininiapụ mamgba sọọ obifamam.
22Kị́nị́nyánáḅọ ị tẹ́mẹ́ na fịnịị.
Tamuno tọ́rụ́kụrụkụ́rụ́ ọmịnị kị́nị́mamgba na fịnịị.
Currently Selected:
2 Timoti 4: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
