Hiburuapụ 7

Melkịzedek Igwagwaḅọ Ma

1Mịị Melkịzedek ma ori anịị Salem ámányánáḅọ pịghị opuma sóghólóḅa Tamuno igwagwaḅọ. Ebraham ọ́mụ́gbi ḅụ saghị sọḅoarị, anịị ori ínia ámányánáapụ sọ́ḅá sa, Melkịzedek ọ nana donam warị ọ karịibima. 2Ebraham warị ori akuonyẹ mamgba pa oyia angaá die si gbẹ́rẹ́kiri pa ọ pịrịị. Ẹ́rẹ́ ma, Melkịzedek parị ḅẹarị <<Karakárá ibiamịẹnyẹ Ámányánáḅọ.>> Ori salem Ámányánáḅọ ẹrẹ́sị, ẹ́rẹ́ ma pịghị ḅẹarị <<Diin Ámányánáḅọ>>. 3Melkịzedek ma ọ daa na o nyingi nimiḅọ ofori, anịgha ọrẹ tádọ́apụ, nnị o yii sa, anịgha ọ fịị sa nimiḅọ ofori o Tamuno Tụ́wọ kịkam, ori gbámásó igwagwaḅọ.

4Ị́yẹ́ arịgha ọduḅa la ḅara? Ebraham sọ wa ibima nimi tádọ́ ḅo ọ́mụ́ bie ọ nyánáḅonyẹ mamgba ọ pa oyia kiri diem sị gbẹ́rẹ́kiri pa ọ pịrịm. 5Ólóghó diri ma dughom ḅẹ́ Livai fúroawọ, nna ḅụ igwagwaapụ n gbẹ́rẹ́ angaá daakị oyia kiri ma ḅụ nna mịnaapụ Izirẹlịawọ ḅara, nnị sọ Ebraham fúroawọ mḅẹ́sọ. 6Anị fịnị ḅara Melkịzedek, Livai furoḅọgha, kụ́ma oyia kiri ma ḅụ ọ gbẹ́rẹ́kiri daákịm Ebraham ḅárabie sị Ebraham karịibima, ori ma anịị Tamuno minini pịrịnyẹ ma nyáná ḅoḅọ 7Kị́nị́ bomaarịḅọ dụḅaḅá boma ma daakịarịḅọ nẹngịm, mịma nụ́nányẹ anị bie ofori. 8Igwagwaapụ ma gbolomanyẹ, oyia ngaa ḅụ gbẹ́rẹ́kiri daakịarịapụ ma anịị fịị bẹ túminị́, kụ́ma ori Melkịzedek oyia ngaa ḅụ gbẹ́rẹ́kiri daákịḅọ ma ọ́ dumafịnịbo tọ́ndiri ma dugho ḅara. 9Tumḅọ ine dughobẹm ḅẹ́ Livai mị́sa oyia kiri ḅụ gbẹ́rẹ́kiri daakịarịḅọ ma túminị́ ḅara, oyia kiri gbẹ́rẹ́ ngá gbẹm Ebraham ḅụ ḅọ́rọ́, 10tegó Melkịzedek Ebraham na dona sa, Livai pa ori tádóḅọ Ebraham ḅụbie imi.

Jizọs Melkịzedek Fịnị Ḅara Fịnị Igwagwaḅọ

11Livai furoawọ Igwagwaá fịrị ma ḅụ ḅọ́rọ́ anị Tamuno go mị ólóghó ma pa Izirẹlịawọ pịrịnyẹ. Ḅọ́rọ́ Livai fúroawọ igwagwaá fịrị ma kpain ọkụ́ma, jẹ́ kịrị igwagwaḅọ ḅo na ibighaa Melkịzedek fịnị ḅara fịnịḅọ mịnị Erọn fịnị ḅara fịnị ḅọgha Livai furobie saghị ḅoḅọ. 12Nnị igwagwaapụ ḅụọ ma dima sa, n pịghị ólóghó ma dima naibim. 13Wányánáḅọ n go mịnanyẹ ma dughoarịḅo. Ori jẹ́ túminị́ ọrụ ḅụ saghị ḅoḅọ gbẹ́rẹ́ḅọ so náa igwagwaḅọ soghaa ori túminị́ ọrụ ḅụ. 14Kị́nị́mamgba nimim ḅẹ́ o Juda fúroawọ ḅụ saghịḅom. Mosis ori igwagwaapụ ḅẹ́rẹ́ dughoarị sáá o dughogha ḅẹ́ igwagwaḅọ mị fúro ma ḅụ saghị ḅobẹm. 15Baá mị́sa ḅẹ́rẹ́ ma ḅụ sọmam ḅẹẹ, kịrị igwagwaḅọ ọ ḅụ diepághámamam Melkịzedek fịnị ḅara fịnịḅọ. 16Nnị igwagwaḅọ pa ọ mịẹm, mị igwagwaá ma anị túminị́ ólóghó na túminị́ nyẹ mịẹmịẹ ḅara duagha, kụ́ma anị kunema nyanagha duma ịnyọ ḅụ saghịḅom. 17Tọ́ndiri ma dughom ḅẹẹ,

<<Ị gbámásó igwagwaḅọ sọ́bẹm,

Melkịzedek fịnị ḅara fịnịḅọ.>>

18Olom ólóghó ma n sumaa ngása wárim tegó anị ịnyọ nyanagha pịghị nyẹ́ḅụoforị. 19Mosis ólóghó ma bẹnyẹ bẹnyẹ mịẹ kpainmagha. Kụ́ma mị́sa, ibiḅaa tọ́rụ́ dighinyẹ imi wa ḅọ́rọ́ ine sọma Tamuno damaḅo bẹnyẹ.

20Jẹ́nyẹ, Tamuno ọḅọọ fịịm, kụ́ma ọkọfịnị ọḅọọ ofori nnị isiapụ pa igwagwaapụ mịẹ sa. 21Kụ́ma, Jizọs igwagwaá ma, anị ọ ḅoo na ḅom, Tamuno ọ ḅẹẹ sa ḅẹẹ,

<<Kị́nị́nyánáḅọ ọḅọọ fịmam

ori anị ḅụ ọḅụ daabịgha.

<Ị gbámásó igwagwaḅọ sọ́bẹm.> >>

22Mị ọḅọọ ma gosi, Jizọs ori ọḅụsẹ́ḅọ sọ ibiḅaa ọ́ḅọọ ma pịrịmam.

23Jẹ́ kịrịnyẹ pịghị imi, isi igwagwaapụ ma n fịịm go, n mịnị ine fịrịnwangịgha. 24Kụ́ma Jizọs duma gbámásom ọrẹ igwagwaá fịrị ma pịghị ḅọ́rọ́ mú jụghọ sịbị gbánāgha. 25Anịma go ori ine mị́sa pịghị sámámgba ọḅụ ḅọ́rọ́ Tamuno damaḅoapụ ma duaḅọ́rọ́mam o duma gbámásom gosi Tamuno tẹ́ghẹ̄m nna sịbị ọ́gọ́nọ.

26Jizọs Krais anị wa bii igwagwaalaḅọ, ọ tọ́ntọ́m; sii ọ ḅụ ofori, nnị o fófóomam siiamịẹnyẹapụ bie pịghị ọ saghị sóghólóma so ma nẹ́ngị. 27Ori isi opu igwagwaapụ ma kịkagha, éné gonyẹ́ gonyẹ́ ḅụ ọ parị igwagwaá ọri sii pịrịbịgha, sị pịghị igwagwaá túminị́ ma pịrị, ọ gbẹ́rẹ́ igwagwaá sámámgba pịrịm ori ọrẹ ojumẹnị pa pịrị sa. 28Mosis ólóghó itilaapụ tọọm ḅẹẹ nnị igwagwaalaapụ sọọ, kụ́ma Tamuno mini nyẹ ori ọḅọọ ma na ḅoo nyẹ, ólóghó ma ọḅụju, o Tụ́wọ ma tọọm, n mịẹ kpainma ḅo ákị mú gbámásó láa.

Currently Selected:

Hiburuapụ 7: IBY

Highlight

Copy

Compare