Hiburuapụ 8
8
Ịwọ Óḅọọ Ma Opu Igwagwaaḅọ
1Wa dughoarị nyẹ́mámgba ḅẹarị ḅẹẹ wa ọkọfịnị igwagwaalaḅọ nyánam Opu Tamuno opu imine ma ámáḅara ḅụ kpọrọfịnị ḅo sobie. 2Ori Opu Igwagwaḅọ fịrị nwángịarị tọ́ntọ́ḅa yọ ma ḅụ, anịị tụ́ma tọ́ntọ́ Tamunowarị, Tamuno ọ ḅara na nama nyẹ, túminị́ ḅara pa nama nyẹ́gha.
3Opu Igwagwaaḅọ gonyẹ́ gonyẹ́ n tọ nḅọ pịrịm ḅẹẹ ori agbā mịẹ pịghị nama pa igwagwaá Tamuno pịrị. Wámịna opu igwagwaaḅọ ma anị ḅụ́gbẹm si ori sọ nyáná o pa pịrịbẹnyẹ. 4Ọ ḅọ́rọ́ tuminikiri imi, ori igwagwaḅọ fịrị nwángịbịgha, igwagwaapụ imi sa, Juuapụ ólóghó tọghaapụ ḅẹẹ nnị mị agbā ma mịẹ. 5Nnị nwángịarị fịrị agbamieapụ ḅara, anị dada sobie fịnịnyẹ ma fịnị ḅara fịnịgha kụ́ma anị anịị kịkam. Anị n go Mosis birinụ́nụ́nyẹ ọ tọ́ntọ́ tẹ́ghẹ̄ wárị ma nama dọghụ sáá ḅẹ́ ori, <<Arịị ḅẹ́ nyẹ gonyẹ́ gonyẹ́ ịrị anị mịẹm n pa ị die ḅara opu tụ́ndụ́ ọgọnọ ma ḅụ.>> 6Kụ́ma mị́sa nnị igwagwaḅọ fịrị pa Jizọs pịrịmam, nna angaá nyẹ ma nẹ́ngị nyẹ, anị gbẹ́rẹ́ ḅara ma Jizọs sua gboloma ọḅọọ ma Tamuno na ori a túminị́ ogboku ibiḅam tegó nnị ibiḅaa mini nyẹ ḅụ anị wárim.
7Ḅọ́rọ́ parị ọḅọọ ma ḅẹnyẹ ḅẹnyẹ anị laagha gbẹ́rẹ́ḅọ sọ mmẹẹ́ kárámá ọḅọọ ma dọghụbịgha. 8Kụ́ma Tamuno irima nyẹ dọghụ pághámaḅom ọrẹ a túminị́ ḅụ, ọ ḅẹ́ sa ḅẹ́,
<<Éné ma ḅoarị Tamuno dugho ḅara,
a ịwọ ọḅọọ gịẹ bẹnyẹ
irị na Izirẹlịawọ
na pịghị Juda awọ.
9Anịị a nnị na tádọ́apụ na gịẹ ọḅọọ fịnị ḅara fịnịbịgha.
A ḅara ḅụ n saghị pághámaḅo sa Ijipiti bie,
nnị sẹ́ kụ́rọ a nnị ná fị ọḅọọ ma pịrịgha,
anị ẹrẹ́sị irịsọ a tọ́rụ waghisim n fịnị angaá.
10Kị́nị́nyánáḅọ ḅẹ́m ḅẹẹ mị́sa mị anị a Izirẹlịawọ na fị bẹ ọḅọọ,
ḅoarị sáá, a ị́yẹ́ ólóghó pa nna kúkúbie suabẹm.
A pịghị nna tẹ́mẹ́bie ḅụ gịẹ kórómabẹm.
Ịrị nna Tamuno sọ́bẹm
nnị pịghị ịyẹa túminị́ sọ́bẹm.
11Gbẹ́rẹ́ḅọ sọ amịna mịnaḅọ diebịgha,
anịgha dugho n ḅo na kikiama angaá ḅo pịrị,
<Kị́nị́nyánáḅọ ma nimii.>
Nnị Kị́nị́mamgba i nimibẹm,
nna ḅụ ịrụḅa ḅo akị mú dụḅaḅá ḅo láa.
12A nna sii ḅụ ḅara sị n pịrịbẹm,
a pịghị mịnị nna mịẹ irima pa biekórómabịgha.>>
13Ori ịwọ ọḅọọ ḅẹ́rẹ́ dughoarị sa, Tamuno parị ọḅọọ ma mịẹmam anị olom sị pịghị olom nyẹ gonyẹ́ gonyẹ́ ḅọlọgha sa ḅụ pịghị ẹmẹ fabẹm.
Currently Selected:
Hiburuapụ 8: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
