Hiburuapụ 6

1Anịgo o ḅoo wa tórúku mú sị kpọtẹ́lẹ́ma dáwọ́ nyẹ dawọ, mịnị sii ḅụ pịghị súghúise dawọ nyẹ ma dawọgha túminị́ dighi mú fịị bie suarị nyẹ na Tamuno ḅụ minini nyáná dáwọnyẹ. 2Pịghị mingi sara dáwọ́ nyẹ, pịghị ḅara pa sịbị ḅụ gbánā, pịghị fịị ḅụ saghị, na pịghị gbámásó ḅẹ́rẹ́kọ dawọ nyẹ ma wáriso. 3Wa saghị tórúku mú! Mịma anị wa mịẹbẹnyẹ ḅọ́rọ́ Tamuno mini mini.

4Nnị tọ́rọ́pa ọḅụ pa nna minini gbiapụ akuoo bẹ, sị n sima nna sii ḅụ pịghị? Gbẹ́rẹ́sa biri n Tamuno baá ma ḅụ imi n ḅẹ́lẹ pa sobie dienyẹ ma lámámam pịghị nna diekiri akịm Tọ́ntọ́ ibitẹ́mẹ́ ma ḅụ. 5Nnị ḅara na árịnyẹ ḅụ n nimim bẹ Tamuno ẹ́gẹ́rẹ́ ma ibim, n pịghị ḅoarị sa ma kụ́rọ nimimam. 6Anị ḅụdam mịị bịghịmáa túminị́ ma akuoo sị, n sima sii ḅụ pịghịị, nna mịẹnyẹ ma diearị ḅara ḅẹ́, nnị mmẹẹ́ kárámá sáá ḅụ, Tamuno Tụ́wọ ma báupálịarị, warị pịghị ọ pa opu ḅụ́gịrịrị bie sua.

7Tamuno kiri ma boma bomam anị ḅụ koroarị iti ma menịarị nyẹ, pịghị mịẹsị dipinyẹ sẹnị págháḅo nyẹ dipiapụ pịrị. 8Kụ́ma anị ḅọ́rọ́ nangi na owi ányị́nyá pághámaḅo nḅẹḅẹ́, anị ḅẹnyẹ ḅẹnyẹ ḅụ ofori, anị Tamuno si fị́lā pa pịrị ḅẹnyẹ sọ́bẹm si kunema nnị fịnị pa anị dọ́ghụ́ma.

9Ị́yẹ́ ibi mịnaapụ wa ḅọ́rọ́ nwọpa ẹ́gẹ́rẹ́kọọ sọ, wa biekpọ nyánam ọ fịnị angaá wa nimim ḅẹẹ ọmịnị ibi mịma nẹ́ngị boma nyanam, ọmịna dụaḅọ́rọ́ma na ḅo nyẹ. 10Tamuno ori anịị karakárá ḅo ma. Ori ọmịna fịrị pa bieḅáramabịgha anịgha ọ nyána ọ pịrị ḅẹlẹma, ọ pịghị nyáná, pịghị pa nyánáarị ḅárásua pa Krais asọ duaarịapụ ma pịrịarị. 11Wamịnị opuma biarị nyẹ anịị ḅẹẹ ọmịnị ọmịna tẹ́mẹ́bie o binyẹ ma ọmịnị anị ḅụ sẹ́ mú kunema la si ọmịna tọ́rụ́ dighinyẹ ma ḅo karakárá nyẹ́sọ́beḅara. 12Wa bighaa o ḅo ịnyọfaapụ sọ, kụ́ma o ḅo mininiapụ kịkáa, inema na minini ḅụ ḅọ́rọ́ Tamuno minini n pịrịnyẹ ma nyáná ḅo bẹapụ.

Gbarị Gbarịgha Tamuno Minininyẹ

13Tamuno nyẹ minini Ebraham pịrị sa ọ karakáráma nyẹ mininim ḅẹ́ o minini nyẹ ma ori anị mịẹbẹm. Ọ nẹngịḅọ ófórigha sa, ori ọrẹ ẹ́rẹ́ pa ọḅọọ fịịm, 14Warị ḅẹẹ, <<A mini ị pịrịm ḅẹ́ a ị karịibimabẹm, pịghị tọgha awọ pa ị pịrịbẹm.>> 15Ebraham inema nyanam anịgosi ori ine Tamuno minini o pịrịnyẹ ma nyánaḅom.

16Túminị́ ọḅọọ fị sáá, nnị n nẹ́ngị ẹ́rẹ́ pa ọḅọọ ma fị fịịm tumḅọ fị ọ ḅoo ma anị ḅẹ́rẹ́ gonyẹ́ gonyẹ́ pẹ́lẹ́arị nyẹ. 17Tamuno ọrẹ dima dimagha duma diepágháma ọrẹ awọ o minini nyẹ nyánáakị bẹapụ pịrị dọ́ghụm gosi o minini n pịrịnyẹ ori ọḅọọ fị pa anị mịẹ kụ́rọ́mam. 18Tamuno minini nyẹ na o fị ọḅọọ ma anịị mmẹẹ́ nyẹ ine dima bigha nyẹ, mịma diearị ḅẹ́ Tamuno ine epeletibịgha. Tamuno mịị mmẹẹ́ nyẹ ma pa wa tẹ́mẹ́kụ́rọmam ḅẹ́ wamịnị mangị o bie sọ́maapụ ma, ine ọlọ kụrọma bẹ ḅara wámịna tórúku fịnị tọ́rụ́ dighinyẹ ma. 19Wa mị tọ́rụ́ dighinyẹ ma nyánam biebẹ duma lụḅa ḅara, kụ́rọ pịghị kokofịnịm. Anị wa daá ḅụ́pọ́ gbẹ́ẹ̄ bịtẹ ma ḅụ ḅọ́rọ́ sobie Tamunowarị ma sọọ, sị mú biebẹ opu tọ́ntọ́ yọ ma sọ. 20Wámịna sịbị go Jizọs parị anị angaá ma sọmam si pịghị gbámásó igwagwaá áláḅọ sọ wa pịrị Melkịzedek igwagwaḅọ ma ḅara ḅụ.

Currently Selected:

Hiburuapụ 6: IBY

Highlight

Copy

Compare