Hiburuapụ 5

1Igwagwaá áláḅọ gonyẹ́ gonyẹ́ Tamuno n ḅọ sẹ́lẹ́akịm ọ jẹa túminị́ ogbo ḅẹẹ o fịrịwangi Tamuno pịrị nna sịbị, sị ori agba mịẹ pịghị igwagwaá sii pịrị. 2Ori, ori itilam gosi ọ tọ́rụ́kụrụkụ́rụ́ nyána níminyẹ nyánágháapụ na pịghị siinyẹ mịẹarịapụ pịrịm. 3Ori ma so itila ḅara, ma, ori igwa gwaabẹm, túminị́ ma sii ngéréghaa kụ́ma ori igwagwaá ọrẹ a sii sọ pịrịbẹm.

4Gbẹ́rẹ́ḅọ sọ ine mịị kuu pa amịna ḅụ pịrịbịgha, kụ́ma Tamuno ọ ḅara na sị ḅo, ori Erọn sị ḅara. 5Anị gbẹ́rẹ́ ḅara ma, Krais ori igwagwaá áláḅọ kuu ma pa ọ ḅụ pịrịgha kụ́ma Tamuno anị ọ ḅẹnyẹ ḅẹ,

<<Ịrị anị i Tụwọ,

mịmgba a Daa sọ ị pịrịmam.>>

6Ọ pịghị dughom jẹ́ angaá ḅẹ́,

<<Ị́ igwagwaá áláḅọ fịrị ma nwángị gbámásóbẹm

Melkịzedek ḅụọ duaarị.>>

7Jizọs mị tuminikiri fịnị sáá ọ kụ́rọ owu pụghọ pa ọrẹ tẹ́ghẹ̄ na obiarị nyẹ bim, ine o dụapághámaḅo bẹḅọ fịị ḅarabie, ori ọḅụ siteremam gosi Tamuno sughubie Tamuno o naam. 8Ori Tamuno Tụwọ n ḅẹ́sọ ọ tọ́rụ́siarị ḅụ ḅọ́rọ́ bịpị osiḅara nimim. 9Nnị o mịẹ kpainma sa, ọ warị anị ḅụ ḅọ́rọ́ gbámásó dụaḅọ́rọ́ma pa ọ dughonyẹ mịẹapụ gonyẹ́ gonyẹ́ pịrị. 10Tamuno igwagwaá áláḅọ pa osim, Melkịzedek ḅụọ ḅara.

Minini Ma Ḅụ Bịghị́koro Birinụnụ

11Wamịnị opuma dughonyẹ nyánábẹm, mịnyẹ ma gbólómanyẹ, kụ́ma anị ḅụdam dughofindi ọ pịrị ọmịna akanyaḅo gbulum gosi. 12Mị́sa ma ḅụ ọ nyẹ́dieapụ sọ naibim, kụ́ma ọ pa dọghụarị n pa parị parị Tamuno ẹ́gẹ́rẹ́ ma dawọ nyẹ́ pa o die, ọ kụ́rọ fị́nyẹ fị na ibi sa, ọfịgha, kụ́ma ndomingi anị obiarị nyẹ. 13Ndomingi ḅụarị ḅo gonyẹ́ gonyẹ́ nḅọ pa kálátụwọ, nḅọ akanyaḅo nyanagha Tamuno karakárá ibiamịẹnyẹ gboloma dáwọnyẹ ḅụ. 14Tụ́ma mbgọlụ fị́nyẹ fịnị sẹ́nịapụ pịrịm, nnị sámámgba anị fịarị sa, nnị ine ibinyẹ na siinyẹ na nimim.

Currently Selected:

Hiburuapụ 5: IBY

Highlight

Copy

Compare