2 Kọrịntịapụ 9
9
Ọ Nyáná Tamuno Túminị́ Pịrịbẹ Ḅárásua
1Nnị pa Tamuno túminị́ ma fịrịmaarị ḅárásua ma Judiya ḅụ, a arịgha a go diri gịẹ ọ fịrịma bẹnyẹ anị sịbị go. 2A nimim ḅẹẹ ọmịna tẹ́mẹ́bie ọ biarị ḅẹẹ ọ ḅárásua, a pịghị ọ pa bịpịkpọ Masidoniyaapụ ma pịrịmam. A ḅẹm ḅẹẹ, <<Akaya ḅụ fịnịapụ ma, mịná owiapụ ma ḅárásua dọ́ghụm saghị ḅọ́rọ́maa kụ́rá éné éné.>> Anị ọ tẹ́mẹ́bie álála ḅara ma, mú nna ḅụ tọghaapụ timi sághịmamam. 3Mị́sa amịna owiapụ awọ ma fịrịmaarị, sị wamịnị ọ pa kpọ bịpịkpọ ma papanyẹ sọbịgha ḅara, kụ́ma a dugho ḅara ḅụ, o tẹ́lẹ́ma fịnịbẹ ḅara ọmịna ḅárásua ḅụ. 4Anị fịnị ḅara ḅọ́rọ́ Masidoniyaapụ ma ịnáná ḅo ḅo sị arịḅo ḅẹẹ nịị ọ tẹ́lẹ́maghaa, anị tọ́rọ́fịnị ḅụ́gịrịrị dighiḅọ wa pịrịbẹ, anị pịghị dighiḅọ ọ pịrịbẹ ḅụ́gịrịrị wa biekpọma nyána ḅara ma ọmịna ḅụ. 5Anịgo a sịbịbie kịẹ anị pịrịm ḅẹẹ anị ibibẹm ḅẹ́, mịná mininiapụ ma tarị tarị ọ damaḅo ịḅụ, sị mú ọ ḅárafindi pịrịdọ́ghu nyẹ ma tẹ́lẹ́ma warị sị a ḅo láa ḅẹ́ sáá anị tẹ́lẹ́ma fịnịbẹm, mịma diebẹm ḅẹẹ ọ pịrị bim, mịnị ologho ḅara ḅụghaa.
Nyẹ́die Ma Ḅụ Fịnị Karịibima
6Biekóróma ḅẹ́ bogha sịmgbọlụ dipiḅọ pịghị bogha sịmgbọlụ sughubẹm; opuma sịmgbọ́lụ dipi ḅo pịghị tọgha sịmgbọlụ sughubẹm. 7Anịgo ọ́rụ́ḅọ ọ́rụ́ḅọ pịrịị tẹ́mẹ́bie n ḅo tọ́ọ pẹ́lẹ́máa ḅara, nyẹ́mọ́ni ḅugha, anịgha ḅẹẹ a anị mịẹ nyánam gosi, tegó Tamuno bieḅẹlẹ ḅụ nyẹ pịrịarịḅọ gonyẹ́ gonyẹ́ ḅẹlẹma ḅẹ́lẹ́mam. 8Tamuno ma pịghị ine o bi ḅara nẹ́ngị nyẹ mịẹ ọ pịrịbẹm. Si o bii nyẹ gonyẹ́ gonyẹ́ sámámgba ọmịnị anị nyáná ọ ḅụ pịrịbẹ ḅara, pịghị anị nyáná wásáma sị pa ibifịrị gonyẹ́ gonyẹ́ nwángị. 9Tọ́ndiri ma dugho ḅara,
<<Ori ọrẹ diepịrịnyẹ ma diegálágáláma igonyiapụ pịrịmam,
ori ibi akị mú gbámásó lam.>>
10Tamuno ori sịmgbọlụ pa dụadipiḅọ pịrịarịḅọ na pịghị fịtúrú pịrị fị́nyẹ ḅụ, pịghị pa ọ pịrịbẹm o bi sịmgbọlụ gonyẹ́ gonyẹ́, ọ mịẹbẹm anị sẹ́nị sị opuma nyẹsua ọ ḅara findi pịrịarị ḅara ma gosi. 11Ọ mịẹbẹm ọmịnị opuma ngọ nyána sámámgba ḅụ, sị ị ine ḅara findi sị nyẹ pịrịbẹm sị tọghaapụ anị ḅụ ḅọ́rọ́ ịmịẹḅam pa Tamuno ḅẹẹbẹm, n wámịna ḅara nyána ḅo dienyẹ gosi.
12Ḅẹẹ mị́sa ọ nwángị fịrị ma Tamuno túminị́ ngéréghaa ọmịnị nnị pálịma nyẹ mịẹ pịrịapụ, kụ́ma anị ḅụ ḅọ́rọ́ tọgha boma ḅọ́rọ́ mú Tamun laarị. 13Ọ nwángị fịrị ma nyána sị die pághámaarị nyẹ gosi tọghaapụ boma pa Tamuno pịrịbẹm ọmịnị Krais ibi ọkụ́ ma osii ḅara, ọ pịghị dugho pághámaarị nyẹ, ọ pịghị ḅara findi nnị na diearị ḅara na pịghị kị́nị́mamgba na. 14Anịgo opuma póghóló ḅẹlẹma ḅụ, nnị tẹ́ghẹ̄ ọ pịrịbẹm Tamuno diepághámamaá kịrị tọ́rụ́kụrụkụ́rụ́ ọmịna ḅụ. 15Túmíní fịnị Tamuno pịrịị, ọ pa wa pịrị sị tumḅọ ine anị dughofindi bigha dienyẹ!
Currently Selected:
2 Kọrịntịapụ 9: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
