2 Kọrịntịapụ 10
10
Pọl Ḅụ́pighi Ori Fịrị Pịrịm
1Krais ḅụ fịnị diin na ḅụsímínímá, irị Pọl, anịị mị tẹ́ghẹ̄ bịpị ma pa ọ tẹ́ghẹ̄arị nyẹ, ịrị anịị túminị́ ḅẹ́ sị tọ́rụ́kụ́kụ́ḅọ a ọ nana gbẹ́rẹ́ angaá fịnị sáá, kụ́ma tọ́rụ kụ́rọ a ọ nana gbẹ́rẹ́ angaá ófórigha sáá. 2Anịgo a ọ tẹ́ghẹ̄m, ọmịnị i mịẹma sị a kụrọ pụghọ pa ẹ́gẹ́rẹ a anị ngá láa sáá. A nimim ḅẹẹ a kụ́rọ pụghọ pa ẹ́gẹ́rẹ́ kọọbẹm a bịpị pa obiarịapụ ma na dona sáá, dughoapụ ḅẹ́ wa tuminikiriapụ nyẹ́ mịẹ ḅara pa nyẹ mịẹm. 3Karakárányẹ ḅẹẹ, wa tuminikiri imi, wa tuminikiriapụ ḅara pa ọ́mụ́gbịgha. 4Wa pa owusọarị ọ́mụ́gbinyẹ ma, tuminikiri ọ́mụ́gbi nyẹ́gha, kụ́ma Tamuno kụrọ ọ́mụ́gbinyẹ sị wa pa ine iruonaapụ ma kụ́rọ yọ gúlúgúlúmaarị nyẹ, wa pịghị epele nyẹ́nụ́na gúlúgúlúmaarị. 5Na opuamịẹnyẹapụ pa asọ mgbẹsẹ karakárá Tamuno nimi ma pịrịnyẹ gonyẹ́ gonyẹ́ nụ́nụ́ kiri gbi, sii kóróma gonyẹ́ gonyẹ́ akị ịkóli ḅụ sua sị anị Krais bịpị pughu bẹ ḅara. 6O die gbẹ́rẹ́kiri ḅẹẹ ọmịnị karakárá ḅara pa wámịna bịpị pughum, anịsáa wamịnị ine bịpị puughugha gonyẹ́ gonyẹ́ pa tọ́rụ́siarịmabẹm.
7Ọ nyẹ dighiarị anị fịnị ḅara ọgọnọ ọgọ́nọ́. Ḅọ́rọ́ tumḅọ biekpọma nyánam ḅẹ́ n ḅọ Krais nyẹẹ, anịḅọ ma pịghị sima akanyaḅo ḅẹ́, wamịnị sọ Krais nyẹẹ, n ḅọ ma so Krais nyẹẹ ḅara ma. 8A ḅọ́rọ́ sárásárá ḅara pa bịpịkpọ bẹ, anịị Kị́nị́nyánáḅọ ma pa wa pịrịmaá kụ́rọ sị wa pa ọmiẹ sẹnịmaa, tụ́ma ọ nụ́nụ́ kiri kóróma bẹ nakaragha, mịma ị ḅụ́gịrịrịmabịgha. 9A bigha ḅẹẹ ọmịnị ị́yẹ́ árị ḅẹẹ a gịẹárị diri ma a anị pa ọmịna ḅáláfáma dọ́ghụm. 10Jẹ́apụ ḅẹbẹm ḅẹẹ, <<Pọl ori diri pụghọ kụrọm pịghị ikum, tọ́rụ ḅụ o dighi sáá ọ kụrọḅọ kịkagha, ori ẹ́gẹ́rẹ́ bịpị pịghị ḅẹnyẹ ḅẹnyẹ ḅụ ofori.>> 11Anị tumḅọ ma nimi ḅẹẹ kịrịnyẹ ofori wa gịẹ diri wamịnị ófórigha sáá na pịghị wa mịẹbẹnyẹ wamịnị ọ́náná fịnị sáá.
12Tụ́manyẹ ḅẹẹ, wa wámịna ḅụ pa opuma nna ḅụ sághị sóghólomaapụ na tụ́mabịgha. Mịná oḅoriapụ ma nnị n ḅụ na kụ́rá ólóghó suam, nnị warị n sua ólóghó ma ḅụ ḅọ́rọ́ ḅẹ́rẹ́kọ nna ḅụ pịrị. 13Kụ́ma, wamịnị, wámịna bịpịkpọ anị la kunema bẹ angaá imi anị ikelekele kunemabẹm Tamuno tọ wa pịrị fịrịma ḅụ. Wa nwángịarị fịrị ọmịna bie sọ imii. 14Wa ọmịnị pa bịpịkpọarị sa, wa bịpịkpọ wamịnị bịpịkpọ na ibiḅara nẹ́ngịgha, tegó wamịnị anịị Krais ibi oku ma akuoo ọ pịrịapụ. 15Wamịnị wa bịpịkpọ jẹ́apụ nwángị famamaá fịrị pịrịgha. Kụ́ma wa tọ́rụ́ dighinyẹ nyánam ḅẹẹ fịrị ma anị opuma sẹ́nị mị ḅara ḅọ́rọ́bẹm. Anịsọ a árịbẹm ḅẹ́ a ịḅụ wárim Tamuno tọ́ọ i pịrị yọ ma ḅụ. 16Anị ọkọ koro koro, Kọrịntị ngéréghaa ẹ́gẹ́rẹ́ ma náa bẹnyẹ kụ́ma wa mú ibi oku ma dugho wásáma jẹ́ sẹapụ pịrịbẹm, wa túminí daákịbịgha Tamuno tọ́ọ kọ́rọ́ma jẹ́apụ pịrị fịrịkiri ḅụ.
17Kụ́ma Tọ́ndiri ma dugho ḅara ma ḅẹẹ, <<Bịpịkpọ dọghụḅọ gonyẹ́ gonyẹ́ Kị́nị́nyánáḅọ nwángifámamáa fịrị pa bịpịkpọ.>> 18Ḅẹẹ, Tamuno ibi kóróma nyána pịrịapụ ma anịị ọ pịghị ḅọ́rọ́marịapụ, ibi kóróma nyáná nna ḅụ pịrịapụgha.
Currently Selected:
2 Kọrịntịapụ 10: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
