2 Kọrịntịapụ 8
8
Ḅáráfindi Nyẹ́die
1I Daa awọ, wa bim ḅẹ́ o nimi Tamuno tọ́rụ́kụrụkụ́rụ́ nwángịmáa fịrị mamgba Masidoniya ḅụ fịnị sọsị mamgbabie. 2Nnị tụ́ma daádighi arịm, nnị n pa tulu ḅọ́rọ́ ḅụḅáláḅálá gosi, kụ́ma nna bieḅẹlẹ nna ḅụ nẹngịm mịẹsị nnị nna nyánányẹ pịrịm balagha ḅara ḅụ, karakárányẹ ḅẹẹ nnị siminiapụ. 3A onyẹ́sẹ n pịrịm, nnị, nnị ineḅara pa pịrịm, n pịghị nna ịnyọ nẹ́ngịma ḅara pa pịrịm, kị́nị́ n sumágha pa. 4Nnị wa tẹ́ghẹ̄m ḅẹẹ, nnị sọ pịghị gbẹ́rẹ́apụ sọ, diekiri nyáná bẹapụ, anịị ḅárásua Tamuno túminị́ ma pịrị Judiya ḅụ fịnịapụ ma. 5Nnị wa tọ́rụ́ pa dighi ḅara mịẹghaa, kụ́ma parị nnị nna ḅụ pa Kị́nị́nyánáḅọ pịrịm, n pịghị n ḅụ pa wamịnị sọ pịrịm anịị Tamuno tọ́ḅára ḅụ. 6Anịgo wa Taitọs tẹ́ghẹ̄m ḅẹẹ ori fịrị ma sághịḅọ ma, ori anị nwángị tórúku mú, sị ọ ḅárásua ọ pịrị sị ọ mị tụ́ma ḅẹlẹma fịrị ma nwángị fama. 7Ọmịna nyánányẹ gonyẹ́ gonyẹ́ ḅụ ọ mịnị opuma anị nyanam; minini ḅụ, ẹ́gẹ́rẹ́ pụghọ ḅụ, na pịghị níminyẹ ḅụ, ọ mịnị ịnyọ pa ḅárásua dọghụ ḅara, ọ pịghị pa wa ḅẹlẹma ḅara. Wa pịghị bim ḅẹ́ mị ḅẹlẹma fịrị ma ḅụ ọ ḅara findi balagha ḅara ḅụ.
8A ólóghó sua ọ pịrịgha, kụ́ma pa o die jẹapụ kụrọma biiarị ḅara sị n ḅárásua. A ḅụ́kọ́rọ́maarị a pa nimi ḅẹ́ ḅara ọmịna ḅẹlẹma anị karakárá fịnị ḅara. 9Ọ kọkọ wámịna Nyánáḅọ Jizọs Krais tọ́rụ́kụrụkụ́rụ́ nimi; ori ọrẹ opu láa ḅara balagha kụ́ma ọ ḅụ siminimam ọmịna sịbị go, sị ọrẹ simini ḅụ ḅọ́rọ́ ori ngọ pa ọkọọma bẹ ḅara. 10Mịị ḅẹ́rẹ́ ma gbolomanyẹ mịị ị́yẹ́ againma, anị ibiḅaa ọ pịrị ḅara. Ḅọ́rọ́maa kụ́rá ọmịnị anịị parị nyẹ pịrịapụ, anịma ngéréghaa kụ́ma anị pịghị ọ pụghọ tárịm ḅẹ́ ọ nyẹ pịrịị. 11Ọmịnị anị mịẹ tórúku mú sị fịrị ma nwángị famáa! Ḅẹ́ anị kụrọma ọ tarị anị mịẹfáma ọḅụ fịnị ḅara ọmịnị anị ọrụtọarị sa, ḅẹ́ ọ pịghị mị́sa ọ nyánányẹ pa fịrị ma nwángị. 12Anị ḅọ́rọ́ ọ́taárịarị ḅẹẹ ọ nyẹ pịrị, Tamuno ọmịna pịrịnyẹ ma daákịbẹm, ọmịnị nyáná sị pịrị bi ḅara, ọ nyanagha nyẹ ḅụghaa.
13Wa binyẹ mịmagha anịị ḅẹẹ a ikúnyẹ dighi sií jẹ́apụ sịbị, sị pa ọmịna ọgọ́nọ́ gbánā, kụ́ma ọmịnị pịrịarịnyẹ na jẹ́apụ pịrịarịnyẹ gbasi bẹ ḅara. 14Anịsa nyẹ ọ ḅụ kụ́rọ sa, nnị sọ warị nyáná bima, nnị sọ warị ḅárásua ọ pịrịbẹ ḅara. Mị ḅara ma ọmịnị ine karakárá ḅara pa ḅárásua ọ́rụ́ḅọ ọ́rụ́ḅọ pịrịbẹm. 15Tọ́n diri ma dugho ḅara bẹ, <<Opuma kóbirịḅọ opuma duḅanyẹ nyanagha ḅẹ́ kálányẹ kóbirịḅọ sọ opuma ịrụ nyẹ nyanagha.>>
Taitọs Na Ọrẹ Ogboapụ
16A ịmịẹḅam pa Tamuno ḅẹm, anị pa Taitọs tẹ́mẹ́bie suaḅọ anị i tẹ́mẹ́bie fịnị ḅara anịị ḅárásua ọ pịrị ḅụ. 17Wamịnị ọ ḅara binyẹ ngéréghaa o mịẹnyẹ, kụ́ma kị́nị́ osumagha pa, anị ọ tarịarị bẹ ọ ḅárásua anị o go ọ damaḅo nyẹ. 18Wa ori na, wámịna gbẹ́rẹ́ mị́naḅọ owitụ́wọ fịrịma ḅoarị sọsị mamgba opuma osigha nyáná pịrịḅọ, ọrẹ fịrị ḅụ, ọ Tamuno ẹ́gẹ́rẹ́ ma kọọ wásámaarị ḅara. 19Anịma pa angásá warị, sọsị gbọrụ ma ọ sẹ́lẹ́akịmam pịghị ọ tọ ḅẹ́ ọ wamịnị na munyẹ ma muu, wa ḅẹlẹma dienyẹ ma dighi sị Tamuno fịrị ma nwángịarị ḅara na pịghị die ḅẹẹ wa ḅárásua dọ́ghụm.
20Wa pịghị wámịna ḅụ ẹ́biarị gbẹ́rẹ́ḅọ sọ dughonyẹ nyánábịgha ḅara wa ḅara warị mị opu diepịrịnyẹ ma na nwángikọarị ḅara. 21Wa biiarị ḅẹẹ, wa karakárányẹ ma mịẹ, Kị́nị́nyánáḅọ tórúku ngéréghaa, kụ́ma túminị́ tórúku sọ.
22Pa anị ḅụ sua, wa wámịna mị́naḅọ owitụ́wọ na nnị na fịrịmaarị, wa pịghị dọghụ pághámaḅomam tọgha sa na pịghị asọ kirikiri ḅụ, arịḅo ḅẹẹ sámámgba anị ọ tarịarị ọ ḅara warị ḅárásua bẹ ḅara. Bẹ mị́sa ọ pịghị opuma biekpọ nyána ḅara ma ọmịna ḅụ, anị ọ tarị mị ḅara nẹ́ngimamam ori ine ḅárásua bẹ ḅara. 23Ori Taitọs ori ị́yẹ́ árụ́ḅọ, ori i nana nwángịarị wa ḅárásua ọ́ pịrịbẹ ḅara, isi mịná owiapụ ma ọ nana muarịapụ ma nnị sẹ sọsị gbọrụ ma pịrịm n pịghị boma akuoo Krais pịrịarị. 24Ị́yẹ́ ḅẹlẹma pa n die, anị sọsị sọsị mamgba ḅụkoro sị pịghị nimi ḅẹ́, wamịnị ọmịnị pa bịpịkpọ ma karakáram.
Currently Selected:
2 Kọrịntịapụ 8: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
