2 Kọrịntịapụ 1
1
Pọl Gịẹ Kọrịntịapụ Pịrị Mmẹẹ́ Kárámá Diri
1Irị Pọl, Jizọs Krais fịrịmaḅọ, na pịghị wámịna numboru owitụ́wọ Timoti anịị mị diri ma gịẹ ọ fịrịmaarịapụ, ọmịnị Tamuno sọsị ma Kọrịntị ma bie fịnịapụ na pịghị Tamuno awọ mamgba Akaya gbọrụ ḅụ fịnịapụ. 2Tamuno wámịna Daḅọ na pịghị wámịna Nyánáḅọ Jizọs Krais, tọ́rụ́kụrụkụ́rụ́ na diin pa ọ pịrị.
Biedịịnma Tamuno
3Túminí fịnị Tamuno ma pịrịị na pịghị wámịna Nyánáḅọ Jizọs Krais Daḅọ, lolomakúkúbie nyáná Daḅọ, biedịịnma mamgba sághị ḅara ḅoarị Tamuno, 4biedịịnma pa wa pịrịarịḅọ wámịna ḅụḅáláḅálá mamgba ḅụ, wamịnị sọ pịghị ine tọ́rụ́kịrịkị́rị́ ḅụḅáláḅálá bie fịnịapụ bie diinma bẹ ḅara, wa Tamuno ḅara nyáná ḅo biedịịnma ḅụ ḅọ́rọ́. 5Wa diekiri nyáná ḅara ma Krais mánámāná tọ́rụ́siarị ḅụ, anị ḅara ma anị wa pịghị Krais ḅụ ḅọ́rọ́, diekiri nyána ḅara Tamuno opu biedịịnma ḅụ. 6Wa ḅọ́rọ́ tọ́rụ́siarịrị, anịị ọmịna biedịịnma pịghị ọmịna dụaḅọ́rọ́ma, wa ḅọ́rọ́ biedịịnma nyáná nyáná, ọmịnị sọ biedịịnma nyanam n pịghị mgịrịma ịnyọ ma pa ọ pịrịm sị ọmịnị sọ ine wamịnị arịarị tọ́rụ́siarị ma daa bẹ ḅara. 7Anịgo wámịna tọ́rụ́ dighinyẹ ọ fịnị angaá jéné n jéné jighegha, wa nimim ḅẹẹ ọmịnị wa mịná tọ́rụ́siarị ḅụ diekiri nyáná ḅara ma anịị ọmịnị sọ wa nyáná ḅo biedịịnma ḅụ diekiri nyáná ḅara.
8I Daa awọ, wa dọ́ghụm o nimi wa la ḅụḅáláḅálá Esiya ḅẹrẹtọ yọ. N dighi wamịnị ọgọnọ kóróma ikúnyẹ ma, opuma dụḅam pịghị opuma ikum ḅẹẹ wa sịgha ḅẹ́ wa dumabẹm. 9Anị wa ḅụ fịnị ḅara anị n fịị ḅẹ́rẹ́pẹ́lẹ́ pịrịapụ nna sịbị ọ́gọ́nọ. Mịma go kiriakịnyẹ ọ́ wa wámịna ḅụ tẹ́mẹ́kụ́rọ nyánábịgha ḅara, kụ́ma Tamuno ḅụ ori ngéré fịịapụ sághịmaarịḅọ. 10Kụ́rọ ḅáláfama fịị kụ́rọ ḅụ ọ wa ḅọ́rọ́mam ọ pịghị wa ḅọ́rọ́mabẹm, wa pịghị wámịna tọ́rụ́ dighinyẹ pa ọ ḅụ gbánām ḅẹ ọ pịghị sima wa ḅọ́rọ́mabẹm, 11ọmịnị ọmịna tẹ́ghẹ̄ pa ḅárásua wa pịrịarị gosi. Tọghaapụ Tamuno túmíníbẹm wámịna sịbị, ọ nyána wa pịrị ibi gosi, anịị tọgha túminị́ wa sịbị go tẹ́ghẹ́arị tẹ́ghẹ̄ ma gosi.
Pọl Ọ Tọ Mịẹ Dọghụnyẹ Dima Ḅara
12Wa bịpịkpọm ḅẹẹ wámịna tẹ́mẹ́bie kụ́rọ kúkúbie pa wa pịrịm ḅẹẹ wámịna duma mị tuminikiri wa pịghị ibima ó nana nyáná gboloma mịẹnyẹ ma, ọ́ Tamuno ḅara sághị ḅo karakárá, na gbụ́nụ́nụ́ na Tamuno tọ́rụ́kụrụkụ́rụ́ kụ́rọ ḅụ ḅọ́rọ́ tumḅọ nyẹ́nimi ḅụ ḅọ́rọ́gha pa. 13Wa jẹ́ ịwọ diri gịẹ ọ fịrịmagha kụ́ma ọ́ o goo sị akanyaḅo bẹnyẹ, a mininim ḅẹ́ ọmịnị akanyaḅo mú kunema lábẹm. 14Ọmịnị sọ pịghị kálá ḅara pa wamịnị akanyaḅo ḅara, ḅẹ́ wamịnị go anị o go bịpịkpọ na ibii nyẹ, ọmịnị ma pịghị wámịna nyẹ ḅara ma Wányánáḅọ Jizọs Krais sima ḅo bẹ éné.
15I tẹ́mẹ́kụ́rọ mịnanyẹ mamgba pịrịm anị a go ọrụtọ nyẹ parị ma ḅụ sị á ọ fịnịanga ḅo sị mmẹẹ́ karịiḅi ọmịna nyẹ sọọ bẹ ḅara. 16A tọọm ḅẹ́ a ọ fịnịanga ḅobẹm, a ḅọ́rọ́ Masidoniya múuarị sa, a pịghị ḅọ́rọ́ sooarị sa, sị a ọ ḅara ḅárásua nyánábeḅara a ḅọ́rọ́ Judiya muu bẹ sa. 17A mịma tọarị sa, a sárásárá ḅara pa ịḅụ warịị́? A iyẹ nyẹ tọarị sa a tuminikiriapụ ḅara pa anị tọ́ọ, sị tẹ́lẹ́ma fịnị sị <<Innh, innh>> na <<Errnh, errnh>> ḅẹ́ anị gbẹ́rẹ́sa ma ḅụ?
18Tamuno karakárá ḅụ fịnị ḅára ma a minini ọ pịrịnyẹ ma <<Innh>> na <<Errnh errnhgha.>> 19Ḅẹ́ Jizọs Krais Tamuno Tụwọ, Sailas na Timoti na ịrị ma dugho wásáma ọ pịrịḅọ ma, ori <<Innh>> na <<Errnh errnhḅogha,>> kụ́ma ọ ḅụ Tamuno <<Innh>> ngéré ḅẹm. 20Ori anị <<Innh>> ma sị pa Tamuno minini nyẹ mamgba pịrị. Mịma go Tamuno Jizọs Krais ḅụ sámámgba <<Innh>> ḅẹm, wa anị ḅẹ́ pa Tamuno bomaarị. 21Wamịnị na ọ́ nana miẹgbolomaarịḅọ anịị Tamuno ori ma anị pịghị pulo pa wa sịbị saramaá ḅọ. 22Ori anịị ọrẹ ilíghíma suamaá ḅọ wámịna ḅụ, pịghị Tọ́ntọ́ Tẹ́mẹ́ ma pa wa pịrịmaá ḅo wámịna tẹ́mẹ́bie, mịma anị ọ pa wa tẹ́mẹ́kụ́rọma ọ nyáná kóróma wa pịrịnyẹ.
23A Tamuno siim ị́yẹ́ onyésẹ̄ḅọ ori i tẹ́mẹ́bie nimim! A ḅụḅáláḅálá pa ọ pịrị dọghụgha ḅara gosi, anị a goo mịnị Kọrịntị ḅogha nyẹ. 24Ḅẹgha ḅẹ́ wa dugho ọ pịrịarị ḅẹ́ ọ minini, wa nimim ḅẹ́ ọ sẹ kụrọm ọmịna minini ḅụ, Anịmanakaragha wamịnị ó nana nwángị gbólomaarị ọmịna bieḅẹlẹ bẹ ḅara.
Currently Selected:
2 Kọrịntịapụ 1: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
