2 Kọrịntịapụ 2

1Anịgo a kọọpẹ́lẹ́mam ị tẹmẹbie ḅẹ́, a mịnị sima ọ dámáḅobịgha a ọmịna tẹ́mẹ́ simabịgha ḅara. 2A ọ tẹ́mẹ́ miẹsima sa, tụọ kọọ bẹ sị i tẹmẹ miẹḅẹ́lẹ́ma? Kụ́ma ọmịnị a tẹ́mẹ́ miẹsimaapụ ma. 3Anị a go anị ábálálá ma gịẹ ọ pịrịnyẹ. A bigha ḅẹ́ a ọ damaḅo, sị i tẹmẹ miẹḅẹ́lémaapụ ma, ḅo i tẹ́mẹ́ miẹsima. A itẹ́mẹ́bie mininim ḅẹ́ ị bieḅẹlẹarị sa, ọmịnị mamgba sọ bieḅẹ́lẹ́bẹm. 4Opu ḅụḅáláḅálá na tọ́rụ́siarị bie fịnị tẹ́mẹ́ na tọgha owu mingi, anị a pa mị ábálálá ma gịẹ ọ pịrịarịnyẹ. A gịẹgha ḅẹ́ a pa ọ tẹ́mẹ́ sima, kụ́ma ọ́ pa diepágháma a ọmịnị kị́nị́mamgba ḅẹlẹma lama ḅará.

Siiḅụḅárasi Siinyẹ Mịẹapụ Pịrị

5Mị́sa ḅọ́rọ́ kị́nị́ jụghọ tẹ́mẹ́ simamam, n ḅọ i mịẹgha, kụ́ma ọ mịnị kị́nị́mamgba anị n ḅo mịẹnyẹ anịgha ọmịna ḅụ jẹapụ. A go mịma dughonyẹ, a bigha a kụ́rọ na tumḅọ ma na mịẹ. 6Anị ibimam ḅẹ́ tọghaapụ mị tumḅọ ma pa tọ́rụ́siarịmam mị ḅara ma. 7Ḅẹ́ mị́sa, o siiḅụḅárasi ọ pịrị sị ọ tẹ́mẹ́ mịẹ kụ́rọ́ma sị opu tẹ́mẹ́sii gbẹ́rẹ́sa o dighiákị so bigha ḅara. 8Anịgo a ọ́ tẹ́ghẹ̄m ọ mịẹsị o nimi ḅẹ́ ọmịnị ibima ọ ḅẹ́lẹ́mam. 9A go mị diri ma gịẹ ọ pịrịnyẹ a nimi dọ́ghụm ọ mịnị ine sẹ daádighi ma pịrị ḅara, ọ pighi bịpịpúghúu ḅara nyẹ gonyẹ́ gonyẹ́ ḅụ. 10Ọmịnị siiḅụḅarasi siinyẹ pa ọmieapụ pịrị sa, irịsọ pịghị siiḅụḅárasi n pịrịm. Ḅọ́rọ́ karakáráma, a siiḅụḅarasi ḅẹnyẹ ḅẹnyẹ pịrịm, a anị mịẹarị Krais tórúku ọmịna sịbị gosi. 11Satanị kụ́rọḅa ḅara nyánábịgha ḅara wámịna ḅụ tegó? Wamịnị ọrẹ aka na ọrẹ egberi nimim.

Pọl Ḅáláfa Troas Ḅụ

12A ḅo Troas la sa ḅẹ́ a Krais gboloma ibi ẹ́gẹ́rẹ́ ma dugho wásámáa, a arịḅom ḅẹẹ Kị́nị́nyánáḅọ asọ findi i pịrịmam ḅẹẹ a fịrị nwángịị anị ngaa. 13Kụ́ma Ikúkúbie opuma ḅụḅáláḅálá pa i pịrịm, a ine ị́yẹ́ mị́naḅọ owitụ́wọ Taitọs arịgha go. A warị anị ngaa fịnị túminị́ ma ḅẹ́ ọmịnị ibima fịnịị, a warị anị angaá ḅọ́rọ́ Masidoniya muu.

Sọọḅa Krais Ḅụ Ḅọ́rọ́

14Kụ́ma wa ịmịẹḅam pa Tamuno ḅẹm. Ḅẹ́, wamịnị na Krais na gbẹ́rẹ́nyẹ sọ ḅụ, Tamuno Krais ḅụ, ḅọ́rọ́ sọọḅa pa wa pịrịarị, ọ pịghị wámịna ḅụ ḅọ́rọ́ mịẹsị Krais níminyẹ ma kụ́nụ́ pulo kụ́nụ́ ḅara pa kụ́nụ́ ngámámgba saama. 15Wamịnị, wa fịnị ḅara anị kụ́nụ́ insẹnsị fịnị ḅara, Krais tọndi Tamuno pịrịnyẹ kụ́nụ́ wasa dụaḅọ́rọ́ma nyánáarịapụ mamgba pịrịarị na pịghị faarịapụ ma sọ pịrị. 16Faarịapụ ma anịị, fụ́rụ kị́nị́ḅa bẹ fụ́rụ, kụ́ma dụaḅọ́rọ́ma nyánáarịapụ anịị duma pịrị kụ́nụ. Tụọ anịsa ine ọkọfịnị fịrịnwangị bẹ. 17Wamịnị wa isi tọghaapụ fịnị ḅara fịnịgha, Tamuno oku ma pa fẹ́ dẹrị sị sọnyẹ mịẹ, kụ́ma Tamuno wa fịrịmamam gosi, ọrẹ fịrịnwangịapụ ḅara, wa karakárá ḅara pa ẹ́gẹ́rẹ́ ma kọọm Tamuno tórúku.

Currently Selected:

2 Kọrịntịapụ 2: IBY

Highlight

Copy

Compare