1 Kọrịntịapụ 15
15
Krais Ori Fịị Ḅụ Saghị
1Mị́sa i jẹa mininiapụ, a pá o biekóróma, a dugho wásáma ọ́ pịrị ibi oku, ọ daákịnyẹ, anị ḅụ anịị ọmịna minini pịghị sẹ nyẹ. 2Mịị ibi oku ma ḅụ ḅọ́rọ́ ọ dụaḅọ́rọ́ma nyánam, ọ ḅọ́rọ́ a dugho wásáma ọ pịrị ẹ́gẹ́rẹ́ ma ọ́lọ́ kụ́rọ́ma kụ́rọ́maá. Ọkọgha nḅẹḅẹ́, ọ pápá mininimam.
3A dáaḅonyẹ a ḅọ́rọ́ma ọ pịrịmam parị nyẹ́la ḅa nyẹ ḅara, ḅẹ́ Tọ́ndiri ma dugho ḅara ḅẹẹ, Krais wa sịbị go fịm, 4ḅẹ́ nnị o dipim, tẹ́rẹ́ a dii kárámá éné nnị ọ saghịmam Tọ́ndiri ma dugho ḅara, 5ọ pịghị ọ ḅụ pa Pita diem, anịma ḅọ́rọ́ sa ori ọ ḅụ pa oyi mmẹapụ findi ma die. 6Anịma ḅọ́rọ́ sáá, ori ọḅụ pa i jẹa mininiapụ ndẹ́ẹ sọ́nọ́ a si findi nẹ́ngịapụ diem gbẹ́rẹ́ sáá, nna ḅụ tọghaapụ pa dumafịnịm, karakárányẹ ḅẹ́ nna ḅụ jẹ́apụ sọ fịịmam. 7Anịsáa o ḅo ọḅụ pa Jems die, anịma ḅọ́rọ́ sáá ori ọḅụ pa nfịrịmaapụ mamgba die. 8Kunemaá ori ọḅụ pa i diem n kịrị ḅara pa yiiḅọ.
9Irị anị ịrụḅaḅọ nfịrịmaapụ mamgba ḅụ anịgo nnị nfịrịmaḅọ pa isi na ibighaa, tegó a Tamuno sọsị ma pa tọ́rụ́siarịmam. 10Kụ́ma Tamuno tọ́rụ́kụrụkụ́rụ́ ḅụ a mịị fịnị ḅara ma fịnịm, ọ nyáná i pịrị tọ́rụ́kụrụkụ́rụ́ papa faghaa, ọkọgha, a ịnyọsua fịrịnwangị nnị kị́nị́mamgba nẹngịm, anịsọ irịgha kụ́ma Tamuno ma tọ́rụ́kụrụkụ́rụ́ iḅụbie fịrịnwangịarị nyẹ. 11Anị ọkọ fịnị sáá, ḅọ́rọ́ i ḅara sághị ḅo anịgha nna ḅara sághị ḅo o, mị gbẹ́rẹ́ ibi oku ma anịị wa dugho wásámaarị nyẹ ọ pịghị minini nyẹ.
Fịịapụ, Fịị ḅụ Sághị
12Kụ́ma ḅọ́rọ́ n dugho wásámāmam ḅẹ́ n Krais sághịmamam fịị ḅụ, ọmịna ḅụ jẹ́apụ tegó dughoarị ḅẹ́ fịịapụ fịị ḅụ saghị ofori? 13Ḅọ́rọ́ fịị ḅụ saghị ofori fịịapụ pịrịm, anịsáa Krais so nnị ọ saghịmagháa fịị ḅụ. 14Ḅọ́rọ́ na n pa Krais saghịmagha, wámịna dugho wásáma ẹ́gẹ́rẹ́ mịnị nyẹ́ ḅụ ofori, anị ḅara ma anị pịghị ọmịna minini. 15Anịma nẹ́ngị nyẹ, anị diem ḅẹ́ wamịnị Tamuno iruo onyésẹapụ, wa kọkọ fịị ḅụ Krais saghịma Tamuno ma dugho págháma. Kụ́ma ḅọ́rọ́ ori ọ saghịmagha, anịị fịịapụ fịị ḅụ saghịgha. 16Ḅọ́rọ́ fịịapụ fịị ḅụ saghịgha, anịsáa Krais sọ na fịị ḅụ saghịgha. 17Ḅọ́rọ́ Krais na fịị ḅụ saghịgha, ọmịna minini ḅẹnyẹ ḅẹnyẹ ḅụ ofori; ọ pa ọmịna sii ḅụ imi. 18Anịsáa Krais bie fịnị sị fịịmaapụ nnị fáamam. 19Ḅọ́rọ́ mịị tuminikiri ngéré ḅụ anịị wa tọ́rụ́ dighinyẹ nyánányẹ Krais ḅụ, wamịnị anịị túminị́ mamgba ḅụ túminị́ dighi ḅụjiirịbeapụ.
20Kụ́ma karakáráma n Krais sághịmamam fịị ḅụ, pa die ḅẹ́ gbarịgha ḅụ ọ fịịapụ mamgba saghịmabẹm fịị ḅụ. 21Kụma fịị tumḅọ ḅụ ḅọ́rọ́ ḅo ḅara, fịị ḅụ saghị ma pịghị tumḅọ ḅụ ḅọ́rọ́ ḅom. 22Adam ḅụ ḅọ́rọ́ kị́nị́mamgba fịị ḅara, anị gbẹ́rẹ́ ḅara ma Krais bie kị́nị́mamgba ḅo dumaapụ sọ́bẹm. 23Ọ́rụ́ḅọ ọ́rụ́ḅọ n ḅo karakárá sáá, Krais ori ma anịị párị, anịsáa ọ pịghịma ḅomaẹrẹ, ọ ḅụ mininiapụ fịị ḅụ saghịbẹm. 24Anịsáa kunema ma ḅobẹm, ori amadakiri ma ḅọ́rọ́ma Tamuno Daḅọ ma pịrị sáá, anịị ọ táa kụ́rọ gonyẹ́ gonyẹ́ na ḅẹrẹtọ kụ́rọ na kụrọ gonyẹ́ gonyẹ́ guluguluma fama sáá. 25Ḅẹ́ Krais táa nyánam gosi ori ọrẹ iruonaapụ pa ọ ḅụọ sughu sua sa láa. 26Kunema n guluguluma bẹ iruonaḅọ anịị fịị. 27Tọ́ndiri ma dugho ḅara, <<Ọ nyẹ gonyẹ́ gonyẹ́ pa ọ ḅụọ sughu suamam.>> Mị́sa anị ọkọ dugho sáá ḅẹ́, <<Nyẹ gonyẹ́ gonyẹ́ pa ọ sughubie suamam.>> Anị tọ́rụ́ bulubulumagha ḅẹ́ n Tamuno ḅụgbọrụ suagha anị bie, nyẹ gonyẹ́ gonyẹ́ pa Krais sughubie suaḅọ. 28Ọ mịma mịẹfáma sáá, Tụwọ ma sọ ọ ḅụ pa Tamuno ma sughubie suabẹm, nyẹ gonyẹ́ gonyẹ́ pa o sughubie suaḅọ, anịsáa Tamuno ma káara ḅara pa taábẹm nyẹ gonyẹ́ gonyẹ́ ḅụ.
29Mị́sa ḅọ́rọ́ fịị ḅụ saghị ofori, mịnaapụ ma n tẹ́ mịẹbẹ n fịịmaapụ gosi mingi pa saraapụ? Ḅọ́rọ́ fịịapụ nnị n saghịma duma ḅụ suugha, n tegósi nna sịbị go mingi pa kị́nị́ sáraarị? 30Wamịnị anịsáa, wa tegó wámịna duma pa ine fịị dighiḅọ bẹnyẹ ḅụ súúarị sáá gonyẹ́ gonyẹ́ ḅụ? 31Ijẹa mininiapụ, a fịị na tọ́rụ́ donaarị éné gonyẹ́ gonyẹ́ ḅụ. A bịpịkpọ ḅara pa mịma dughom wa nyáná duma gosi Krais Jizọs wámịna nyánáḅọ bie, wa ori na gbẹ́rẹ́ ḅụ mịẹ sáá. 32A ḅọ́rọ́ pirinama na mgbáa sọmam Ẹ́fịsọs ḅụ anịị túminị́ ḅara ḅụ, a tẹ́ sọnyẹ nyanamaá? Ḅọ́rọ́ fịịapụ ma nnị n saighịma duma bie suabịgha,
<<O ḅo wa fị pịghị ḅuu,
ḅáa wa fịị.>>
33Minima nnị oḅori pa ị́ sị, <<Siiapụ na mịẹgbólóma nyẹ nyáná, ibiamịẹnyẹ sima simam.>> 34Ị́yẹ́ akanyaḅo sima ịḅụ ḅoo anị ḅo na ibiḅara, siinyẹ mịẹ kunema, ḅẹ́ jẹapụ imi Tamuno nímighaapụ. A mịma dughom pa ọ ḅụ́gịrịrịma.
Oju Ma Fịị Ḅụ Saghị
35Kụ́ma kị́nị́ gbilabẹm, <<Fịịapụ ma nnị tọ́rọ pa n saghịma? Nnị tọ́rọ fịnị́ oju pa ḅo bẹ?>> 36Ịrị oḅorisọ ḅara! Kiri ị dipinyẹ ma anị sópaghábịgha ḅọ́rọ́ anị parị fịịgha nḅẹḅẹ́. 37I nyẹ dipiarị sáá ịrị oju ma dipigha kụ́ma mgbọ́lụ ma, didigha fịtúrú mịẹ sịmgbọlụ anịgha jẹ́ kịrịnyẹ. 38Kụ́ma Tamuno ọ ḅụḅẹlẹ oju pa anị pịrịm, sịmgbọlụ gonyẹ́ gonyẹ́ ori warị anị oju pa anị pịrịị.
39Ojumẹnị mamgba gbẹ́rẹ́ ḅara fịnịgha, túminị́ gbẹ́rẹ́ oju ḅara nyánam, nama jẹ́ oju ḅara nyánam, fíní jẹ́ oju, nji pịghị jẹ́ oju.
40Sobie oju sọ imi, tuminikiri oju sọ imim, kụ́ma sobie oju ma fíafía ḅara imi, tuminikiri oju ma fíafía ḅara sọ imii. 41Ịrụa ma gbẹ́rẹ́ fíafía nyanam, akalụ́ ma sọ jẹ́ nyẹẹ, ḅálōló ma sọ pịghị jẹ́ nyẹẹ, ḅálōló ma so nnị kirikịrịm nna fíafía ḅụ.
42Mịị anị fịnị bẹ ḅara n fịịapụ saghịma bẹ sáá fịị ḅụ. Nnị dipi oju ma ḅụrụ́bẹm, nnị anị saghịma sáá anị mịnị ḅụrụbịghaa. 43Nnị anị dipi sáá kuu nyanagha, nnị anị saghịmam ipine ḅụ, ịnyọ ḅụ ofori ḅụ nnị anị dipim, ịnyọ ḅụ nnị anị saghịmam. 44Papa oju nnị anị dipim, tẹ́mẹ́ oju nnị anị saghịmam. Ḅọ́rọ́ papa oju imii, anịsáa tẹ́mẹ́ ngá oju ma sọ imiịbẹm. 45Tọ́ndiri ma dughom, <<Parị Adam ma ḅo duma fịnịḅọ sọm,>> kunema Adam ma anịị duma pịrịarị tẹ́mẹ́ ma. 46Tẹ́mẹ́ nganyẹ ma tárị ḅogha, kụ́ma papanyẹ ma, anịma ḅọ́rọ́ sáá, tẹ́mẹ́ nganyẹ maá. 47Parị Adam ma tuminikiri átụ́ma anịị n pa ọ tẹ́mẹ́nyẹ, mmẹẹ́ kárámá Adam ma sobie saghịḅom. 48Fịnị tuminikiri pịrịapụ ma, nnị tuminikiri n tẹ́mẹ́ḅọ ma kịkam; fịnị sobie pịrịapụ ma pịghị sobie saghị ḅoḅọ ma kịkam. 49Wa tuminikiri n tẹ́mẹ́ḅọ ma kịká ḅara ori fịnị ḅara, anị wa sobie saghị ḅoḅọ ma kịká bẹ ḅara ori fịnị ḅara.
50A dugho págháma ọ pịrịm, i jẹa mininiapụ, ojumẹnị na ọmbịnyẹ́ Tamuno amadakiri ma nyánáḅobịgha, anịgha ḅụrụ́ bẹ angaá nyẹ ma ine ḅụrụbịghaa nganyẹ ma nyánáḅobịgha. 51Pughu, a ḅọghunyẹ dugho ọ pịrị: wamịnị kị́nị́mamgba fịịbịgha, kụ́ma n wamịnị kị́nị́mamgba dimabẹm 52anị gbẹ́rẹ́kiri, gbẹ́rẹ́ tọ́rụ́ gbẹ́ẹ̄ findi ḅụ, kunema ọdụ ma fie sáá. Ọdụ ma fiebẹm, fịịapụ ma nnị n saghịmabẹm mịnịfịbịgha oju ḅụ, wamịnị sọ dimabẹm. 53Ḅụrụ́ bẹ oju ma ḅụrụbịghaa oju suabẹm, n pịghị fịị bẹnyẹ ma dima fịịbịgha nyẹ ḅụ suabẹm. 54Ḅụrụ́ bẹ oju ma ḅụrụbịghaa oju ma sua sáá, pịghị fịị bẹnyẹ fịịbịgha oju ma sua sáá, anịsáa Tọ́ndiri ma ḅo karakárányẹ sọ́bẹm, dughonyẹ ḅẹ́, <<N sọ́ḅá ḅụ fịị mẹnịakịmam.>>
55<<Fịị ị́yẹ́ sọ́ḅa tẹ́ ngá imii?
Fịị ị́yẹ́ kị́nị́ tẹ́ kụ́rọ tẹ́ ngá imii?>>
56Fịị anị kị́nị́ tẹ́ kụrọ nyánaḅom sii ḅara, sii pịghị anị kụ́rọ nyánaḅom ólóghó ma ḅara. 57Kụ́ma imiẹḅa fịnị Tamuno pịrị mịẹsị wa sọḅaarịḅọ wámịna nyánáḅọ Jizọs Krais ḅụ ḅọ́rọ́.
58Anịgosi, ibi ijẹa mịnaapụ, ọ sẹ kụrọ, minima gbẹ́rẹ́nyẹ sọ ọ jighema ma. Sámamgba ọ mịnị ọmịna ḅụgbọrụ pa Kị́nị́nyánáḅọ fịrị ma pịrị, tegó o nimim ḅẹ́ ọmịna tọ́rụ́siarị Tamuno fịrị ma ḅụ papa faghaa.
Currently Selected:
1 Kọrịntịapụ 15: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
