1 Kọrịntịapụ 14
14
Tẹ́mẹ́ Ḅara Saghị ḅo Dienyẹ
1Ḅẹlẹma asọ ma dua, pịghị ibima Tẹ́mẹ́ dienyẹ ma dọghụ, kụ́ma ẹ́rẹ́so ḅa nyẹ ma anịị ikiakoro dienyẹ ma. 2Kịrị ḅẹ́lẹ̄ pa ẹ́gẹ́rẹ́ kọọarịḅọ gonyẹ́ gonyẹ́ ẹ́gẹ́rẹ́ túminị́ pịrịgha kụ́ma ẹ́gẹ́rẹ́ Tamuno pịrịm, tegó gbẹ́rẹ́ḅọ sọ ori akanyaḅogha. Ori ḅọghu karakárányẹ dughoarị Tẹ́mẹ́ ma kụ́rọ ḅụ ḅọ́rọ́. 3Kụ́ma ikiakoroarịḅọ gonyẹ́ gonyẹ́ ẹ́gẹ́rẹ́ túminị́ pịrịarị sị pa ịnyọ pa nna ḅụ sua, nna tẹ́mẹ́ kụ́rọ́ma na pịghị nna bie diinma. 4Jẹ́ ḅẹ́lẹ̄ pa ẹ́gẹ́rẹ́kọarịḅọ gonyẹ́ gonyẹ́ ịnyọ pa n ḅọ ḅụ ngéré ḅụ suarị, kụ́ma ikiakoroarịḅọ gonyẹ́ gonyẹ́ ịnyọ pa sọsị gbọrụ ma ḅụ suarị.
5A biibẹm ḅẹẹ ọmịnị kị́nị́mamgba kịrị ḅẹ́lẹ̄ pa ẹ́gẹ́rẹ́kọọ kụ́ma anị i ḅụḅẹ́lẹ́ḅabẹm ḅọ́rọ́ ọmịnị kị́nị́mamgba ikiakoro. Ḅẹẹ ikiakoroarịḅọ ma nyẹ ḅụ sọ kịrị ḅẹ́lẹ̄ pa kọọarịḅọ ma nẹngịm ḅọ́rọ́ kị́nị́ ofori sị n ḅoo kọọ ẹ́gẹ́rẹ́ ma dughofindi sị pa sọsị gbọrụ ma mịẹ sẹnịmaa. 6Anịgoo i jẹa mininiapụ, a ọ damaḅo ḅo a tẹ́ sọnyẹ sọ ọ pịrịbẹ a ḅọ sághị kịrị ḅẹ́lẹ̄ pa ẹ́gẹ́rẹ́kọọ sáá? Ḅọ́rọ́ a ine diepágháma nyẹ anịgha akanyaḅo anịgha ikiakoronyẹ anịgha againma ẹ́gẹ́rẹ́ akuogha.
7Dúma ḅụ ófóri núme suu nyẹ ma dighi ipilepile anịgha ọdụ, tumḅọ tọ́rọ pa núme pụghọ ma nimi bẹ ḅọ́rọ́ nnị ofurogha sị nnị ibima anị pụghọ náa? 8Ọdụ ma anị tụ́ma ḅara pa fieghaa sáá tumḅọ tọ́rọ́ pa tẹ́lẹ́ma ọ́mụ́gbi pịrịị bẹ? 9Anị gbẹ́rẹ́ ḅara ma, tumḅọ tọ́rọ́ pa ị́yẹ́ akanyaḅo bẹ ḅọ́rọ́ i kịrị ḅẹ́lẹ̄ pa kọọ ẹ́gẹ́rẹ́ nnị anị nagha, ị́yẹ́ ẹ́gẹ́rẹ́ ma ẹmẹẹ́fábẹm fọ́rụ́ bie. 10Tọgha tọgha ama ẹ́gẹ́rẹ imi tuminikiri ma bie nna bie, anịsọ oku nyanagha nyẹ oforii. 11Kụ́ma ḅọ́rọ́ a n fiearị ẹ́gẹ́rẹ́ ma nagha nagha anị ẹ́gẹ́rẹ́ ḅẹlẹ ma pa ẹ́gẹ́rẹ́ kọ́ọ́arịḅọ ma ịrị ọ ḅụ biaḅọ dighibẹm ori sọ ịḅụ biaḅọ dighibẹm. 12Anịị tarịarị ḅara ma, sị ị Tẹ́mẹ́ ma pịrịarị dienyẹ ma nyána, árị ḅẹẹ i ibima n pa fịrị ḅụ suam ḅárásua sị sọsị ma mịẹ sẹ́nịma bẹnyẹ.
13Kịrị ḅẹ́lẹ̄ pa ẹ́gẹ́rẹ́ kọọarịḅọ tẹ́ghẹ̄ na ibim ḅẹẹ n ḅo ine n ḅọ kọọ ẹ́gẹ́rẹ́ ma daadugho. 14A ḅẹ́lẹ̄ ḅụ tẹ́ghẹ̄ tẹ́ghẹ̄, i tẹ́mẹ́ anịị tẹ́ghẹ́arị nyẹ, kụ́ma ikúkúbie gbẹ́rẹ́nyẹ sọ mịẹgha. 15Anịsáa, a tẹ́ mịẹbẹ? A ị tẹ́mẹ́ pa tẹ́ghẹ̄bẹm; a ị tẹ́mẹ́ pa núme suubẹm; kụ́ma a pịghị ị kúkúbie pa núme suubẹm. 16Í ịmịẹḅam pa Tamuno ḅẹẹarị sáá tẹ́mẹ́ ḅụ ngéré, anịsáa pápáapụ ọ nana tẹ́ghẹ̄arịapụ ma n tọ́rọ pa ine <<Anị ọkọ fịnị>> ḅẹẹ ị́yẹ́ ịmịẹḅam tẹ́ghẹ̄ ma pịrịbẹ? Asọ ofori n ḅara warị nimi bẹ ḅara i dughoarị nyẹ. 17Ḅọ́rọ́ ḅẹ́ dii ḅẹẹ ị́yẹ́ ịmịẹḅam tẹ́ghẹ̄ ma i tẹ́ghẹ̄ Tamuno pịrịarịnyẹ ma opuma ibii sọ, isiḅọ ma anị sọ ọ pịrị sọnyẹ oforii.
18A ịmịẹḅam pa Tamuno ḅẹm ḅẹ́ a kịrị ama ḅẹ́lẹ̄ pa ẹ́gẹ́rẹ́kọọ ọmịnị mamgba nẹngịm. 19Kụ́ma sọsị bie, a biibẹm a sọ́nọ́ a ẹ́gẹ́rẹ́kọọ túminị́ akanyaḅo bẹnyẹ sị pa nyẹ pa jẹ́apụ die, sị ḅẹ́lẹ̄ mmẹẹ́ a ndẹ́ẹ oyia si findi kọọ nakaragha.
20Ị jẹa mininiapụ ọmịnị awọamaapụ kịkama ọmịna kóróma ḅụ, siinyẹ gbolomanyẹ ḅụ ọmịnị awọamaapụ kịka, kụ́ma ọmịna kóróma ḅụ ọ sẹnịapụ dighi. 21Tọ́ndiri ma bie n gịẹ kórómam ḅẹẹ, Kị́nị́nyánáḅọ dughom ḅẹẹ,
<<Kịrị ẹ́gẹ́rẹ́ ḅẹ́lẹ̄ kọọarị túminị́ ḅụ ḅọ́rọ́,
na pịghị biapụ bịpị ḅụ ḅọ́rọ́,
a ẹ́gẹ́rẹ kọọ mịná túminị́ ma pịrịbẹm,
kụ́ma anịsọ ịyẹa túminị́ mini ị pughubịgha.>>
22Anịgo kịrị ama ḅẹ́lẹ̄ pa ẹ́gẹ́rẹ́kọọ anịị ọ́ pa ilíghíma sua mininighaapụ ma pịrịnyẹ, mininiapugha, ikiakoro ma anịị mininiapụ nyẹ, mininighaapụ nyẹ́gha.
23Ḅọ́rọ́ sọsị gbọrụ ma ḅo kobirim, sị kị́nị́mamgba warị sághị kịrị ḅẹ́lẹ̄ pa ẹ́gẹ́rẹ́kọọ, ḅọ́rọ́ jẹ́ pápáapụ anịgha mininighaapụ wárị sọ ḅo, nnị n ḅẹẹbịgha ḅẹ́ ọmịnị kị́nị́mamgba ọ nọmụarị? 24Kuma ḅọ́rọ́ kị́nị́mamgba ikiakorom sị jẹ́ mininighaapụ sọ ḅo sáá anịgha pápáapụ, n naarị nyẹ ma ḅụ ḅọ́rọ́ nna siiamịẹnyẹ ḅo pághábẹm nnị pịghị nna sịbị ḅụ ḅẹ́rẹ́kọbẹm n náanyẹ ma ḅụ ḅọ́rọ́. 25Nna tẹ́mẹ́bie n kórómanyẹ ma ḅo pághábẹm, n pịghị sịbị tuubẹm sị Tamuno ma tẹ́ghẹ̄ nna sii kiẹarị angaá sị dughoarị ḅẹẹ, <<Tụ́manyẹ Tamuno mịnga ọmịna ogboku bie imi.>>
Nyẹ Fịnị ḅara Sọsị Ma Bie
26Mịị a dughoarị nyẹ ị́yẹ́ amịnáapụ. O kobirimaẹrẹ tẹ́ghẹ̄ ḅụ, gbẹ́rẹ́ḅọ núme nyánam, jụghọ oku nyanam kịrị ẹ́gẹ́rẹ́ ḅẹ́lẹ̄ ḅụ, jụghọ pa n dughonyẹ ma dughofindi. Nnị nyẹ gonyẹ́ gonyẹ́ mịẹbẹm pa sọsị ma mịẹ sẹnịmaa. 27Ḅọ́rọ́ kị́nị́ kịrị ama ḅẹ́lẹ̄ pa ẹ́gẹ́rẹ́ kọọarị mmẹapụ anịgha siḅaá tẹ́rẹ́apụ ẹ́gẹ́rẹ́ẹ́, gbẹ́rẹ́ḅọ gbẹ́rẹ́ḅọ, kị́nị́ pịghị daadugho nyánam. 28Ḅọ́rọ́ daadughoḅọ ofori oforii, ẹ́gẹ́rẹ́arịḅọ ma bịpị gbẹ́ẹ̄ sọsị ma bie sịị ẹ́gẹ́rẹ́kọọ ọḅụ na Tamuno pịrịị.
29Mmẹẹ́ anịgha tẹ́rẹ́ ikiakoroapụ ẹ́gẹ́rẹ́ẹ́, isiapụ warị anị sịbị ḅẹ́rẹ́kọọ. 30Ḅọ́rọ́ diepágháma nyẹ ḅo kpọrọfị́nị́ḅọ pịrị pịrị, parị ẹ́gẹ́rẹ́arịḅọ ma bịpị gbẹ́ẹ̄. 31Ọmịnị kị́nị́mamgba ine ikiakorobẹm, gbẹ́rẹ́ḅọ gbẹ́rẹ́ḅọ, kị́nị́mamgba nyẹ́dáwọ bẹ ḅara sị pịghị tẹ́mẹ́kụ́rọ nyáná. 32Ikiakoroapụ ma tẹ́mẹ́ ikiakoroapụ ma sughubie imi. 33Tamuno ori galagalaḅọgha kụ́ma diin Tamuno.
Anị fịnị ḅara Tamuno túminị́ sọsị mamgba ḅụ. 34Ẹ́rẹ́ámáapụ ma bịpị gbẹ́ẹ̄ sọsị sọsị bie. Nnị kụ́rọ pa n pịrịgha ḅẹẹ nnị ẹ́gẹ́rẹ́ẹ́, kụ́ma sughubie fịnị, ólóghó ma dugho ḅara. 35Nnị ḅọ́rọ́ nyẹ gbíla pághámaḅo dọghụ nnị nna dee gbilaa wárị, tegó anị ḅụ́gịrịrịmanyẹ ọ́rụ́ḅọ ẹ́gẹ́rẹ́ sọsị bie.
36Tamuno ẹ́gẹ́rẹ ma anị ọmịna ḅara sághị ḅoo? Anịgha ọmịnị ngéré anịị anị ḅo ḅụ láapụ? 37Siḅọ fịnịfị́nị́ị́ ḅẹ́ n ḅọ ikiakoroḅọ anịgha ibima tẹ́mẹ́ dienyẹ ma nyánam, anị tumḅọ ma nimi ḅẹ́ a gịẹárị nyẹ ma anịị Kị́nị́nyánáḅọ ma tọ ólóghó. 38Mịma dighi tọ́rụ́siḅọ, ori ma sọ nnị o dighi tọ́rụ́sibẹm.
39Anị ẹrẹ́sị, i jẹa mininiapụ, ikiakoro ọ pụghọ tarị, pịghị kịrị ḅẹ́lẹ̄ pa ẹ́gẹ́rẹ kọọ tọ ma. 40Kụ́ma nyẹ gonyẹ́ gonyẹ́ mịẹ gbụ́nụ́nụ́ma na pịghị karakárá ḅara.
Currently Selected:
1 Kọrịntịapụ 14: IBY
Highlight
Copy
Compare
Share
Want to have your highlights saved across all your devices? Sign up or sign in
©2024 Luke Initiative for Scripture Translation
