Zẹkaraia 10
10
E Nọyaẹnmwa Wẹ Rẹn Gha Miẹn Emwa Fan
1Wa nọ e Nọyaẹnmwa amẹ ne ọ rhọ vbe omuhẹn orhọ. E Nọyaẹnmwa ọ re ọ gie amẹ bi ne ọ na vbe rhọ ne ugbo na maa ne emwa hia. 2Emwa ghi ya gha nọ avbe amazẹ kevbe iran ni bọ, sokpan ewanniẹn ne iran miẹn ohoghe ne ọ mwamwa ọ re ehia khin. Eso ghi gha rhan otọ imina, sokpan, te iran bibi uwa odẹ kẹkan. Ọfumwegbe ne iran rhierre i mwẹ esa. Rhunmwuda ọnii, avbe emwa ni ghi gha hẹ yo hẹ rre zẹvbe ohuan ne ọ wiri. Iran rre uwu orueghe rhunmwuda, ọkaolotu i rrọọ.
3E Nọyaẹnmwa khare wẹẹ, “Ohu avbe erhunmwuyẹn ni khaemwisẹ yan emwa mwẹ wa mu mwẹ, te I ra rri iran oya. Ọghomwẹ ọre ivbi e Juda khin. Mẹ ne Nọyaẹnmwa ne Oghodua ọ re ọ ra gha gbearoghe iran. Iran gha khian ẹsin okuo mwẹ ne mwẹ ẹtin. 4Uwu iran ọ re avbe nikhaemwisẹ gha ke zọ ladian, avbe ọkaolotu kevbe ọkaokuo ni iran gha khaemwisẹ yan emwa mwẹ. 5Ivbi e Juda gha khọnmiotọ zẹ vbe ivbiyokuo ni ya owẹ gbele avbe eghian iran ye uwu ekhuọrhọ vbe adesẹ ore. Iran gha gbinna, rhunmwuda, e Nọyaẹnmwa rrọọ yaba iran, obọ iran gha vbe ke okhunmwu ne ẹsin avbe eghian.
6“I gha ru ẹe ne ivbi e Juda wegbe;
I gha fannọ ivbi Izrẹl vbe irri,
I gha tohan iran,
I ghi viọ ehia werriegbe rri owa.
Iran ghi do yevbe emwa ne I ma he ka he fua ẹdẹ.
Mẹ ọrọre Nọyaẹnmwa ne Osanobua iran,
I gha họn erhunmwu iran.
7Ivbi Izrẹl gha wegbe zẹ vbe ivbiyokuo.
Ẹko, ghi gha rhiẹnrhiẹn iran zẹ vbe emwa ni wa gha da ayọn.
Ivbi uniẹn iran gha ye akhọnmiotọ na rre,
iran ghi gha ghọghọ rhunmwuda emwi ne Nọyaẹnmwa ru.
8“I gha tie emwa mwẹ, I ghi si iran koko.
I gha miẹn iran fan.
I ghi vbe gie iran gha bun zẹ vbe ne iran te ka gha ye.
9A gha rhe miẹn wẹ te I zagha iran gba uhunmwu ẹvbo hia,
sevba iran gha ye mwẹ rre vbe otọe urria nii,
ke iran kevbe ivbi iran gha miẹn uhunmwu iran ghi gba gha die owa.
10I gha viọ iran ke Igipt kevbe Asiria gha die owa
I ghi gbe iran ẹkun sẹ otọ vbe ẹvbo iran.
I gha gbe iran ẹkun sẹ otọ vbe Giliad kevbe Lebanọn.
Emwa gha vuọn otọe nii hia.
11Iran gha la okun orueghe iran gberra khian,
mẹ ne Nọyaẹnmwa gha fi uhuemwẹ ẹzẹ emwi,
odin nọkhua e Naẹl gha khian ne ọ kae.
A gha hie Asiria ne ọ hio uhunmwu rre.
Egbe gha wọ Igipt ne ọ wegbe.
12I gha ru ẹe ne emwa mwẹ wegbe, iran gha ga mwẹ,
iran gha họn ẹmwẹ mẹ.”
E Nọyaẹnmwa guan nẹ.
Currently Selected:
Zẹkaraia 10: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
