Zẹkaraia 11
11
Udemwẹ Ekhọe Dan
1Kie urho ye otọ, Lebanọn,
ne u gie erhẹn do giẹn avbe erhan isida ruẹ hia sẹ otọ!
2Wa gha kpe orhu eve, ne uwa viẹ egbe ua, wa ne avbe agba,
avbe isida dele nẹ, a fuẹn ehia a nẹ ighẹ avbe erhan ni mwẹ eni nii,
wa gha kpe orhu eve, ne uwa viẹ egbe ua,
wa ne avbe okan ni rre Basian!
A gbe ẹe sẹ otọ fẹẹrẹ ighẹ ẹgbo ne ọ wo nii.
3Iran ni khaemwisẹ gha viẹ eve oya, uyi iran fafaa!
Gha họn vbene avbe oduma vannọ hẹ;
ẹgbo ne iran dia vbe ọkpẹn Jọdan, a rẹnkhẹn ehia a!
Avbe Ọsuohuan Eva
4E Nọyaẹnmwa ne Osanobua keghi tama mwẹ wẹẹ, “Mu akpa ọsuohuan ọghe oghẹn ohuan ne a ra ya gbele ua yọ. 5Iran ni yan iran gbele iran, a ma vbe ru iran emwirhọkpa. Iran khiẹnnẹ emiowo iran, iran keghi vbe kha wẹẹ, ‘Wa rho e Nọyaẹnmwa, ma fe nẹ, uhin ighẹ avbe ọsuohuan iran ma tohan iran hiehiere.’ ” 6(E Nọyaẹnmwa khare wẹẹ, “Mẹ i ghi tohan ọmwarhọkpa vbe otọe agbọn ọvbehe. Mẹ tobọ mwẹ gha viọ emwa ni hia ye ẹtin iran ni khaemwisẹ yan iran obọ. Iran ni khaemwisẹ gha duẹ otọ agbọn uan, mẹ i ra vbe wọlọ ẹe hin ẹtin obọ iran rre.”)
7Iran ni dẹlẹe kevbe ni vbe khiẹnnẹ avbe ohuan na, keghi rhie mwẹ vbe iwinna, mẹ keghi khian Ọsuohuan avbe ohuan ne a ra ya gbele ua. I keghi viọ ọkpọ eva mwẹ obọ, I keghi tie ọkpa vbọ “Aro ne ọ maa” kevbe nọkpa “Akugbe.” I na gha gbearoghe avbe oghẹn ohuan nii. 8Egbe avbe ọsuohuan eha ọvbehe ni khuiwu mwẹ keghi wọ mwẹ rhunmwuda ọnii, I na ru iran eheha emwi vbe uki ọkpa kẹkan. 9Vbe iyeke ọnii, I keghi tama oghẹn ohuan nii wẹẹ, “Mẹ i ghi ra gha re ọsuohuan uwa ọvbehe. Gie ni gha wulo vbọ wulo. Ne iran ra fuan vbọ gie iran fuẹn iran uan. Iran ni ghi dekẹe gha gbele egbe iran an.” 10Ẹre I na rhie ọkpọ ne I tie ẹre “Aro ne ọ maa” vbọ, I na bun ẹnrẹn uan, ne I ya ne I ya so ẹe gọ ighẹ ile ne Nọyaẹnmwa gu avbe uhunmwu ẹvbo taa. 11Ẹdẹrriọ ọ re a soo nene ile gọ. Iran ni dele, kevbe ni vbe khiẹnnẹ nene ohuan kegha ghe mwẹ, iran keghi vbe rẹn wẹ, te Nọyaẹnmwa ye emwi ne I ru na gie uhunmwu gie emwa. 12I keghi tama iran wẹẹ, “A deghẹ ọ yẹ uwa, wa ha mwẹ osa uki mwẹ. Sokpan, a deghẹ ọ ma vbe khọn uwa, wa sẹtin rhie emwi uwa.” Rhunmwuda ọnii, iran keghi ha mwẹ igho ẹrọnmwọ ọgban zẹ vbe osa uki mwẹ.
13E Nọyaẹnmwa keghi tama mwẹ wẹẹ, “Viọ igho nii ye aza Ọgua Osa.” Mẹ keghi rhunmwuda ọnii viọ agiẹghẹ igho ẹrọnmwọ ọgban nii, igho ne iran ye ekhọe mwamwa wẹ erriọ ọre I sẹẹ, I keghi viọ iran ye aza Ọgua Osa. 14Iyeke ọnii, I keghi bun ọkpọ ne ogieva ne I tie ẹre “Akugbe” Akugbe ne ọ te rrọ ne Juda kevbe Izrẹl, keghi duẹ ua. 15Ẹre Nọyaẹnmwa na tama mwẹ wẹẹ, “Vbe dọlegbe mu akpa ọsuohuan yọ, ẹghẹ na, ọ ghi gha re ọghe ọsuohuan ne ọmwa oya. 16I rhie ọsuohuan ne ọ gha su ohuan mwẹ, sokpan, ẹ i zẹ ye avbe ohuan ne ọfuan wa sobọ vbe urho ẹre vbọ re, ra ne ọ ya gualọ ne ọ wiri, ra ne ọ sinmwi iran ne a kuan rẹn, ra ne ọ koko ni gha vbe miẹn uhunmwu vbọ. Ne ọ gha na te ru vberriọ. emiowo ọghe ni ti ni rrọ ọre ọ re, ọ ghi gha bannọ iran ibata owẹ hẹ kua. 17Ọghọe fo nẹ ighẹ ọsuohuan ne ọmwa oya nii. Ọ he oghẹn ohuan rẹn ye otọ nẹ. Okuo ọ re ọ ra fuẹn ẹtin ẹnrẹn uan fẹẹrẹ. Obọ ẹre gha luẹluẹ, aro obọ erha ọmwa rẹn gha rhu.”
Currently Selected:
Zẹkaraia 11: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
