Zẹkaraia 9
9
Ibuohiẹn Avbe Ẹvbo Ni Lẹga Iran
1Uhunmwu ne Nọyaẹnmwa giee ọ re ọna khin: Ọ mwamwa oya ne otọe Hedrak nẹ kevbe ore ẹvbo e Damaskọs. Ẹ i re ẹwae Izrẹl ọkpa ọrọre ọghe Nọyaẹnmwa sokpan, rẹn ọre ọ vbe yan igiogbẹ e Siria. 2E Hamat ne ọ rre ọkpẹn Hedrak, rẹn ọ vbe yan rẹn, erriọ vbe nọ ne Saidọn kevbe Taia deba iguemwi iran hia. 3E Taia gba odin ga egbe nẹ, ọ keghi vbe silo esiliva kevbe igoru ni bun sẹrriọ gboo ne egbe ẹre wẹ ehia keghi de vba ya ẹe ru a. 4Sokpan, e Nọyaẹnmwa gha viọ emwi ne ọ mwẹ hia. Ọ gha silo ẹfe ẹre hia ku uwu okun, a gha vbe giẹn ọre ẹvbo nii sẹ otọ. 5Askẹlọn ne ẹvbo gha miẹn ọna, ohan gha mu ẹẹn. Ore Gaza gha miẹn ọẹn, obalọ dan ghi sọ ọre obọ, erriọ Ẹkrọn khian vbe gha ye, idaehọ ẹre hia ghi dihoi rua. E Gaza gha miẹn wẹ rẹn i ghi mwẹ ọba. Emwa hia gha kpao hin Askẹlọn rre. 6Ivbi ẹvbo ne ọ ke eran rre ọ ke eran rre ọ re ọ ra do yin Asdọd. E Nọyaẹnmwa khare, “I gha hie iran uhunmwu rre ighẹ ivbi e Filistin ni wa hio na. 7Iran i ghi ra dọlegbe rri aranmwẹ ke ẹe kevbe esagiẹn ọvbehe, ra avbe evbare awua ọvbehe. Iran hia ni ghi miẹn uhunmwu vbọ gha do khian emwa mwẹ, iran ghi do yevbe ẹwae ọkpa vbe Juda. Ikrọn gha deba usun emwa mwẹ, zẹ vbene emwa Jebus gha ye. 8I gha tobọ mwẹ gha gbe aro ghe ẹvbo mwẹ, I i ghi ra vbe gie ivbiyokuo gha la ẹe gberra. I i ghi ra kue ne emwa dan gha wọ emwa mwẹ uhunmwu ọvbehe. I miẹn vbene emwa mwẹ he rri oya sẹhẹ.”
Ọba Ọghe Ẹdẹnakhuẹ
9Wa gha ghọghọ, wa gha ghọghọ ivbi e Zaiọn!
Wa gha wee ne oghọghọ, wa ne ivbi e Jerusalẹm!
Wa ghe ighẹ ọba uwa dee!
Ọ dee vbe ọmwa ne ọ ru rho obọ, ọ vbe khọnmiotọ.
Sokpan, ọmẹhẹ ne ọ hin ekẹtẹkẹtẹ ne kherhe,
ne sọguọsọguọ rẹn khin.
10E Nọyaẹnmwa khare wẹẹ,
“I gha viọ avbe ikẹkẹ okuo hin otọe Izrẹl rre.
I ghi viọ avbe ẹsin hin e Jerusalẹm rre;
avbe uhanbọ ne a lo vbe okuo, a gha bunnọ ehia a.
Ọba ruẹ gha ru adọlọ ọfumwegbe ye ẹbu avbe uhunmwu ẹvbo;
ọ gha khaemwisẹ ke okun ya sẹ okun ke Ẹzẹ Yufretes kpao yasẹ ehe ne agbọn sẹe.”
A Dọlegbe Viọ Emwa Osanobua Ye Ihe
11E Nọyaẹnmwa khare wẹẹ,
“Rhunmwuda ile ne I gu uwa ta,
ne a ya esagiẹn izọese ye ẹre okhi,
I gha fannọ emwa ruẹn kua.
Lahin otọe uvun iwe ne amẹ i ye rre.
12Wa ni rre iwe, ni ghi mwẹ idaehọ nian,
wa werriegbe gha die owa.
Te imẹ ghi tama uwa nian wẹ I gha ha ukhukhu eva ne uẹn,
deba afiangbe ye oya ne u he re.
13I gha lo e Juda zẹ vbe uhanbọ ovbiyokuo,
kevbe Izrẹl, zẹ vbe ifẹnmwẹ.
I gha lo ivbi e Zaiọn zẹ vbe umọmọ ne I ya gu ivbi e Gris gbinna.”
14E Nọyaẹnmwa gha ya egbe ladian vbe uwu ẹbu emwa rẹn;
ọ gha fi uhanbọ ẹre zẹ vbe ayan.
15E Nọyaẹnmwa ne Oghodua gha degue emwa rẹn.
Iran gha fuẹn eghian iran hia a.
Iran gha davan vbe okuo zẹ vbe emwa ni wọn ohinrre.
Iran gha gbe esagiẹn eghian iran ye otọ ọ ghi gha lẹ okpokpo
zẹ vbe esagiẹn izọese ne a ke ọkpan rhurhẹ yan Ogiukpo.
16Ọ gha sẹ ẹdẹrriọ, e Nọyaẹnmwa gha miẹn emwa rẹn fan.
Zẹ vbene ọsuohuan sinmwi oghẹn ohuan rẹn ladian hin ihe ẹbe rre.
17Umiẹn vbe otọe nii gha ma hẹ!
Umiẹn vbene ọ gha mose hẹ!
Ọka kevbe ayọn rẹn gha ya avbe igbama wan yọ.
Currently Selected:
Zẹkaraia 9: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
