Nọmbas 8
8
Ehe Ne A Viọ Ukpa Yi
1E Nọyaẹnmwa keghi tama e Mosis wẹẹ, 2“Tama Errọn wẹ ọ gha viọ avbe ukpa ihinrọn yan uhunmwu erhan ọmukpa, ọ ghi viọ ẹre yọ vbe ne awanwan rẹn gha na la ghe odaro.” 3Errọn keghi ru vberriọ, ọ na viọ avbe ukpa da odaro avbe erhan ọmukpa nii. 4Igoru ne a ya umọmọ dunmwu ọre a ya ru ẹe ke otọ ya sẹ ukhunmwu vbene ọ ye ighẹ ne Nọyaẹnmwa mu ma Mosis.
Akpehuan Kevbe Ayafiohan Ọghe Avbe Livai
5E Nọyaẹnmwa keghi tama e Mosis wẹẹ, 6“Hannọ avbe Livai ye efẹn ọkpa hin uwu ivbi Izrẹl rre ne u kpe iran huan vbenian: 7sanmwẹ amẹ afọ yan iran, ne u wẹ ne iran zọ eto hin egbe iran hia rre fẹẹrẹ, ne iran vbe họ ukpọn iran. Ẹghẹ nii awua i ghi rre iran egbe. 8Avbe Livai ghi mu ovbi ẹkhuia ẹmila kevbe ihaoko ọka ọghe irhuarhua ne a ye ofigbọn oliv gbe, wẹ ghi mu ẹkhuia ne ogieva ọghe izọese orukhọ mwẹ. 9U ghi tie ivbi Izrẹl hia si koko, ne u viọ avbe Livai ma iran vbe odaro Owa Ukpọn Ile. 10Ivbi Izrẹl ghi viọ obọ iran yan avbe Livai uhunmwu. 11Errọn ghi ye avbe Livai fi ohan mẹ zẹ vbe izẹọhẹ kpataki ke obọ ivbi Izrẹl rre ne iran do gha winna iwinna mwẹ.
12“Iyeke ọnii, avbe Livai ghi viọ obọ iran yan ekhuia ẹmila eva nii uhunmwu, a ghi ya ọkpa vbọ zọ ese orukhọ, a ghi ya nọkpa zọ ese na giẹn uan, ne a miẹn ehe na ru iruemwi akpehuan ne avbe Livai. 13Ye avbe Livai fi ohan mẹ; zẹ vbe emwi ihaoko kpataki, ne u viọ Errọn kevbe ivbi ẹre ye ne ọ gha gbe aro ghe iran. 14Wannọ avbe Livai hin uwu ẹbu ivbi Izrẹl rre vberriọ ne iran miẹn ehe na gha re ọghomwẹ. 15U gha kpe avbe Livai huan nẹ, u na vbe ya iran fiohan mẹ, ẹghẹ nii te iran ghi kei ne ọ gha winna vbe uwu Owa Ukpọn Ile. 16I viọ iran ye ihe emọ ọdiọn ikpia ọghe ivbi Izrẹl, ọghe imẹ ọkpa ọre iran ghi khin. 17Ẹghẹ ne I na gbele emọ ọdiọn vbe Igipt, I keghi ya emọ ọdiọn ikpia ọghe ivbi ẹgbẹe Izrẹl fi ohan zẹ vbe ọghomwẹ, deba emọ ọdiọn ọghe aranmwẹ. 18Banbanna nian, avbe Livai ọ re I ghi viọ ye ihe emọ ọdiọn ọghe ivbi Izrẹl. 19Mẹ keghi viọ iran ne Errọn kevbe avbe ivbi ẹre zẹ vbe emwi izẹọhẹ ke obọ ivbi Izrẹl rre, ne iran gha ru ugamwẹ mẹ vbe uwu Owa Ukpọn Ile ne ivbi Izrẹl, kevbe ne ọ degue iran hin obọ ẹbe ne ọ gha te rruan iran vbe iran a sikẹ Ehe Ne ọ huanrẹn nii gbe.”
20Ẹre Mosis, Errọn ke ẹe kevbe emwa Izrẹl hia ghi na ye avbe Livai fi ohan zẹ vbe ne Nọyaẹnmwa tama e Mosis. 21Avbe Livai keghi khuẹ egbe iran huan, iran na họ ukpọn iran, Errọn keghi ya iran fi ohan zẹ vbe izẹọhẹ kpataki ne Nọyaẹnmwa. Ọ keghi vbe ru iruemwi akpehuan ne iran. 22Ọre avbe Livai ghi na kei vbe emwa ni gha winna vbe uwu Owa Ukpọn Ile vbene Errọn kevbe ivbi ẹre na gbe aro ghe iran.
23E Nọyaẹnmwa keghi tama e Mosis wẹẹ, 24“Ke ọmọ ukpo ekesọgban kpao ọre avbe Livai gha ke gha winna iwinna iran vbe uwu Owa Ukpọn Ile. 25Iran gha ghi sẹ ukpo ekigbe siyeha nẹ, iran ghi ban akpa. 26Vbe iyeke ọnii, iran sẹtin ru iyobọ ne e Livai ne ihua iran vbe iran a gha winna iwinna iran vbe uwu Owa Ukpọn, sokpan, ne iran ghẹ ghi winna iwinna rhọkpa iran ọkpa kẹkan. Erriọ u gha mwamwa iwinna avbe Livai ye ihe dọmwadẹ ọghe ọe.”
Currently Selected:
Nọmbas 8: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
