Nọmbas 9
9
Alagberra Nogieva
1Vbe uki ne okaro ọghe ukpo ne ogieva ne ivbi Izrẹl kpao vbe Igipt rre, e Nọyaẹnmwa keghi gu e Mosis guan vbe Ato Sainai. Ọ wẹẹ, 2-3“Tama ivbi Izrẹl ne iran ru emwiukpo Alagberra. Iran ghi suẹn ọnrẹn vbe ovẹn a dero nẹ vbe ikpẹdẹ ne ogiwenẹ ọghe uki na, zẹ vbene a mwamwaẹn yi.” 4Ọre Mosis na tama emwa nii ne iran ru emwiukpo Alagberra. 5Iran keghi gele ru ẹe vbe uwu ato Sainai, vbe ota ikpẹdẹ ne ogiwenẹ ọghe ukpo ne okaro. Emwa nii keghi ru emwi hia zẹ vbene Nọyaẹnmwa tama e Mosis. 6Sokpan emwa eso rrọ ne awua gha gue rhunmwuda ne iran na ya obọ kan orinmwi; iran ma ghi sẹtin ru emwiukpo Alagberra ẹdẹrriọ. Iran keghi bu e Mosis kevbe Errọn gha khian. 7Iran wẹẹ, “Awua gu ima rhunmwuda ighẹ ma yobọ kan orinmwi, sokpan vbọzẹ ne a ma na gie ima zọhẹ gie Nọyaẹnmwa vbene ivbi Izrẹl nekpa ru yi?” 8E Mosis keghi wanniẹn wẹẹ, “Wa mudia vbene e Nọyaẹnmwa te tama mwẹ vbene I gha ru ẹe hẹ.”
9E Nọyaẹnmwa keghi tama Mosis wẹ. 10Ne ọ tama ivbi Izrẹl wẹẹ, “A deghẹ awua gue uwa ra ivbi uwa rhunmwuda ighẹ iran ya obọ kan orinmwi, ra te iran khian rrei vbe owa rhunmwuda ighẹ iran yo ehe, ighẹ iran ye ho ne iran ru emwiukpo Alagberra, 11a ghi gie iran ru ẹe ke ẹe kevbe oriwo. 12Iran ghẹ gie evbare rhọkpa kẹrre ne ọ ya ẹdẹgbe, iran ghẹ vbe guọghọ ugboloko rhọkpa ọghe aranmwẹ nii. Iran ghi ru emwiukpo Alagberra nii zẹ vbe ilele ni rrọọ hia. 13Sokpan, a deghẹ ọmwa ne awua i gue nọ, ighẹ ọ ma vbe yo ehe rhọkpa, ne ọ ma ru emwiukpo Alagberra, a i ghi vbe kae ba avbe emwa mwẹ, rhunmwuda ọ ma zẹ ọhẹ ni gunmwẹ vbe ẹghẹ ne a mwa yọ. Uhunmwu ẹnrẹn ọre ọ ra ya mu emwi ne ọ gha ke orukhọ ẹre ikian.
14“A deghẹ orhunmwuyẹn ne ọ rre ehe ne uwa ye we rẹn gha ru emwiukpo Alagberra, ọ ghi ru ẹe zẹ vbe emwamwa kevbe ilele ne ọ rrọọ. Uhi ọkpa ni ọre ọ kan emwa hia, ọre ọmọ otọ nọ ra ọrriọvbe.”
Okuku Erhẹn
(Ẹksọdọs 40:34-38)
15-16Vbe ẹdẹ ne a mu Owa Ukpọn Ile ni mudia, okuku ke ghi rre do degue ẹre. Vbe asọn, ọ ke yevbe erhẹn. 17Ẹghẹikẹghẹ ne okuku nii ya kpao vbe ehe ne ọ ye rre, ivbi Izrẹl ghi mu agọ iran kpao, ẹghẹikẹghẹ ne ọ vbe ya tuorre, iran ghi vbe bu agọ iran. 18E Nọyaẹnmwa gha wẹ ne iran si vbe agọ, iran ghi ru vberriọ, ọ gha wẹ ne iran gba agọ iran ghi vbe ru vberriọ. Okuku nii ghẹ ghi mudia ye; uhunmwu agọ ni, iran ghi ye mudia vbe agọ ọkpa nii. 19Okuku ni gha mudia kpẹe vbe agọ nii, iran ghi ru vbe ne Nọyaẹnmwa khare, iran i si kpao. 20Ugbẹnso, omwa ikpẹdẹ eso ọ re okuku nii ya vbe uhunmwu agọ nii, vbene ọ rhirhi gha ye hẹ vbene Nọyaẹnmwa khare iran gha ru deghẹ ne iran mudia vbe agọ nọ, ra ne iran si kpao. 21Ugbẹn eso, ke ota ya sẹ owiẹ ọkpa ọre okuku nii mudia kpẹe sẹ, okuku nii ghẹ ghi vbe si kpao nẹ, iran ghi si okhian. Asọn kevbe avan, ẹghẹikẹghẹ ne okuku nii ya si kpao, iran ghi si okhian. 22Ọre ikpẹdẹ eva nọ, ra uki ọkpa ra ukpo hoho, okuku nii gha ye mudia yan agọ nii, iran i si kpao, ọ gha kpao, iran ghi si okhian. 23Iran gha bu agọ ra te iran si kpao vbe agọ, vbene Nọyaẹnmwa tama e Mosis ne ọ tama iran ne iran ru ọ re nọ.
Currently Selected:
Nọmbas 9: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
