Nọmbas 7
7
Emwi Imuohan Avbe Ekaolotu
1Vbe ẹdẹ ne Mosis wa mu Owa Ukpọn Ile gbọ fo zẹẹ, ọ tue ori ye owa ukpọn nii, ọ keghi vbe ya ẹe fi ohan keẹ kevbe emwi ne a lo vbọ hia. 2Ẹre iran ni re ọka ẹwae, ni re olotu, vbe avbe ẹwae ni rre Izrẹl, iran ni vbe ka ẹvbo nii, 3keghi viọ emwi izẹọhẹ gie Nọyaẹnmwa. Okotọ ehan kevbe ẹkhuia ẹmila iweva, okotọ ọkpa ọghe ọkaolotu eva, ekhuia ẹmila ọkpọkpa ne ọkaolotu ọkpọkpa. Iran ghi viọ ẹre rre nẹ. 4E Nọyaẹnmwa keghi tama e Mosis wẹẹ, 5“Rhan obọ miẹn avbe emwi ihaoko na, ne a lo iran ye iwinna ne a gha winna vbe uwu Owa Ukpọn Ile, viọ ne avbe Livai zẹ vbe iwinna ne iran mwẹ ne iran gha winna.” 6Ẹre Mosis na viọ avbe okotọ kevbe ẹkhuia ẹmila nii ne avbe Livai. 7Ọ keghi viọ okotọ eva kevbe ẹkhuia ẹmila enẹ ne avbe Gẹsiọn. 8Okotọ enẹ kevbe ẹkhuia ẹmila erẹnrẹn ne avbe Merari. Itama ne ovbi Errọn ọre ọ gha giodẹ iwinna ne iran gha winna ma iran. 9Sokpan e Mosis ma viọ okotọ kevbe ẹkhuia ẹmila ne avbe Kohat rhunmwuda izabọ iran ya he avbe emwi nihuanrẹn ne a viọ ne iran gha gbe aro ghe.
10Avbe ọkaolotu keghi vbe viọ emwi rre do ya titi ugie ne a na ya aka nii fi ohan. Iran ghi suẹn gha viọ avbe emwi ihaoko nii rrie aka, 11e Nọyaẹnmwa keghi tama e Mosis wẹẹ, “Dọmwadẹ ọkaolotu ọkpọkpa, ghi gha viọ emwi ihaoko ọghe ọe ne a ya titi ugie ayafiohan aka rre ẹdẹgbegbe la ikpẹdẹ iweva.”
12-83Vbene iran ya gha viọ emwi ihaoko iran rre ọsegbe ọsegbe ọre ọna khin.
| Ikpẹdẹ | Ẹwae | Olotu |
|---|---|---|
| Ne okaro | E Juda | E Nasiọn ne ovbi Aminadab |
| Ne ogieva | Isaaka | E Netanẹl ne ovbi Zua |
| Ne ogieha | E Zẹbulọn | Eliab ne ovbi Hẹlọn |
| Ne ogienẹ | E Riubẹn | Elizọ ne ovbi Siediọ |
| Ne ogisẹn | E Simiọn | E Sielumiẹl ne ovbi Zurisiadai |
| Ne ogiehan | E Gad | Eliisaf ne ovbi Deuẹl |
| Ne ogihinrọn | Ifreim | Ẹlisiama ne ovbi Amihud |
| Ne ogierẹnrẹn | E Manasẹ | E Gamaliẹl ne ovbi Pẹdazọ |
| Ne ogihinrin | E Bẹnjamin | Abidan ne ovbi Gidiọn |
| Ne ogigbe | E Dan | Ahieza ne ovbi Amisiadai |
| Ne ogiowọrọ | Asia | E Pagiẹl ne ovbi Okran |
| Ne ogiweva | E Naftali | Ahira ne ovbi Enan |
Emwi ihaoko ne iran viọ rre kegha rre abọkpa: ọkpan esiliva ne ọ re uwan nekherhe ekigbesiyeha kevbe ọkpan ne wẹwẹrhẹ ọghe esiliva ne ọ re uwan nekherhe ọgban, zẹ vbe ọmwa ne agbọn hia ya mwa emwi; eva na, a ghi ya irhuarhua ne a ya ofigbọn oliv gbe vuọn rẹn ne a ya zọ ese ọghe ọka. Ọkpan nekherhe ọghe igoru ne ọ re uwan nekherhe enẹ, a keghi ya eturari vuọn rẹn, ovbi ekhuia ẹmila ọkpa, ogho ọkpa, kevbe ovbi ohuan ọkpa ne ọ he rre ukpo ọkpa ne a ya zọ ese na giẹn uan, ẹwe ọkpa ne a ya zọ ese orukhọ kevbe ẹkhuia ẹmila eva, ogho isẹn, ẹwe isen, ke ivbi ohuan ni he rre ukpo ọkpa isẹn ne a ya sisara.
84-88A ghi roro emwi ne avbe ọkaolotu viọ rre ne a ya do ugie a ya aka fi ohan, ọ kegha ye nian:
Ọkpan ni dinmwi ọghe esiliva iwe iweva kevbe ọkpan ne wẹwẹrhẹ ọghe esiliva iweva ukhuamwẹ ehia kegha re uwan iyeha (60).
Ọkpan igoru ni dinmwi iweva ne a ya eturari vuọn, ukhuamwẹ ọnrẹn kegha re uwan nekherhe evairre kigbesiyeha.
Ẹkhuia ẹmila iweva, ogho iweva kevbe ivbi ohuan amwẹ ni he rre ukpo ọkpan ke ẹe kevbe izẹọhẹ ọka ni lelẹe khian, ne a ya zọ ese ne a giẹn uan:
ewe iweva ọghe ese orukhọ ẹkhuia ẹmila enẹyanugie, ogho iyeha, ẹwe iyeha, ivbi ohuan ni he rre ukpo ọkpa, iyeha ọghe isara.
89Ẹghẹikẹghẹ ne Mosis ya la uwu Owa Ukpọn Ile nii, ne ọ ya gu e Nọyaẹnmwa guan, ọ ghi họn vbe Nọyaẹnmwa a gha gu ẹe guan ke odukhunmwu ugue Ẹkpẹti Ile, ne ọ rre adesẹneva aranmwẹ eva ni zẹ ifuẹn.
Currently Selected:
Nọmbas 7: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
