Nọmbas 34
34
Ehe Ne Otọe Ni Lae
1E Nọyaẹnmwa keghi ru avbe igiodẹ na ne Mosis. 2Ne ọ ma avbe ivbi Izrẹl re: “Wa gha la otọ Kenan, otọe ne I mu ne uwa, eke ne ọ gha re uwu otọe uwa ọre ena khin. 3Odẹ ekẹn ne ọ rrọọ ghi ke ẹgbo e Zin lele ehe ne otọe Idọm lae gha dee. Ọ ghi suẹn vbe odẹ ekẹn ọghe okun nọwu. 4Ọ ghi la ghe igọgọ ekẹn gha rrie odẹ Akrabim Pas, ọ ghi ye gha khian ya sẹ Zin vbe odẹ ekẹn gban-an ya sẹ Kedẹs Banian. Ọ ghi ke evba rhie uhunmwu da odẹ okuọ ya sẹ Haza Ada gha rrie Azmọn. 5Ọ ghi ke evba rhie uhunmwu da odẹ ẹzẹ vbe Igipt, ọ ghi ya fo vbe Meditẹrrenian.
6“Ehe ne ọ ra sẹ vbe odẹ orrie ọrọre Okun Meditẹrrenian.
7“Ehe ne ọ ra lele vbe odẹ okuọ ghi la uviẹn Meditẹrrenian ya sẹ Oke Họ, ọ ghi ke evba gha rrie Hamat Pas. 8Ọ ghi ye ya sẹ Zẹdad. 9Ke Zifọn, ọ ghi ya fo vbe Haza Enan.
10“Odẹ ahọ vbọ ghi lele uviẹn ke Haza Enan kpao ya sẹ Siefan. 11Ọ ghi gban egbe ghe odẹ ekẹn ya sẹ Habẹl, odẹ ahọ ya Ain, ọ ghi lele evba ya sẹ oke ne ọ rre odẹ ahọ ọghe ikpogho Okun Galili. 12Ọ ghi laghe odẹ ekẹn kevbe Ẹzẹ Jọdan ya sẹ Okun Nọwu.
“Ena ọ gha re ehe ne otọe uwa sẹe vbe igienenẹ.”
13Ẹre Mosis na tama ivbi Izrẹl wẹẹ, “Otọe ne uwa ra yan uta yi ya ghae ọre ọna khin, otọe ne Nọyaẹnmwa ya ne ẹwae ihinrin vbe ukhiọnmwẹ. 14Ẹwae ọghe Riubẹn kevbe Gad kevbe obọkpa ne ọ laghe odẹ ahọ ọghe Manasẹ, ọghe iran sẹ obọ nẹ, ne a ghae ne iran zẹ vbe dọmwadẹ ẹgbẹe. 15Vbe odẹ ahọ ọghe Jọdan, ehe ne ọ na mu aro da e Jẹriko!”
Avbe Ọkaolotu Ne A Mu Ẹmwẹ Otọ Ne A Ghae Na
16E Nọyaẹnmwa keghi tama e Mosis wẹẹ, 17“Eliaza ne ohẹn ne ovbi e Errọn gha guẹ ghae avbe otọe nii kevbe e Jọsua ne ovbi e Nọn. 18U ghi vbe rhie ọkaolotu ọkpọkpa vbe dọmwadẹ ẹwae ni rrọọ ne iran vbe gu iran gha ẹre.” 19-28Vbe nia:
| Ẹwae | Olotu |
|---|---|
| E Juda | E Kelẹb ne ovbi Jefunẹ |
| E Simiọn | E Sielumiẹl ne ovbi Amihub |
| E Bẹnjamin | Elidad ne ovbi Kislọn |
| E Dan | E Buki ne ovbi Jogli |
| E Manasẹ | E Hanniẹl ne ovbi Ẹfọd |
| Ifreim | E Kemuẹl ne ovbi e Siftan |
| E Zẹbulọn | Eliazafan ne ovbi Panak |
| Isaaka | E Patiẹl ne ovbi Azan |
| Asia | Ahihud ne ovbi Sielomi |
| E Naftali | E Pẹdahẹl ne ovbi Amihud |
29Iran na ọrọre emwa ne Nọyaẹnmwa zẹe ne iran gha ghae emwi ne ivbi Izrẹl vbe otọe Kenan.
Currently Selected:
Nọmbas 34: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
