Nọmbas 35
35
Avbe Ẹvbo Ne A Viọ Ne Avbe Livai
1A ghi sẹ otọe nọ rriẹe ọghe Moab vbe iyeke Jọdan vbe a gha ke Jẹriko fian ẹn rra, e Nọyaẹnmwa keghi tama e Mosis wẹẹ, 2“Tama ivbi Izrẹl wẹ ne iran mu ẹvbo eso ne avbe Livai dia deba otọ ne aranmwẹ na rria eso lẹga ẹvbo nii. 3Avbe ẹvbo na ghi do khian ọghe avbe Livai, iran ghi gha yin ẹnrẹn. Ehe ne aranmwẹ na rria nii ghi gha re ne avbe ẹmila iran kevbe avbe aranmwẹ ọvbehe gha na gha rria. 4Otọe erria nii ghi wa ke ekẹn ne a gbe lẹga ẹvbo kpao, ọ ghi gha re ibata arriaeva vbe iyisẹn lẹga egbe. 5A ghi mwa rẹn vbe ne a gha na miẹn wẹ umwọmwẹ nọ vbe igienenẹ, ibata arriaisẹn vbe ehe ne a rhirhi mu aro da vbọ vbe ne ẹvbo nii gha na gha rre adesẹneva. 6Wa ghi mu ẹvbo ehan ne a gha lẹ fi ne avbe Livai, ehe ne ọmwa gha sẹtin lẹ gha rrie a deghẹ ọ gbe ọmwa ran vbe ne ẹi na re ẹmwẹ ọnrẹn, wa ghi vbe mu ẹvbo eva yan iyeva ọvbehe ba iran ẹre. 7Ehia ghi do gha re eva irrọvbe kigbesiyeha (48) kẹe kevbe ehe ne avbe aranmwẹ na rria ni rrọ. 8Vbene ẹwae kpọlọ ọre a gha ya gha ta ẹvbo ne a gha mu ne avbe Livai.”
Avbe Ẹvbo Ne A Le Fi
(Diuteronomi 19:1-13; Jọsua 20:1-9)
9E Nọyaẹnmwa keghi tama e Mosis wẹ ne ọ, 10tama ivbi Izrẹl wẹẹ: “Wa ghẹ ghi fian Jọdan rra nẹ, wa na la otọe Kenan, 11wa ghi zẹlẹ ẹvbo ne ọmwa gha a lẹfi a deghẹ ọ gbe ọmwa ran vbe nẹ i na re ẹmwẹ ọnrẹn. 12Evba ọre ọ gha na miẹn uhunmwu vbe obọ etẹn ọmwa ne ọ wu nii, ni ho ne iran rria ikhi. A ghẹ ghe ọmwa ne a ba ẹre ifi ẹzọ izigha rua vbe ẹi re te a gui ẹzọ ẹre nẹ vbe sirra emwa hia.
13“Wa zẹlẹ ẹvbo ehan. 14Eha vbe odẹ ekẹn Jọdan kevbe eha vbe otọ Kenan. 15Ena ghi gha re ehe ne a na lẹfe ne ivbi Izrẹl ra avbe orhunmwuyẹn ni do yin ẹvbo nii vbe ovbi ẹghẹ kherhe ra te ọ wa do yin ọghe etẹbitẹ. Ọmwa ne ọ gbe ọmwa ran vbe ne ẹi na re ẹmwẹ ọnrẹn, sẹtin lẹ gha rrie ọkpa vbọ. 16-18Sokpan, a deghẹ ọmwa ya emwi igbinna gbe ọmwa ran, a deghẹ ematọn nọ ra okuta ra erhan, ọ rriabe izigha, te a gha gbẹe rua. 19Ọtẹn ọmwa ne ọ wu nii, ne ọ ghi sikẹ ọre sẹ ọ re ọ bi ye ọre egbe ne ọ gbe ọmwa ne ọ de izigha nii uan. Ọ gha miẹn ọẹn, ọ ghi gbẹe.
20“A deghẹ ohu ọmwa mu ọmwa, ọ na gbe ẹe rua, ọ re te ọ sua ẹre gbotọ nọ ra te ọ fi emwi gbe ẹe. 21Te ọ gbe ẹre ekpa, te ọ de izigha, a ghi gbe ẹe rua. Ọtẹn ọmwa ne ọ wu nii ne ọ ghi sikẹ ọre sẹ, ọ re ọ bi ye ọre egbe ne ọ ghi gbe ẹe rua, ighẹ izigha nii, ehe ne ọ rhirhi na miẹn ọẹn, ọ ghi gbẹe rua. 22Sokpan, gia kha ghẹ ọmwa ghe ọmwa ne iran i gba mwẹ egbe ẹzọ rua, ọ re te ọ sua ẹre gbe otọ ra te ọ fi emwi gbe ẹe. 23Ra ne a kha wẹẹ, te ọmwa fi okuta gbe ọmwa ran vbe ne ọ ma na bẹghe ẹre, ra vbe ne ọ ma na zẹ iro ikuan egbe ghe ẹre, ra ọmwa ne ẹ i re oghian rẹn. 24Ọ gha ye vberriọ, ẹvbo ghi bu ohiẹn ne ọmwa ne ọ gbe ọmwa nii uan, i ghẹ ẹ i re etẹn ọmwa nọ wu nii, ni ho ne iran rria ikhi. 25Ẹvbo ghi wọlọ ọmwa ne ọ de izigha ọyẹvbu nii hin obọ etẹn ọmwa nọwu nii rre, a ghi gie ẹre werriegbe gha rrie ẹvbo ne a lẹgbinna nii, ehe ne ọ lẹ gha rrie. Ọ ghi gha rre evba ogie ohẹn ne ọ rrọọ vbe ẹghẹ nii te do wu.
26“A deghẹ ọmwa ne ọ de izigha ọyẹvbu nii kpao hin ẹvbo ne ọ lẹ gha rrie, 27ọ re etẹn ọmwa nọwu nii na miẹn ọẹn, iran na gbẹe rua, egbe irria ikhi vberriọ a i tie ẹre izigha. 28Ọmwa ne ọ de izigha ọyẹvbu nii ghi gha rre ẹvbo ne a lẹgbinna ne ọ ye, ogie ohẹn ne ọ rrọ te do wu, sokpan vbe iyeke ọnii, ọ sẹtin dọlegbe gha die owa. 29Uhi na dekun uwa kevbe avbe ivbi uwa, eheikehe ne uwa a rhirhi gha ye.
30“A gha ba ọmwa ifi ẹzọ izigha, a ghẹ bu ohiẹn uwu gbẹe vbe i re te a mi osẹe eva ra ni bu sẹ ọnii, osẹe arhiọnkpa ma sẹ ne a gha ya bu ohiẹn izigha. 31Te a gha gbe izigha rua. Ẹ i sẹtin zẹ igho ya fan egbe ẹre fua vbọ. 32A ghẹ gie ọmwa ne ọ lẹ gha rrie ẹvbo ne a lẹgbinna zẹ igho ne ọ miẹn ehe na gha die owa ogie ohẹn ne ọ rrọọ te do wu. 33Wa gha ru ẹe vberriọ, wa gha mu awua ye otọ ne uwa ye. Te izigha si awua rrie ẹvbo, odẹ ne a la họnmwẹ otọ ne a na de izigha ne awua lahin rre irrọọ gberra ne a gbe izigha ni uan.” 34Wa ghẹ mu awua ye otọ ne uwa ye, rhunmwuda mẹ ne Nọyaẹnmwa deba ẹre, te imẹ rre uwu ẹbu ivbi Izrẹl.
Currently Selected:
Nọmbas 35: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
