Nọmbas 33
33
Okhian Ne Iran Khiaẹn Ke Igipt Gha Rrie Moab
1Ehe ne avbe ivbi Izrẹl na gbe agọ vbe iran kpao vbe Igipt rre vbene Mosis kevbe Errọn na gha viọ iran khian ọre ena khin. 2Zẹ vbene Nọyaẹnmwa tama rẹn, e Mosis kegha gbẹnnẹ eni ehe ne iran na gbe agọ hia ye otọ.
3Ikpẹdẹ ekesugie vbe uki ne okaro ọghe ukpo ẹdẹ ne ọ lele Alagberra ne okaro, ọ re ivbi Izrẹl na kpahin Igipt rre. Vbene Nọyaẹnmwa na degue iran, iran keghi si kpao vbe ẹvbo Ramesis vbe sirra ivbi Igipt hia. 4Vbe iran wa re emọ ọdiọn iran ne Nọyaẹnmwa gbele ua. Ọ keghi ye emwi ne ọ ru na rhiema wẹ rẹn mwẹ ẹtin sẹ avbe ẹbọ Igipt.
5Ivbi Izrẹl ghi kpa vbe Ramesis rre, iran na ya gbe agọ vbe Sukọt. 6Iran ghi kpa vbe Sukọt rre, iran na ya gbe agọ ye Etam vbe a khian la ẹgbo fo. 7Evba iran keghi werriegbe gha die Pi-Hahirọt vbe odẹ ahọ ọghe Baal Zefọn, iran keghi gbe agọ ye ọkpẹn Migdọl. 8Iran ghi kpao vbe Pi-Hahirọt rre, iran keghi la odẹ okun Nọbaa gberra la uwu ẹgbo. Iran ghi ya ikpẹdẹ eha khian la uwu ẹgbo Etam, iran keghi ya gbe agọ ye Mara.
9Iran ghi kpao vba, iran kegha rrie Ẹlim; iran na vbe gbe agọ ye evba rhunmwuda; ẹzẹ iweva kevbe udin ekigbe siyenẹ kegha rre evba. 10Iran keghi kpa vbe Ẹlim rre, iran na ya gbe agọ ye ọkpẹn Ẹzẹ Suẹz. 11Ehe ne iran na vbe yakọ kegha re ẹgbo Sin. 12Iran keghi vbe ya gbe agọ ye Dọfka. 13Iyeke ọnii, iran kegha rrie Alus. 14Iran keghi ke evba gha rrie Rẹfidim, ehe ne emwa nii na ma miẹn amẹ wọn.
15-37Ke Rẹfidim ya sẹ Oke Họ, iran ke gbe agọ ye avbe ehe ne a ra sunu yi na: Ato Sainai, Kibrot Hatava, (ra Idin Orriarria), Hazẹrot, Ritma, Oke Ramọn Pẹrẹs, Libna, Risu, Kehelata, Oke Siẹfa, Harada, Makalot, Tahat, Tẹra, Mitka, Hasmona, Moserot, Bene Jakan, Họ Hagidgad, Jotbata, Abrona, Eziọngeba, ẹgbo Zin (ọnii nọ wẹ Kedẹs) kevbe Oke Họ ne ọ rre ọkpẹn otọe Idọm.
38-39Vbe ikpẹdẹ ne okaro vbe uki ne ogisẹn ọghe ukpo iyeva ne Izrẹl kpao vbe Igipt rre, Errọn ne ohẹn keghi hin Oke Họ zẹ vbene Nọyaẹnmwa tama rẹn, ọ keghi wu vbe evba vbe ọ rre ọmọ ukpo eha yan iyehan (123).
40Ọba Arad ne odẹ ekẹn Kenan keghi họn wẹ ivbi Izrẹl dee. 41-49Ke Họ ya sẹ otọ ne ọhẹnhẹn ọghe Moab, ehe ne ivbi Izrẹl na gbe agọ ọre ena khin: Zalmona, Punọn, Obọt, itowa Abarim vbe otọe Moab, Dibọn Gad, Almọn Diblateim, Oke Abarim vbe ọkpẹn oke Nebo kevbe otọe ne ọ rriẹe ọghe Moab ne ọ rre iyeke Jọdan vbe a gha fiaẹn rra vbe Jẹriko, vbe ẹkpo Bẹt Josimot kevbe Iya Akasia.
Ude Ne A Buru Iran Te Fian Jọdan Rra
50A ghi sẹ otọe ne ọ rriẹ ọghe Moab ne ọ rre iyeke Jọdan vbe a gha la Jẹriko, e Nọyaẹnmwa keghi ru avbe igiodẹ na ma e Mosis. 51Ne ọ tama avbe ivbi Izrẹl wẹẹ, “Wa gha fian Jọdan rra gha rrie otọe Kenan, 52wa ghẹ mwẹ wa ma khulo emwa ni rre otọe nii hia hinrre. Wa ghi dunmwu amazẹ iran ne a ya okuta ra ematọn ru ruan, deba ehe ne iran na ga hia. 53Wa mu otọe nii ne uwa yin ẹnrẹn rhunmwuda te I ya ẹe ne uwa. 54Wa ghi ghae otọe nii gba dọmwadẹ ẹwae kevbe uniẹn ni rrọọ obọ, a ghi mu ne ọkpọlọ ne ẹwae ne ọkpọlọ, kevbe ne kherhe ne ẹwae ne kherhe. 55Sokpan, a deghẹ wa ma khulo emwa ni rre otọe nii ladian, iran ni kẹe rre vbọ, te iran ra gha ye vbe iku dan vbe aro uwa, kevbe igban vbe efẹn uwa, iran gha vbe guwa gbinna. 56A deghẹ wa ma khulo iran ladian, vbene I khare I gha fuan iran an, erriọ I ra fuẹn uwa a.”
Currently Selected:
Nọmbas 33: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
