Mak 4
4
Itan Ọkemwiokọ
(Matiu 13:1-9; Luk 8:4-8)
1Jesu keghi vbe gha ma emwa emwi vbe ọkpẹn odighi ọghe Galili. Emwa ni si koko ye ehe ne ọ ye keghi bun sẹrriọ wẹ te irẹn ghi la uwu okọ ya tota. A keghi sua okọ nii la uwu ẹzẹ. 2Rẹn keghi ya itan ma iran emwi ni bun, ọ tama iran wẹẹ:
3“Wa danmwehọ, vbe ẹghẹ ọkpa, ọmwa ọkpa keghi ya kọ emwiokọ. 4Ugbẹn vbe ọ ghi kọ ẹe khian, eso dele ye adesẹ odẹ, avbe ahianmwẹ keghi wa do rhọ ẹre re. 5Eso vbọ dele ye uhunmwu okuta, ehe ne ekẹn i mobọ ye. Ẹgiẹgiẹ na, ọ keghi wa zọọ, rhunmwuda ighe ọ ma dinmwi vbe uwu otọ. 6Sokpan ugbẹn vbe ovẹn ghi yan rre, ọ keghi giẹn emwiokọ ne ọ da zọ nii, rhunmwuda ighe inian rẹn ma he la uwu otọ ẹse, wanwan na, ọ na wa kakaa. 7Eso vbe emwiokọ ni na kharha ku uwu igban. Igban keghi khuakhua enii gbua, iran ma sẹtin mọ. 8Sokpan, emwiokọ eso keghi kharha ye ehe ne ọ maa, enii keghi zọọ, iran wan rẹn, iran keghi mọ ẹsẹse, eso ọgban, eso iyenẹ, eso iyisẹn.”
9Jesu keghi gbe ẹe wanniẹn wẹẹ, “Ọmwa ne ehọ họn ẹre ẹmwẹ, gi ẹe họn.”
Emwi Ne O Si Avbe Itan Na Rre
(Matiu 13:10-17; Luk 8:9-10)
10Ọ ghi kẹe Jesu ọkpa, iran eso vbe uwu emwa ni gha danmwehọ ẹre keghi lele avbe erhuanegbe bu ẹre gha dee, iran na wẹ ne ọ rhan otọ itan nii ma iran. 11Jesu wanniẹn tama iran wẹẹ, “Wa na ọre a ta oro ẹmwẹ Arriọba Osanobua ma sokpan, iran hia ni rre ore, itan ọre a ya gu iran guan. 12Na miẹn ehe na miẹn wẹẹ:
“ ‘Vbe ne iran gha ghe sẹ, iran i bẹghe!
Vbene iran gha danmwehọ sẹ, iran i rẹn otọ ẹre,
ne iran ghẹ ya fi ekhọe werriẹ bu Osanobua,
rẹn ghi vbe do ya bọ iran.’ ”
Jesu Rhan Otọ Itan Ọkemwiokọ
(Matiu 13:18-23; Luk 8:11-15)
13Jesu keghi nọ iran wẹẹ, “Wa ma rẹn otọ itan na ra? De itan ne uwa gha sẹtin rẹn otọ ẹre khekherriọ? 14Ọkemwiokọ ọre ọ kọ ẹmwẹ Osanobua. 15Ugbẹnso, eso ghi kharha ku adesẹ odẹ. Iran na họn ne ne ẹmwẹ sokpan, vbe ọwarọkpa ni Setan ghi do rhie ẹmwẹ ni hin iran ekhọe rre. 16Emwa ọvbehe ye vbe emwiokọ ni kharha ye otọ okuta. Vbe ọwarọkpa vbe iran họn ẹmwẹ nii, iran ya oghogho rhan obọ miẹn ẹnrẹn. 17Sokpan ọ ma la iran ekhọe ẹse, ẹ i vbe tọ. Ugbẹn vbe orueghe kevbe ukpokpo ghi rre rhunmwuda ne ne ẹmwẹ, emwa na keghi wa zẹgiẹ kie werriegbe. 18Emwa eso vbe ye vbe emwiokọ ni kharha ye uwu igban. Iran na ọrọre emwa ni họn nene ẹmwẹ. 19Sokpan orhikhan ẹmwẹ agbọn na, ẹmwẹ ẹfe, kevbe emwi ni ghi viẹn ye emwa aro hia, keghi hihiẹ rre, iran keghi khuakhua ẹmwẹ ni gbua, ọ ma ghi mọ. 20Sokpan emwa ọvbehe eso yevbe emwi ne a kọ ye otọ ne ọ maa. Iran họn ẹmwẹ nii, iran rhan obọ miẹn ẹnrẹn, iran keghi mọ, eso ọgban, eso iyeha, eso iyisẹn.”
Ukpa Ne A Rhie Ọkpan Rhu
(Luk 8:16-18)
21Jesu keghi rhie tẹe wẹẹ, “Wa he miẹn ehe ne ọmwa gha na rhu ukpa nẹ, ọ ghi ya ọkpan rhu ẹe ginna otọ, ra ne ọ mu ẹn ye ototọ ukpo ne a vbiẹ? Ẹ i re uhunmwu erhan ọmukpa ọre a mu ẹn yi. 22Emwikemwi ne a guere hia gha khian ne a were ua. 23Ne ehọ ẹre họn ẹmwẹ gie ẹe họn.”
24Rẹn keghi vbe tama iran wẹẹ, “Wa gha ya emwi ne uwa a rhirhi họn ẹro, uviẹn ne uwa lele bu ohiẹn emwa ọvbehe, ọre Osanobua ra vbe lele bu ohiẹn uwa, ne a kha wẹ, vbe obọ ne ọ tọn sẹ. 25Ọmwa ne ọ mwẹ emwi ọre a gha viọ ba ẹre re, ọmwa ne ẹ i mwẹ, emwi kherhe ne ọ te mwẹ, a gha wa miẹn ẹre re.”
Itan Emwiokọ Ne Ọ Wan Ladian
26Jesu keghi kha wẹẹ, “Arriọba Osanobua ye vbe okpia ọkpa ne ọ ya kọ emwi ye ugbo ẹre. 27Asọn gha ghi rre, ọ ghi ya lovbiẹ, ẹdẹ gha gbe, ọ ghi vbe gha ru ne ọ sẹ ọre egbe vbe uwu ẹghẹ na hia, emwiokọ nii ghi gha zọ, ọ ghi vbe gha wan. Sokpan, ọ ma rẹn vbene ọ ya sunu hẹ. 28Otọe tobọ ẹre ọre ọ ya nene emwiokọ zọ, ne ọ na vbe mọ; okaro, ọ ghi zọ ukhu ladian, vbe iyeke ọnii, ọ ghi gbe ihiagha, vbe okiekie ehia, ọka ne ọka ghi ladian. 29Emwiokọ ghẹ ghi wo nẹ, rẹn ghi rhie emwi ne a ya rhọ emwiokọ ladian, rhunmwuda ẹghẹ emwiorhọ sẹ nẹ.”
Itan Ikpẹ Mọstad
(Matiu 13:31-32, 34; Luk 13:18-19)
30Jesu keghi nọ wẹẹ, “De emwi ne a gha ya Arriọba Osanobua gie? De itan ne a gha kpa ya rhan otọ ẹre? 31Ọ ye vbe ikpẹ mọstad ne ọ re ikpẹ emwiokọ ne ọ kanmwa sẹ vbe agbọn na. Okpia ọkpa keghi rhie ẹre ya kọ. 32Ọ ghi kpee kherhe, ọ keghi wan ẹsẹse, ọ na khian ne ọ ghi kpọlọsẹ vbe uwu ivbi erhan hia. Ọ keghi zẹlẹ abọ ni kọnkọn ladian, sẹrriọ ne avbe ahianmwẹ na do gha bọlọ oko ye irhu ne ọ gbe.”
33Egbe itan vbenian, ọre Jesu ya gha kpe orhu ma emwa, ọ kegha kpae ma iran vbene iran gha sẹtin rẹn otọ ẹre. 34Rẹn i vbe ta ẹmwẹ ọkpa fua ma iran vbe ẹ i re te ọ kpa ẹre itan, sokpan ọ ghẹ ghi kẹ irẹn kevbe avbe erhuanegbe ẹre ọkpa, ọ ghi rhan otọ emwi hia ma iran.
Jesu Dọ Ẹhoho Yọ
(Matiu 8:23-27; Luk 8:22-25)
35Vbe ota ẹdẹ ọkpa nii, Jesu keghi tama avbe erhuanegbe ẹre wẹẹ, “Wa gia fian odighi rra ghe obọ nọkpa.” 36Iran keghi sẹ avbe emwa ni gbe ẹbu ye evba rae, iran keghi la okọ ne Jesu tota yi, iran keghi gba gha khian. Okọ ọvbehe eso kevbe gha rre evba. 37Ẹhoho ne ọ wo vbe egbe keghi wa suẹn gha hoho, amẹ na gha vba la okọ sẹrriọ wẹ te amẹ ghi te ra vuọn ẹnrẹn. 38Jesu kegha rre odieke vbe okọ, ọ mu uhunmwu yan ukohunmwu gha vbiẹ. Avbe erhuanegbe keghi ya huẹn ọnrẹn, iran wẹẹ, “Ọmamwaemwi, ghe ighe ma ra wulo.” 39Jesu keghi guakpao, ọ tama ẹhoho wẹẹ, “Dobọ owogho yi!” Ọ keghi vbe tama ogbigbi amẹ wẹẹ, “Hunwan hi i i!” Ẹhoho keghi wa dọyọ, ehe hia keghi ye hi i i. 40Ẹkpo ni ọre Jesu ghi na tama avbe erhuanegbe ẹre wẹẹ, “Vbọzẹ ne uwa na runran vberriọ yi? Wa i ye mwẹ iyayi?”
41Sokpan ohan na wa mu iran ẹsẹse, iran keghi suẹ gha tama egbe iran wẹẹ, “De ama ọmwa ne ọna khin? Ke ẹhoho, kevbe ogbigbi amẹ wa họn ẹmwẹ nẹẹn.”
Currently Selected:
Mak 4: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
