Mak 3
3
Okpia Ne Obọ Ẹre Sikuẹn
(Matiu 12:9-14; Luk 6:6-11)
1Jesu keghi werriegbe gha rrie Ọgua ediọn, okpia ọkpa ne obọ ẹre sikuẹn kegha rre evba. 2Emwa eso ni gualọ ehe ne iran gha na mu ẹmwẹ kuan Jesu keghi vbe rre evba. Rhunmwuda ọnii iran kegha bae deghẹ ọ gha sinmwi ọkhọnmwọ nii vbe Ẹdẹ Ikẹtin. 3Jesu keghi khama ọmwa ne obọ ẹre luẹluẹ nii wẹẹ, “Gberra ghe odaro,” 4Rẹn keghi nọ avbe emwa nii wẹẹ, “De emwi ne uhi ima fan obọ ẹre ne ọmwa ne a gha ru vbe Ẹdẹ Ikẹtin yi? Emwi dan ra emwi esi? Ne a sinmwi ọmwa ye agbọn ra ne a fuẹn ọnrẹn uan?” Sokpan iran ma zẹ ẹmwẹ wanniẹn ọẹn. 5Ohu keghi mu Jesu vbe ọ wa ghe iran lẹga sokpan ọ keghi vbe dae ẹsẹse ne iran rhunmwuda iran ba odẹ ku, iran keghi vbe ze vbe ẹkoko udu rhunmwuda ọnii rẹn tama ọmwa ne obọ ọre sikuẹn ni wẹ, “Niẹn obọ ua.” Rẹn keghi nien rẹn, ọ na do gha maa. 6Vbe ọwarọkpa nii avbe Farisi keghi kpao vbe Ọgua ediọn rre, iran keghi ya gu eso vbe uwu avbe ekpayẹ Hẹrọd si uma vbene iran gha ya ghe Jesu hẹ.
Emwa Si Mama Ye Ọkpẹn Odighi
7Jesu kẹe kevbe erhuanegbe ẹre kegha rrie ọkpẹn odighi e Galili, emwa ni bun keghi wa vbe bi lele ẹe, eso ke Galili rre eso ke Judia rre. 8Eso ke Jerusalẹm kevbe isoko Idumia, kevbe ẹvbo ni rre iyeke nọkpa ọghe Jọdan kevbe iwewe Taia kevbe Saidọn. Emwi ne ọ ya iran na hia gha dee ọrọre otiti Jesu ne iran họn ẹn. 9Emwa bun sẹrriọ zẹẹ ne Jesu ghi na wẹ ne avbe erhuanegbe mu okọ ne irẹn, ne emwa ghẹ ya khuakhua ẹe gbe ua. 10Ọ ka sinmwi avbe ọkhọnmwọ ni bun nẹ, rhunmwuda ọnii, avbe ọkhọnmwọ hia kegha yẹn egbe bu ẹre ne iran miẹn ehe na ya obọ kan rẹn. 11Iran ne orhiọn esu rre uwu iran gha wa bẹghe ẹre, iran ghi de fianmwẹ otọ, iran ghi datu wẹẹ, “Wẹ ọrọre Ovbi Osanobua.”
12Jesu keghi yi iyi ne avbe orhiọn esu ni khuankhuanankhuan ne iran ghẹ ta ọmwa ne irẹn khin ma emwa.
Jesu Zẹ Avbe Ukọ Iweva
(Matiu 10:1-4; Luk 6:12-16)
13Jesu keghi hin uhunmwu oke, ọ keghi tie iran ne ọ yẹ ọre rrie egbe, iran keghi bu ẹre gha khian. 14Rẹn keghi hannọ iran iweva, ọ keghi tie iran Ukọ, ọ tama iran wẹẹ, “Te I zẹ uwa ne uwa tota ke mwẹ, I gha vbe gha gie uwa ne uwa ya gha kpe orhu. 15Wa gha vbe gha mwẹ asẹ ne a ya khulo avbe orhiọn esu ladian.” 16Iran iweva ne ọ zẹẹ ọrọre Saimọn (Jesu keghi he ẹre Pita); 17Jems kẹe kevbe Jọn ne ọtẹn ọnrẹn (Jesu keghi he iran Boanigis, ọnii nọ wẹ, “Ivbi avan Nukhunmwu”); 18Andru, Filip, Batolomiu, Matiu, Tọmọs, Jems ne ovbi Alfiọs, Tadiọs, Saimọn ne oya-a-ya-sinmwi-ẹvbo-ọmwa, 19kevbe Judas Iskariọt ne ọ ghi do rhie ẹre maa.
Jesu Kevbe Bẹlzibọb
(Matiu 12:22-32; Luk 11:14-23; 12:10)
20Jesu keghi kpao gha rrie owa. Emwa ni vbe vẹ bu ẹre rre keghi vbe bun sẹrriọ wẹẹ Jesu kevbe avbe erhuanegbe ẹre ma ghi miẹn otọ na rri evbare. 21Ugbẹn vbe etẹn ọnrẹn ghi họn ẹmwẹ na, iran na gha khian ne iran ya rhie ẹre rhunmwuda te emwa hia ghi tae khian wẹẹ, “Te ọ mwẹmwẹ.”
22Avbe emamwaemwi Uhi eso ni ke Jerusalẹm rre kegha tae khian wẹẹ, “Bẹlzibọb ọre ọ hin ẹnrẹn.” Eso keghi vbe gha kha wẹ “Ọkaolotu avbe orhiọn esu ọre ọ rhie ẹtin nẹ ne ọ ya gha khulo avbe orhiọn esu ladian.” 23Jesu keghi rhunmwuda ọnii tie emwa nii rrie egbe, ọ keghi kpa itan eso ma iran wẹẹ, “Vbe Setan ra khu e Setan ladian hẹ yi? 24A deghẹ ẹvbo ọkpa gha egbe ye otu otu gha gu egbe khọn, te ẹvbo nii ra zagha a. 25A deghẹ ẹgbẹe ọkpa vbe fian egbe ye otu otu gha gu egbe khọn, te ẹgbẹe nii ra zagha a. 26Rhunmwuda ọnii, deghẹ arriọba e Setan fian egbe ye otu otu gha gu egbe khọn nẹ, ẹ i ghi tọ, te ọ ra zagha a, ọ ghi wa gbe ẹro.
27“Ọmwa ọkpa ne ọ gha sẹtin gbe egbe la owa okpia ne ọ wo vbe egbe ne ọ ya fu ẹre emwi viọ, ẹ i rrọọ, sokpan a ma wẹ ọ ka mu okpia ne ọ wo vbe egbe nii gba nẹ, iyeke ọnii, ọ sẹtin ya fu ẹre emwi ni rre ẹre owa viọ.
28“Wa rhie ẹmwẹ na ye ekhọe! Orukhọ ke orukhọ, ne ọmwa a rhirhi ru, ra ẹmwẹ dan ke ẹmwẹ dan ne ọmwa a rhirhi guan, a gha ya bọ ẹe. 29Sokpan ọmwa ne ọ kpa unu ghe Orhiọn Ne Ọ Huanrẹn, a i ra ya bọ ẹe ẹdẹdẹmwẹdẹ rhunmwuda orukhọ etẹbitẹ ọre ọ ru.” 30(Rhunmwuda ne emwa eso na gha kha ighe ọ mwẹ orhiọn esu ọre ọ ya Jesu ta ẹmwẹ na.)
Iye Jesu Kevbe Etẹn Ọnrẹn Nikpia
(Matiu 12:46-50; Luk 8:19-21)
31Ẹghẹ ni, iye Jesu kevbe etẹn ọnrẹn nikpia keghi rre. Iran mudia vbe ore, iran gie ne a ya nọ ẹmwẹ ọnrẹn gie iran. 32Ehe ne emwa na gbe ẹbu lẹga Jesu ni, iran do tama rẹn wẹẹ, “Iye uẹ kevbe etuẹn nikpia mudia vbe ore, iran nọ ẹmwẹ ruẹn.”
33Jesu wanniẹn wẹẹ, “De ọmwa ne ọre iye mwẹ, de emwa ni rre etẹn mwẹ nikpia?” 34Ọ keghi tọn aro mu ghe iran ni tota lẹga ẹre, Ọ wẹ, “Ena ọre iye mwẹ kevbe etẹn mwẹ nikpia. 35Rhunmwuda, ọmwaikọmwa ne ọ ru emwi ne Osanobua ho ọrọre ọtẹn mwẹ nokpia, ọtẹn mwẹ nokhuo kevbe iye mwẹ.”
Currently Selected:
Mak 3: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
