Mak 5
5
Jesu Sinmwi Ọmwa Ne Ọ Mwẹ Avbe Orhiọn Esu
(Matiu 8:28-34; Luk 8:26-39)
1Iran keghi do sẹ asefẹn nọkpa ọghe odighi e Galili vbe isoko Gadara. 2Jesu ghi tuorre vbe okọ, okpia ọkpa keghi ke uwu uvun okuta ni rre itẹ do vba ẹre. Okpia na keghi mwẹ avbe orhiọn esu. 3Itẹ ọre ọ wa dia. A i ghi miẹn ọmwa ne ọ sẹtin ya ọgiọrọ mu ẹn gba. 4Ẹghẹ ni bun ọre iran he ya ye ọgiọrọ rro ẹre obọ kevbe owẹ, sokpan ọ ghi giagia eghan ne ọ rre ọre obọ, ọ ghi vbe bunnọ ọgiọrọ ne ọ rre ẹre owẹ hẹ kua. Ẹtin ẹnrẹn sẹrriọ wẹ, a i ghi miẹn ọmwa ne ohan gie ẹe yinmwiẹn. 5Ke asọn kevbe avan, ọre ọ ya hẹ yo yẹ rre vbe uwu itẹ kevbe uhunmwu oke, ọ ghi gha goo, ọ ghi gha ya okuta giagia egbe ẹre.
6Urria ọre ọ na bẹghe Jesu, ọ keghi rhulẹ bu ẹre, ọ diguẹ nẹ ẹn. 7Ọ keghi datu wẹẹ, “Jesu Ovbi Osanobua Ne Ọ Yo Sẹ, vbe ọ so mwẹ so uẹ? I ya Osanobua rinmwian, ghẹ rriọ mwẹ oya.” ( 8Ọ ta ẹmwẹ na rhunmwuda ne Jesu na gha tama rẹn wẹẹ, “Orhiọn esu, kpa hin uwu okpia na rre.”)
9Rhunmwuda ọnii, Jesu nọ rẹn wẹẹ, “Vbe a tie ruẹ?” Okpia ni wẹẹ, “Oghẹn, rhunmwuda ma wa bun ẹsẹse.” 10Ọ keghi gha rinmwian Jesu ne ọ ghẹ khu avbe orhiọn esu ni hin ẹdogbo ni rre.
11Oghẹn nọkhua ọghe esi ebo kegha rria vbe ọkpẹn oke vbe evba. 12Avbe orhiọn ni keghi rinmwian Jesu wẹẹ, “Gie ima gha rrie ehe ne avbe esi ebo ni ye ne ima ya la uwu iran.” 13Rẹn keghi fan obọ ẹre ne iran. Avbe orhiọn esu keghi kpao hin uwu okpia nii rre, iran keghi la uwu avbe esi ebo nii. Vbene iran wa bun sẹ nii, omwa arriaisẹn eva, ehia keghi wa khọn la ehanhan oke la uwu odighi, iran keghi wulo ye uwu amẹ.
14Avbe emwa ni te gbe aro ghe avbe esi ebo nii hia keghi lẹẹ, iran keghi ya na iyẹn emwi na vbe ore ẹvbo kevbe ugbo ni rre enii hia. Iran ni keghi ladian ya ghe emwi ne ọ sunu. 15Iran keghi vẹ bu Jesu gha dee, iran miẹn okpia ne ọ te ka mwẹ avbe orhiọn esu nii, ọ tota vbe evba, ọ hẹ ukpọn yọ, ẹrherhe ẹre gbae, ohan keghi mu iran hia. 16Iran ne aro ẹre sẹ ọe keghi ya na iyẹn emwi ne ọ sunu vbe egbe ọmwa ne ọ te ka mwẹ avbe orhiọn esu kevbe avbe esi ebo ma emwa hia. 17Rhunmwuda ọnii, iran rinmwian Jesu ne ọ la hin iwewe ẹvbo iran rre.
18Ugbẹn vbe Jesu ghi ra la okọ, okpia ne ọ te ka mwẹ orhiọn esu ni rinmwian ẹn wẹẹ, “Gun mwẹ lele uẹ.”
19Sokpan Jesu ma kue ye ọre re, ọ tama rẹn wẹẹ, “werriegbe bu avbe etuẹn gha rrie owa, ya tama iran vbene emwi ne Nọyaẹnmwa ru nuẹn kpọlọ sẹ hẹ, kevbe vbene ọ tohan ruẹn sẹ hẹ.”
20Rhunmwuda ọnii, okpia na keghi kpao, ọ keghi ya la Ẹvbo Igbe khinkhian, ọ na gha na iyẹn emwi ne Jesu ru ne irẹn, unu keghi yan emwa hia ni họn ẹn.
Ovbi E Jairọs Ne Okhuo Kevbe Okhuo Ne Ọ Ya Obọ Kan Ehọ Ukpon Jesu
(Matiu 9:18-26; Luk 8:40-56)
21Jesu keghi fian odighi rra ghe obọ nọkpa. Emwa hia keghi vbe do sigbo ye ehe ne ọ ye vbe ọkpẹn odighi. 22Jairọs, ne ọ vbe rre ukpo ọdakha vbe Ọgua ediọn keghi gha dee, ugbẹn vbe ọ ghi bẹghe Jesu, ọ mu ẹko rhu otọ vbe akharha ẹre. 23Ọ kakabọ rinmwian ẹn wẹẹ, “Egbe ma zẹdẹ rran ovbi mwẹ ne okhuo. Lahọ gha dee do viọ obọ ruẹ yan rẹn ne egbe miẹn ehe na rran rẹn ne ọ ghẹ wu.”
24Jesu keghi lele ẹe gha khian. Emwa ni vẹ lele ẹe keghi bun sẹrriọ wẹ te iran ghi khuakhua ẹe.
25Okhuo ọkpa kegha rre evba, ukpo iweva ọre ọ ye ne ọ kegha khuọnmwi emianmwẹ esagiẹn ne ọ tue vbe egbe ẹre. 26Avbe ọbo ni bun ọre ọ he gbe aro ghe ẹre, igho ọrhẹnrhẹn ọre ọ he lo, ọ ma gbannọ ẹn sokpan ọ kegha tua yọ. 27Ọ ghi họn ẹmwẹ Jesu, ọ keghi la uwu ẹbu nii gberra ghe odieke ẹre, rhunmwuda rẹn tae nẹ vbe uwu ekhọe ẹre wẹẹ, 28“Ọ gha re ukpọn rẹn ọkpa ọre I sẹtin ya obọ kan, egbe gha rran mwẹ.” 29Ọ keghi ya obọ kan agbada ẹwu ẹre, esagiẹn ne ọ te lẹ ni keghi ka, egbe keghi vbe rhie ma rẹn ighe a sinmwi irẹn nẹ. 30Ọwarọkpa nii, Jesu keghi wa rẹn wẹ ẹtin eso ladian vbe uwu irẹn, ọ keghi rhunmwuda ọnii, gbe aro ghe iyeke, ọ wẹẹ “De ọmwa ne ọ ya obọ kan mwẹ ukpọn?”
31Avbe erhuanegbe ẹre keghi wanniẹn wẹẹ, “Wẹ miẹn vbene emwa mama rhu uẹ hẹ, vbe u a ghi na vbe nọ ọmwa ne ọ ye ohọ kan ruẹn hẹẹ?” 32Sokpan Jesu keghi ye gha ye aro gualọ ọmwa ne ọ ru emwi na. 33Okhuo nii rẹn emwi ne ọ sunu vbe egbe irẹn, rhunmwuda ọnii, ọ keghi ya uguọmwẹ kevbe ohan bu ẹre gha dee, ọ diguẹ vbe akharha ẹre, ọ keghi wa ta ẹmwata ma rẹn. 34Jesu tama rẹn wẹẹ, “Ovbi mwẹ, iyayi ruẹ mu uẹn egbe rran nẹ. Gha khian vbe ọfumwegbe, a fannọ obọ ọlọghọmwa hin ruẹn egbe rre nẹ.”
35Ugbẹn vbe Jesu he wa ye guan ẹmwẹ na, emwa eso ke owa olotu Ọgua ediọn rre do tama rẹn wẹẹ, “Ovbuẹ wu nẹ, vbe u a ghi ye kpokpo Ọmamwaemwi ba a?”
36Jesu ma zẹ ye ẹmwẹ ne iran tae sokpan ọ khama rẹn wẹẹ, “Ghẹ fian afianma, sokpan yayi.” 37Ọ ma ghi gie ọmwa rhọkpa lele ẹe gberra Pita, Jems kevbe Jọn ne ọtẹn ọnrẹn. 38Ọ ghi sẹ owa ọdafẹn nii, Jesu keghi do vba owogho nọkhua ọghe eve kevbe ugomwẹ. 39Rẹn keghi la uwu owa, ọ tama iran wẹẹ, “De esa ne oyanghan na khin yi! Demwi ne uwa viẹ ba? Ọmọ nii ma wu, ovbe ọre ọ vbiẹ kẹkan.”
40Iran keghi suẹn gha giẹ ọe: rhunmwuda ọnii ọ keghi khulo iran hia ladian, ọ keghi rhie erha ọmọ nii kevbe iye ẹe deba avbe erhuanegbe ẹre eha, ọ na gha rrie ehe ne ọmọ ni lovbiẹ yi. 41Ọ keghi rhie ẹre obọ, ọ tama rẹn wẹẹ, “Talita, koum” ọ nii nọ wẹẹ, “Ọmọ okhuo, I tama ruẹn, kpaegbe!”
42Ọ keghi kpaegbe vbe ọwarọkpa, ọ kegha khian yo khian rre. (Ọmọ ukpo iweva nọ.) Ugbẹn vbe emwi na sunu, unu keghi yan emwa hia. 43Sokpan Jesu kakabọ tama iran wẹ ne iran ghẹ tama ọmwa rhọkpa. Ọ keghi rhie tẹe wẹẹ, “Wa rhie evbare nẹ ẹn re.”
Currently Selected:
Mak 5: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
