Mak 2
2
Jesu Sinmwi Ọmwa Ne Arọ Kinmwi
(Matiu 9:1-8; Luk 5:17-26)
1Vbe iyeke ikpẹdẹ eso, Jesu keghi dọlegbe gha die Kapaniọn, ọ keghi la gba ehe hia ighe ọ rre owa. 2Emwa hia na wa do ma ye evba sẹrriọ wẹ ọ ma ghi gua ẹvbo ya sẹ onurho ore. Jesu kegha kpe orhu ma iran. 3Ikpia eso keghi dada ọmwa ọkpa ne arọ kinmwi bu ẹre rre, iran enẹ ọre ọ mu ẹn. 4Sokpan iran ma miẹn ehe la sẹ ehe ne Jesu ye baẹmwẹ ubunmwẹ ẹvbo. Iran keghi ya ha ihie vbe odukhunmwu ehe ne Jesu ye. Iran ghi vbẹ ọre nẹ, iran keghi mu okpia ni la evba tuorre ke irẹn kevbe ewa. 5Jesu ghi miẹn vbene iran mwẹ iyayi hẹ, ọ tama ọmwa ne arọ kinmwi ni wẹ, “Ovbi mwẹ, a ye orukhọ ruẹ bọọ.”
6Eso vbe uwu iran ni ma emwa Uhi ni tota ye evba kegha ro vbe uwu ekhọe iran, 7“Vbọzẹ ne oko na na guan ẹmwẹ ihan ghe Osanobua vberriọ yi? Gha ọ sẹtin ya orukhọ bọ ọmwa vbe ẹ i re Osanobua ọkpa!”
8Jesu wa rẹn vbe ọwarọkpa emwi ne ọ rre iran ekhọe, ọ keghi tama iran wẹẹ, “Vbọzẹ ne uwa na zẹ iro vberriọ yi? 9De ne ọ fu egbe sẹ vbọ? Ne a khama okpia ne arọ kinmwi na wẹ, ‘A ya orukhọ ruẹ bọọ,’ ra ne a kha wẹ, ‘Kpaegbe, kie ewa ruẹ ne u gha khian?’ 10Mẹ ra rhie ma uwa nian ighe Ovbi Ọmwa mwẹ ẹtin ne a ya ye orukhọ bọ ọmwa vbe agbọn.” Rẹn keghi tama ọmwa ne arọ kinmwi ni wẹẹ, 11“Mẹ tama ruẹn nian, kpaegbe, kie ewa ruẹ ne u gha rrie owa.”
12Ehe ne iran hia na ghe ẹre nii, okpia ni keghi guakpao, ọ kie ewa ẹre, ọ na giẹgiẹ gha rrie. Unu keghi yan iran hia, iran rho Osanobua vbe uyi wẹẹ, “Aro ima ma he vbe sẹ egbe ọna ẹdẹ.”
Jesu Tie Livai
(Matiu 9:9-13; Luk 5:27-32)
13Jesu keghi dọlegbe gha die ọkpẹn odighi e Galili, Emwa ni bun keghi hu ẹre gha dee, rẹn na gha ma iran emwi. 14Vbene ọ wa khian nii, rẹn keghi bẹghe Livai ne ovbi Alfiọs, ọ tota vbe ehe ne ọ na koko igho uhunmwu. Jesu khama rẹn wẹ, “Lele mwẹ” Livai keghi kpaegbe, ọ keghi lele ẹe.
15Iyeke ọnọna, Jesu kegha rri evbare vbe owa Livai. Emwa nibun ni koko igho uhunmwu kevbe avbe ẹwobi emwa ni vbe gha lele Jesu khian keghi vbe rre evba, eso vbe uwu iran kegha gu Jesu kevbe avbe erhuanegbe ẹre rri evbare vbe uhunmwu eteburu. 16Eso vbe uwu iran ni ma emwa Uhi, ni vbe re Farisi keghi miẹn vbe Jesu gu avbe iran ne ẹwobi emwa kevbe ni koko igho uhunmwu rri evbare, iran keghi ya nọ avbe erhuanegbe ẹre wẹẹ, “Vbọzẹ ne ọ na gu eni koko igho uhunmwu kevbe avbe, ẹwobi emwa rri evbare yi?”
17Ugbẹn vbe Jesu ghi họn, ọ wanniẹn tama iran wẹẹ, “Emwa ne egbe rran rẹn i ho ọbo, sokpan iran ni khuọnmwi. I ma rre do tie avbe adazẹ vbe ẹ i re iran ne ẹwobi emwa.”
Ẹmwẹ Aguẹ Ne A Yo
(Matiu 9:14-17; Luk 5:33-39)
18Ọ ghi sẹ ẹghẹ ọkpa, avbe ekpayẹ Farisi kevbe erhuanegbe Jọn ne Ọsamẹ kegha rre aguẹ. Emwa eso keghi bu Jesu rre do nọ rẹn wẹẹ, “Vbọzẹ ne erhuanegbe Jọn ne Ọsamẹ kevbe avbe Farisi na yo aguẹ sokpan avbe erhuanegbe ruẹ i yo aguẹ?”
19Jesu wanniẹn iran ẹmwẹ wẹẹ, “Wẹ yayi ighe ọ kere ne emwa ne a tie do rri evbare irhiọha gha ya ohanmwẹ rriegbe vbe ọdafẹn ọha rre evba? Hiehie re. Ugbẹn vbe a miẹn wẹ ọdafẹn ọha gue iran rre evba, iran i danmwẹ ọẹn. 20Sokpan ẹghẹ dee ne a gha na rhie ọdafẹn ọha hin ehe ne iran ye rre, ẹghẹ ni, iran sẹtin gha ya ohanmwẹ rri egbe.
21“Ọmwa i ra fian ukpọn ọgbọngbọn ya te ukpọn nẹ ọ rẹnhuan nẹ, ọ gha ruẹe, ọgbọngbọn nii ghi yanghan ne ọ rẹnhuan nẹ nii, ọ ghi wa dọlegbe yanghan sayọ. 22Erriọ vbe nọ, a i ruẹn ayọn ọgbọn ye ọgọ ohian ne ọ rẹnhuan nẹ, a gha ruẹe, ayọn gha gbe ọgọ ohian nii, ẹghẹ ni ke ayọn kevbe ọgọ ghi la ọrhiae rrie. Ẹn o, ọgọ ohian ọgbọn ọre a vbe ruẹn ayọn ọgbọn yi.”
Ẹmwẹ Ẹdẹ Ikẹtin
(Matiu 12:1-8; Luk 6:1-5)
23Ẹdẹ ọkpa, Jesu kegha fian ugbo ọka irhuarhua rra vbe Ẹdẹ Ikẹtin. Avbe erhuanegbe ẹre kegha ya obọ fian ọka irhuarhua vbe iran khian. 24Rhunmwuda ọnii, avbe Farisi khama Jesu wẹẹ, “Uhi ima ma ye obọ ye emwi ne avbe erhuanegbe ruẹ ru vbe Ẹdẹ Ikẹtin na.”
25Jesu wanniẹn tama iran wẹẹ, “Wa ma tie emwi ne Devid ru vbe ẹghẹ ne ohanmwẹ na gha gbe ẹe? Ohanmwẹ ghi gbe ẹe gbe emwa rẹn, 26Ọ na la uwu owa Osanobua, ọ na ya rri ebrẹd ne a ya muohan gie Osanobua. Ẹghẹ ne Abiata na gha re ogie ohẹn ọre emwi na na sunu, zẹ vbe ne uhi khare, ohẹn ọkpa ọre ọ rri ebrẹd na. Sokpan Devid rri ọe, ọ na vbe fian ne emwa rẹn.”
27Jesu keghi kha wẹẹ, “Te a mwamwa Ẹdẹ Ikẹtin rhunmwuda ọmwa, a ma yi ọmwa ne Ẹdẹ Ikẹtin. 28Rhunmwuda ọnii, Ovbi Ọmwa ọre ọ yan Ẹdẹ Ikẹtin.”
Currently Selected:
Mak 2: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
