Mak 1
1
Ikporhu E Jọn Ne Ọsamẹ
(Matiu 3:1-12; Luk 3:1-18; Jọn 1:19-28)
1Ọna ọrọre Iyẹn Ne ọ maa vbekpa Jesu Kristi ne Ovbi Osanobua. 2Ọ suẹnrẹn zẹ vbene Aizaia ne akhasẹ gbẹn wẹẹ;
“Osanobua khare wẹẹ,
‘Ghe ọmwa ne I gie ẹre uhunmwu,
mẹ gha gi ẹe ke odaro ruẹ,
ne ọ ya zẹ odẹ ye otọ khẹ ruẹ.’
3Arhunmwu ọkpa gha vannọ vbe uwu ato:
‘Wa zẹ odẹ ye otọ khẹ Nọyaẹnmwa,
wa zẹ odẹ ne ọ diae na ẹn la.’ ”
4E Jọn keghi rhie egbe ma vbe uwu ato, ọ kegha samẹ ne emwa, ọ keghi vbe gha kpe orhu ma iran wẹẹ, “Wa zobọ vbe orukhọ ne a ru. ne a samẹ ne uwa, Osanobua gha ya orukhọ uwa bọ uwa.” 5Emwa hia keghi ke isoko Judia kevbe ore Jerusalẹm rre dee do danmwehọ Jọn. Iran miẹn orukhọ iran kue, rẹn keghi samẹ ne iran vbe ẹzẹ Jọdan.
6E Jọn kegha rhuan ukpọn ne a ya eto aranmwẹ do, ọ na vbe ya ugbẹkun ohian gba ẹkun; ọ kegha rri irhiso kevbe owọn oha. 7Rẹn kegha tama emwa wẹẹ, “Ọmwa ne ọ ra rre lele mwẹ kpọlọ sẹ mwẹ ẹsẹse, mẹ ma sẹ ne ogha vbẹrre ban re ibata vbe owẹ. 8Amẹ ọre I mẹ ya samẹ ne uwa, sokpan rẹn gha ya Orhiọn Ne ọ huanrẹn samẹ ne uwa.”
Isamẹ Kevbe Edanmwẹ Jesu
(Matiu 3:13—4:11; Luk 3:21-22; 4:1-13)
9Vbe ọ ma ghi kpẹe, vbe iyekọni, Jesu keghi ke Nazarẹt ne ọ rre isoko Galili gha dee, Jọn keghi samẹ na ẹn vbe ẹzẹ Jọdan. 10Ọwarọkpa vbe Jesu wa ke uwu amẹ ladian, rẹn keghi miẹn vbe ẹrinmwi kie ye otọ, Orhiọn Osanobua keghi tuorre yan rẹn, ọ ye vbe idu. 11Urhu ọkpa keghi ke ẹrinmwi rre wẹẹ, “Wẹ ọrọre ovbi mwẹ ne I ho ẹmwẹ ọnrẹn, ọmwa ne ekhọe mwẹ rhiẹnrhiẹn ghe, ẹsẹsẹmwẹse.”
12Vbe ọwarọkpa nii, Orhiọn Osanobua gban ẹre uhunmwu gha rrie uwu ato. 13Rẹn kegha rre evba vbe ikpẹdẹ iyeva, Setan keghi danmwẹ ọẹn ghe. Avbe aranmwẹ oha kevbe gha rre evba, sokpan avbe odibosa keghi rre do ru iyobọ ne ẹn.
Jesu Tie Avbe Ọgbehẹn Enẹ
(Matiu 4:12-22; Luk 4:14-15; 5:1-11)
14Ugbẹn vbe iran ghi mu Jọn ye eghan nẹ, Jesu kegha rrie Galili, ọ keghi ya kpe orhu Iyẹn Ne ọ maa ọghe Osanobua. 15Ọ wẹẹ, “Ẹghẹ wa sẹ nẹ nian, Arriọba Osanobua sẹ otọ fo! Wa zobọ vbe orukhọ ne a ru, ne uwa vbe do ya Iyẹn Ne ọ maa yi.”
16Ugbẹn vbe Jesu ghi lele ọkpẹn odighi e Galili khian, ọ keghi miẹn avbe ọgbehẹn eva, Saimọn kevbe Andru ne ọtẹn ọnrẹn, iran gha ya ọga gbe ehẹn vbe uwu odighi. 17Jesu keghi khama iran wẹẹ, “Wa lele mwẹ, I gha ma uwa vbene a ya munọ emwa ne agbọn hẹ.” 18Iran keghi sẹ ọga iran rae vbe ọwarọkpa nii, iran na lele ẹe.
19Ọ ghi vbe sikẹ odaro kherhe, ọ miẹn etẹn eva ọvbehe, Jems kevbe Jọn ne ivbi e Zẹbede. Iran gha dọlọ ọga iran yi vbe uwu okọ. 20Ọwarọkpa vbe Jesu wa bẹghe iran, ọ keghi tie iran, iran keghi sẹ Zẹbede ne erha iran rae ye okọ deba emwa ne iran viọ vbe iwinna, iran keghi lele Jesu gha khian.
Okpia Ọkpa Ne Ọ Mwẹ Orhiọn Dan
(Luk 4:31-37)
21Iran keghi do sẹ ore ẹvbo Kapaniọn, Ọ ghi sẹ Ẹdẹ Ikẹtin ne ọ lele ẹe, Jesu kegha rrie Ọgua ediọn iran, ọ keghi ya gha ma emwa emwi. 22Unu keghi yan emwa hia ni miẹn ọẹn ye vbene ọ ya ma emwa emwi hẹẹ, ọ ma yevbe iran ni ma emwa Uhi, sokpan ọ kegha ye asẹ ma emwa emwi.
23Vbe ẹghẹ ni ọre okpia ọkpa ne ọ mwẹ orhiọn dan na la Ọgua ediọn, ọ datu wẹẹ, 24“Vbọ kan ima kan ruẹn yi Jesu ne ovbi e Nazarẹt? Te u rre do fuẹn ima an ra? I rẹn ọmwa ne u khin: wẹ ọrọre ukọ ne ọ huanrẹn ọghe Osanobua.”
25Jesu keghi tama orhiọn nii wẹẹ, “Gue unu ruẹn ne u ladian vbe egbe okpia na.”
26Orhiọn dan ni keghi mu ọmwa ni rueghe ẹsẹse, ọ davan rhanrhananrhan, ọ keghi ke uwu ẹre ladian. 27Unu keghi yan emwa hia, iran keghi suẹn gha guegbe guan wẹẹ, “Vbe ọna khin? Iruẹmwi ọgbọn, okpia na wa mwẹ asẹ ne ọ ya tama avbe orhiọn vbene iran gha khian hẹ, iran ghi vbe gha họn ẹmwẹ nẹẹn.” 28Rhunmwuda ọnii, ẹmwẹ Jesu keghi wa titi gba ehe hia vbe isoko Galili.
Jesu Sinmwi Emwa Ni Bun
(Matiu 8:14-17; Luk 4:38-41)
29Iran ghi kpa vbe Ọgua ediọn rre, iran kegha rrie owa Saimọn kevbe Andru, Jems kevbe Jọn keghi lele iran gha khian. 30Iye amwẹ Pita keghi lovbiẹ rhunmwuda ighe emwirraro ruẹe. Jesu ghi sẹ evba, iran na tama rẹn. 31Rẹn keghi bu ẹre gha khian, ọ keghi si ẹre obọ kpaegbe. Emwirraro ni na fo. Rẹn keghi do mu ọghọ ye iran egbe.
32Ugbẹn vbe ọ ghi sẹ ota, vbe ovẹn ghi dero nẹ, iran keghi viọ emwa ni khuọnmwi hia kevbe ni mwẹ orhiọn dan bu Jesu gha dee. 33Emwa ẹvbo nii hia keghi mama ye onurho ore, 34Jesu keghi sinmwi emwa ni bun ni mwẹ emianmwẹ ughughan, ọ kevbe khulo orhiọn dan ni bun ladian. Rẹn i vbe kue ne avbe orhiọn dan ni guan hiehiere, rhunmwuda ighe iran rẹn ọmwa ne irẹn khin.
Jesu Kpe Orhu Vbe Galili
(Luk 4:42-44)
35Jesu keghi ladian vbe owiẹ fioo, vbe ẹdẹ ma he gbe, ọ kegha rrie ehe ne ọ divbiẹ vbe a la hin ore ẹvbo rre, ọ keghi ya na erhunmwu. 36Sokpan Saimọn kevbe ihua ẹre kegha gualọ ẹe khian. 37Ugbẹn vbe iran ghi miẹn ọẹn, iran tama rẹn wẹẹ, “Emwa hia wa gualọ uẹ khian.”
38Sokpan Jesu wanniẹn wẹẹ, “A vbe igue ni lẹga ena ọre ọ kere ne ima ghi gha rrie. Ẹ i mwẹ ne I ghẹ vbe ya kpe orhu vbe odọ rhunmwuda, ọnii ọre ọ zẹẹ ne I na rre.”
39Rhunmwuda ọnii, ọ keghi khian lele Galili hia, ọ kegha kpe orhu vbe dọmwadẹ Ọgua ediọn, ọ keghi vbe gha khulo avbe orhiọn esu ladian.
Jesu Sinmwi Okhọnmwọ Oti
(Matiu 8:1-4; Luk 5:12-16)
40Ọkhọnmwọ oti ọkpa keghi bu Jesu rre, ọ diguẹ nẹẹn ọ keghi rinmwian ẹn wẹ ne ọ ye irẹn obọ, ọ wẹẹ, “A deghẹ u ho, u gha sẹtin ya mwẹ khian ne ọ huanrẹn.” 41Ohan rẹn keghi to Jesu, ọ keghi nien obọ ladian, ọ ya ẹe kan rẹn, ọ wẹẹ, “I ho ne u khian ne ọ huanrẹn.” 42Vbe ọwarọkpa nii, oti ni keghi fo vbe egbe ẹre, a keghi ya ẹe khian ne ọ huanrẹn. 43Jesu keghi tua unu mu ẹn tama rẹn, ọ keghi rhie ẹre ladian vbe ọwarọkpa nii, ọ wẹẹ, 44“Danmwehọ, ghẹ tama ọmwa rhọkpa, sokpan bu ohẹn gha khian ne ọ ya ghe ruẹ egbe ghe. U ghi vbe ya hae azẹ ne Mosis fian yọ, ne emwa hia miẹn ehe na rẹn ighe egbe gele rran ruẹn nẹ.” Ọ keghi zẹ ọre urrie.
45Sokpan okpia na ghi ladian, ọ keghi wa rhie ẹre ye ahẹn bọnmwẹ lele ehe hia, obọ ọre de otọ sẹrriọ wẹẹ, adesẹ ore ẹvbo ma ghi gie Jesu lao. Rẹn gha ghi yakọ vbe ehe ne ọ divbiẹ, emwa ghi ke ehe hia do gha vba ẹre vbe evba.
Currently Selected:
Mak 1: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
