Matiu 24
24
Jesu Guanyan Uguọghọmwẹ Ọgua Osa
(Mak 13:1-2; Luk 21:5-6)
1Jesu keghi kpaegbe, vbene ọ wa ladian vbe Ọgua Osa, avbe erhuanegbe keghi do gha rhie vbene a bọ Ọgua Osa hẹ ma rẹn. 2Rẹn khama iran wẹẹ, “Erriọ nọ, wa ma dẹghe emwi na hia, ne I tama uwa, okuta ọkpa ne a ra sẹrae ye ihe ẹre, ẹ i rre emwa na, te a ra guọghọ ehia sẹ otọ.”
Orueghe Kevbe Ukpokpo
(Mak 13:3-13; Luk 21:7-19)
3Jesu ghi tota ye uhunmwu oke Ọliv, avbe erhuanegbe keghi hẹko bu ẹre rre do nọ rẹn wẹẹ, “Ta ẹghẹ ne emwi na hia gha khin ma ima, de emwi ne ọ gha sunu ni ima gha ya rẹn ighe ẹghẹ ne u ya dee sẹ ne, kevbe wẹẹ a sẹ ufomwẹ agbọn nẹ?”
4Jesu wanniẹn tama iran wẹẹ, “Wa ghi yegbe ne ọmwaikọmwa ghẹ mu uwa rẹrẹ. 5Rhunmwuda, emwa ni bun gha rre vbe eni mwẹ wẹẹ, ‘Mẹ ọrọre nene Mẹzaia,’ iran ghi vbe rẹrẹ emwa ni bun re. 6Wa gha họn ẹmwẹ okuo ne ọ rre urria kevbe ogbigbi okuo ne ọ sikẹ uwa, sokpan ọnii ma rhie ma ighe ufomwẹ sẹ otọ nẹ. 7Ẹvbo na gha mu okuo gie nọkpa, otọ arriọba na ghi mu okuo gie nọkpa. Ukhumwu kevbe igbohiotọ ghi gha rre ehe hia. 8Ena hia keghi yevbe emwi ubiẹmwẹ ne ọ ru okhuo vbe ọ te biẹ.
9“A gha vbe munọ uwa, a ghi vbe viọ uwa gie emwa ni gha rri uwa oya. Emwa hia ghi gha khuiwu uwa ba ẹmwẹ mwẹ. 10Emwa ni bun ọre ọ gha lahin iyayi rre vbe ẹghẹ ni. Iran ghi gha ye egbe dẹ, ẹko iran ghi gha khọ egbe. 11Ẹghẹ ni ọre akhasẹ ohoghe ni bun gha na ladian, iran ghi vbe rẹrẹ ọkhọngborrie re. 12Ọkhọ gha miotọ sẹrriọ ne a gha na miẹn wẹẹ aho ẹmwẹ ọmwa eni bun gha worua. 13Sokpan ọmwa ne ọ da ẹe yi ya sẹ ufomwẹ, ọre a gha miẹn fan. 14A gha kporhu Iyẹn Ne ọ maa ọghe Arriọba na la otọ agbọn hia nẹ zẹ vbe osẹe ghe emwa hia, iyeke ọnii, ufomwẹ ghi do rre.
Omurhia Ne O Gbe Orrirri
(Mak 13:14-23; Luk 21:20-24)
15“Wa ghẹ ghi miẹn ighe Omurhia Ne ọ gbe orrirri ne Daniẹl ne akhasẹ ta ẹmwẹ ọnrẹn miẹn dia ye ehe ne ọ huanrẹn.” (Wẹ ne ọ tie ebe na, hia ne u rẹn evba yae kha.) 16“Ẹghẹ ni wa ni rre Judia hia, wa lẹ gha rrie uhunmwu oke. 17Ọmwa ne ọ rre ẹrhunrhun owa ẹre, wẹ ne ọ ghẹ wẹ rẹn ra tuorre ya viọ emwi ẹnrẹn vbe uwu owa. 18We ne ọmwa ne orre ugbo ghẹ wẹ rẹn die owa do mu agbada ẹwu. 19U miẹn vbene ogha ba so ikhuo-hanmwẹ kevbe ne emobọ gue hẹ ẹdẹnẹdẹrriọ. 20Wa rinmwian Osanobua, ne ẹdẹ ulẹ ghẹ i de fi ẹghẹ okhuakhua ra Ẹdẹ Ikẹtin. 21Rhunmwuda ọkhọ ne ọ ra sunu ẹdẹnẹdẹrriọ keghi re egbe ne a ma he miẹn ke ne abuagbọn tuagbọn gha dee do sẹ ẹdẹnẹrẹ na. A i ra vbe dọlegbe miẹn egbe ọre ẹdẹ. 22Sokpan Osanobua fian inu ẹdẹ ne ọ ra ya vbe otọ kanmwa nẹ. Akpawẹ ọ ma fian ẹdẹ ni kanmwa, orhiọnkpa ne ọ gha miẹn uhunmwu, ẹ i rrọọ. Sokpan Osanobua gha rhunmwuda iran ne ọ hannnọ zẹ fian ẹdẹ ni kanmwa.
23“Rhunmwuda ọnii, orhiọnkpa gha do khama ruẹn wẹẹ, ‘Do ghe Mẹzaia!’ ra ‘Ghe ẹre vba,’ ghẹ ya ẹe yi. 24Rhunmwuda, avbe akhasẹ kevbe Mẹzaia ohoghe gha rre. Iran gha winna iwinna ama kevbe iwinna ọyunnuan ni bun ne iran ya rẹrẹ emwa ne Osanobua hannọ zẹ re deghẹ ẹtin iran sọe. 25Ghe I tama uwa yotọ nẹ.
26“Ra deghẹ emwa eso vbe do tama ruẹn wẹẹ, ‘Ọ rre uwa ato,’ ghẹ yo ‘Do ghe vbe ọ lẹre ye emwa’ ghẹ yayi. 27Rhunmwuda te Ovbi Ọmwa ra rre vbe ayan ne ọ yan gbe iso dunmwu ke ọlarre ovẹn ya sẹ ọlarrie ẹre. 28Ehe ne emwi nọwu ye, ọre avbe ugu si koko yi.
Urremwẹ Ovbi Omwa
(Mak 13:24-27; Luk 21:25-28)
29“Avbe ọlọghọmwa na hia ghẹ ghi da obọ yi, owẹn ghi so ebiebi, uki i ghi ra ba ọvbehe, avbe orhọnmwẹ ghi gha ke iso kharha ku otọ, a ghi mu ẹtin ni re ideghedeghe iso rueghe. 30Ẹkpo ni ọre ama urremwẹ Ovbi Ọmwa gha na rhiegbe ma, vbe aro iso. Ẹghẹ ni, unu ne a zẹ hia ni rre otọ agbọn na, ghi gbe eve ua vbe iran a bẹghe vbe Ovbi Ọmwa a ya egbe ladian vbe odukhunmwu okuku ne ọ rre aro iso, ke irẹn kevbe ẹtin kevbe Uyi nọkhua. 31Okpe nọkhua ghi tu, rẹn ghi gie avbe odibosa ẹre ladian gha rrie igie enenẹ agbọn. Iran ghi ya si e na hannọ zẹ ọghọe koko ke okhiẹ agbọn ọkpa ya sẹ nọkpa.
Iruẹmwi Erhan Ohọ
(Mak 13:28-31; Luk 21:29-33)
32“Wa ghe igiemwi erhan ohọ. Abọ ẹre gha bi nunuunu ighe ọ vbe ye sọguọsọguọ, ọ na vbe gha họn ebe, wa ghi rẹn ighe ẹghẹ uyunmwu bu otọ. 33Erriọ vbe nọ zẹ, wa ghẹ ghi miẹn avbe emwi na, wa ghi rẹn wẹ ẹghẹ bu otọ, te ọ ghi ra suẹn. 34Wa rẹn nian wẹ, emwi na hia gha sunu avbe emwa ni rre agbọn ẹdẹnẹrẹ te do wulo fo. 35Ẹrinmwi kevbe agbọn gha gberra, sokpan, ẹmwẹ mwẹ i ra gberra.
Ọmwa Nọrẹn Ẹdẹ Ra Ẹghẹ Ne Ọ Khin Ẹ I Rrọọ
(Mak 13:32-37; Luk 17:26-30, 34-36)
36“Sokpan, ọmwa ọkpa ne ọ rẹn ẹdẹ ra ẹghẹ ne emwi na gha ya sẹ, ẹ i rrọọ, avbe odibosa ni rre ẹrinmwi, ra Ọmọ tobọ ẹre, ne ọ rẹn ọnrẹn, ẹ i rrọọ, gberra Evbavba Ọkpa. 37Te urremwẹ Ovbi Ọmwa ra ye vbe emwi ne ọ sunu vbe ẹghẹ ọghe Noa. 38Zẹẹ vbe ne a miẹn wẹẹ, ọ te do sẹ ẹghẹ uromwẹ amẹ, emwa kegha re, iran na gha da, ikpia kevbe ikhuo na gha rọnmwẹ egbe, rhinrin ya sẹ ikpẹdẹ ne Noa la okọ zẹẹ. 39Iran ma rẹn enaye uromwẹ amẹ te do kpolo ehia gha rrie. Erriọ ọ gha ye vbe Ovbi Ọmwa a rre. 40Ẹdẹ ne ẹdẹrriọ, arhin eva ghi gha winna vbe ugbo, a gha rhie ọkpa, a ghi sẹ nọkpa rae. 41Ikhuo eva ghi gha lọ ẹhiẹn vbe olọ, a gha rhie ọkpa, a ghi sẹ nọkpa rae. 42Rhunmwuda ọnii, wa gha ba odẹ rhunmwuda wa ma rẹn ẹdẹ ne Nọyan uwa gha rre. 43Wa yerre wẹẹ, akpawẹ ọdafẹn ne ọ yan owa rẹn ẹghẹ ne oyi gha ya rre, te ọ gha kọnvbe, ẹ i ghẹ gie oyi kpahiẹ la irẹn owa. 44Rhunmwuda ọnii nian, wa khẹ ye egbe rhunmwuda Ovbi Ọmwa gha rre vbe ẹghẹ ne uwa ma ro wa ma kọọ.
Ọguọmwadia Esi Ra Ọghe Dan
(Luk 12:41-48)
45“Gha ọre ọguọmwadia esi kevbe ne ọ wan nii, ọnii ọrọre ne arowa ẹre ya ru ne ọ gbe aro ghe eguọmwadia ne ihua ẹre ne ọ gha rhie evbare ne iran vbe ẹghẹ ne ọkere. 46U miẹn vbe ọ gha ma ne ọguọmwadia ni hẹẹ vbe arowa ẹre a do vba ighe ọ gele ru vberriọ! 47Vbe ẹmwata, arowa ẹre gha ya ẹe ru ne ọ gbe aro ghe emwi ne ọ mwẹ hia. 48Sokpan, deghẹ ọguọmwadia dan nọ, rẹn ghi ye otọ ẹko ẹre kha wẹẹ, ‘Ọ gha kpee arowa mwẹ ke rre.’ 49Ọ ghi suẹn gha gbele eguọmwadia nekpa, ọ ghi ya gu avbe Ọdayọn gha re gha da. 50Sokpan arowa ẹre gha rre vbe ẹdẹ ne ọ ma ro ọ ma kọọ. 51Arowa ẹre gha giagia ẹre ukhiọnmwẹ ukhiọnmwẹ, ọ ghi ru ẹre emwi ne ọ ma ẹwobi. Evba ọ ra na ya gha viẹ, ọ ghi vbe gha rri akọn.
Currently Selected:
Matiu 24: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
