Matiu 25
25
Itan Evbokhunvbi Igbe
1“Vbe ẹdẹ ne ẹdẹrriọ, Arriọba ẹrinmwi gha yevbe evbokhunvbi igbe ni viọ ukpa ofigbọn, iran keghi ladian ya vba ọdafẹn ọha. 2Isen vbe uwu iran keghi kọn, isẹn ni dekẹe keghi waan. 3Isen ni kọẹn ni rrọọ keghi mu ukpa iran, sokpan iran ma sa ofigbọn ya gbe akhua hinrre. 4Sokpan ne isẹn ni waan keghi vbe sa ofigbọn vuọn emwi ba ukpa iran. 5Rhunmwuda ighe ọdafẹn ọha ma rherhe rre, evbokhunvbi na ghi zẹ ye uhunmwu gbe, ovbe na rhie iran.
6“Ugbẹn vbe ọ ghi sẹ ogiasọn, iran keghi datie emwa hia wẹẹ, ‘Ọdafẹn ọha rre nẹ o, wa gha dee do vba ẹre.’ 7Evbokhunvbi igbe ni, keghi kpaegbe iran na dọlọ urhukpa iran yi. 8Iran ni kọẹn ni rrọọ keghi khama iran ni waan wẹẹ, ‘Wa sa ne ima vbe ofigbọn ọghe uwa rhunmwuda, ukpa ima ra dọyọ.’ 9Iran ne umẹwaẹn tama iran wẹẹ, ‘Hiehiere, ẹ i ra sẹ ne ima vbe uwa, wa gha rrie ehe ne a na khiẹn ne uwa ya dẹ ọghe obọ uwa.’ 10Avbe uvbi ne akpa ni keghi ladian ne iran ya dẹ ofigbọn. Ugbẹn vbe iran ghi ladian nẹ, ọdafẹn ọha keghi rre. Evbokhunvbi isẹn ni mu egbe ye otọ na lelẹe la ehe ne a na rri evbare irhiọha nii, a keghi khui urho.
11“Ọ ghi zẹ kpẹe, evbokhunvbi nekpa keghi rre, iran da tie wẹẹ, ‘Dọmọ o! dọmọ o! kie ne ima.’ 12Sokpan ọdafẹn ọha wanniẹn tama iran wẹẹ, ‘I ma rẹn uwa.’ ” 13Jesu keghi gbẹe wanniẹn wẹẹ, “Rhunmwuda ọnii, wa gha ba egbe vbe ne uwa ma na rẹn ikpẹdẹ ra ẹghẹ ne ọ wa khin.
Itan Ọghe Eguọmwadia Eha
(Luk 19:11-27)
14“A gha ya ẹe gie okpia ọkpa ne ọ mu egbe ehe ne a yo, ọ keghi tie eguọmwadia ẹre, ọ keghi viọ emwi ewe ẹre ne iran gha gbe aro ghe. 15Ọ keghi rhie ne dọmwadẹ ọghọe vbene ẹtin ẹnrẹn sẹe, ọ mu enaira arriaisẹn isẹn ne ọkpa, ọ keghi vbe mu arriaisẹn eva ne ọvbehe, ọ keghi vbe mu arriaisẹn ne nọ dekẹe. Rẹn keghi kpao. 16Ọguọmwadia ne a mu enaira arriaisẹn isẹn na keghi wa giẹgiẹ ya ye ọghọe do ẹki, ọ kevbe miẹn enaira arriaisẹn isẹn vbe ere. 17Erriọ zẹẹ, ne a mu enaira arriaisẹn eva na, keghi vbe miẹn enaira arriaisẹn eva vbe ere. 18Sokpan ọguọmwadia ne a mu enaira arriaisẹn na keghi ya tọn uvun, ọ na mu igho arowa ẹre lẹre ye evba.
19“Ọ ghi kpee fua, arowa avbe eguọmwadia nii keghi rre, ọ na do gha nọ iran ẹmwẹ igho nii. 20Ọguọmwadia ne a mu enaira arriaisẹn isẹn na keghi rre, ọ keghi mu enaira arriaisẹn isẹn nọkpa ye otọ, ọ tama rẹn wẹ, ‘Arowa mwẹ enaira arriaisẹn isẹn ọre u mu mẹ, ghe I vbe do ẹki rri ere enaira arriaisẹn isẹn ba ẹre.’ 21Arowa ẹre keghi tama rẹn wẹẹ, ‘U ru ẹse ọguọmwadia ne ekhọe esi, ẹkoata ọre u ya gbe aro ghe igho kherhe na, I gha mu igho ne ọ kọnkọn nuẹn gha gbe aro ghe. La owa ne u do gunmwẹ ku obọ ye uwa.’ 22Ọguọmwadia ne a mu enaira arriaisẹn eva na keghi vbe rre, ọ tama arowa ẹre wẹẹ, ‘Enaira arriaisẹn eva ọre u mu mẹ, ghe, mẹ vbe rri ere enaira arriaisẹn eva ba ẹre.’ 23Arowa ẹre tama rẹn wẹẹ, ‘U ru ẹse ọguọmwadia ne ekhọe esi, ẹkoata ọre u ya gbe aro ghe igho kherhe na. Rhunmwuda ọnii, I gha mu igho ne ọ kpọlọ nuẹn gha gbe aro ghe, la owa ne u do gunmwẹ ku obọ ye uwa.’ 24Ọguọmwadia ne enaira arriaisẹn sẹ ọre obọ keghi rre, ọ wẹẹ, ‘Arowa, i rẹn vbene ekhọe ruẹ ze hẹẹ, ehe ne u ma kọ yi ọre u na rhọ, ehe ne u ma zagha emwiokọ kui ọre u na ya gha si koko. 25Ohan ruẹn keghi mu mwẹ, rhunmwuda ọnii ọre I na ya tọn igho ruẹ ye otọ, ghe emwi ruẹ vba.’ 26Arowa ẹre keghi wanniẹn tama rẹn wẹẹ, ‘Wẹ ne ọguọmwadia dan, ne emitan, ugbẹn vbe u ghi rẹn ighẹ I rhọ emwiokọ vbe ehe ne I ma kọ yi, I vbe si koko vbe ehe ne I ma zagha emwiokọ kui. 27Ẹ i re te u gha mu ighomwẹ ye aza ọduẹki, ugbẹn vbe i rre, I gha ya mu igho mwẹ werriegbe, kẹe ke inu igho ne ọ biẹ ba egbe. 28Banbanna nian, wa miẹn ẹre igho ne ọ guee nii ne uwa mu ne ne enaira arriaisẹn igbe ka gue. 29Rhunmwuda, ọmwa ne ọ mwẹ ọre a gha rhie ba ẹre re, ọ ghi do gha mwẹ ọnrẹn ọkpọkua. Kevbe ọmwa ne ẹ i mwẹ, a gha wa miẹn ẹre ekherhe ne ọ mwẹ. 30Zẹ vbe ọghe ọguọmwadia ne ẹwobi na, wa si ẹe fi uwu ebiebi vbe ore ne ọ ya gha viẹ egbe, kevbe ne ọ vbe gha rri akọn vbe evba.’
Ibuohiẹn Okiekie
31“Ovbi Ọmwa ghẹ ghi rre zẹ vbe ọba ke irẹn kevbe avbe odibosa ẹre, rẹn ghi miẹn dia vbe uhunmwu ẹkete ọba ẹre. 32A ghi do si emwa ni rre agbọn na hia si koko ye odaro ẹre. Rẹn ghi do wannọ iran ye oka eva zẹ vbene Ọsuohuan hannọ ohuan hin uwu ẹbu ẹwe rre. 33Ọ ghi viọ avbe ohuan ye obọ erha ọmwa, ọ ghi vbe viọ avbe ẹwe ye obọ iye ọmwa. 34Ọba ghi tama iran ni rre obọ erha ọmwa wẹẹ, ‘Wa larre, wa ne erha mwẹ fiangbe, wa do mu arriọba ne a kpehe ẹre ye otọ khẹ uwa ke ne a ya yi agbọn gha dee. 35Ẹghẹ vbe ovbamẹ gbe mwẹ, wa rhie evbare mẹ re, ovbamẹ gbe mwẹ, wa sa amẹ mẹ wọn. I re orhunmwuyẹn, wa keghi rhie mwẹ la owa uwa. 36I rre irhunmwirhun, wa keghi rhie ukpọn rhuan mwẹ, I khuọnmwi, wa keghi gbe aro ghe mwẹ, I rre uwu eghan, wa keghi do tuẹ mwẹ.’ 37Avbe emwata ghi wanniẹn tama rẹn wẹẹ, ‘Nọyaẹnmwa, de ẹghẹ ne ima ya miẹn uẹn vbe ohanmwẹ gbuẹ, ma na rhie evbare nuẹn, ra vbe ohanmwẹ amẹ gbuẹ, ma keghi sa amẹ nuẹn wọn? 38De ẹghẹ ne ima ya miẹn uẹn zẹ vbe orhunmwuyẹn, ma na vbe rhie ruẹ la owa, ra vbe u rre irhunmwirhun ma na rhie ukpọn rhuan? 39De ẹghẹ ne ima ya miẹn uẹn vbe u khuọnmwi ra vbe u rre uwu eghan, ma na do miẹn uẹn?’ 40Ọba ghi wanniẹn wẹẹ, ‘Ne I tama uwa, ẹghẹikẹghẹ ne uwa ya ru egbe emwi vberriọ ne ne ọ kanmwa sẹ vbe uwu iran ne etẹn mwẹ na, wa ruẹe mẹ nẹ.’
41“Rẹn ghi tama iran ni rre ọre obọ iye ọmwa wẹẹ, ‘Wa kpao vbe ehe ne I ye rre, wa ne Osanobua fi ẹre unu, wa gha rrie uwu erhẹn etẹbitẹ ne a kpehe ẹre ye otọ khẹ Esu kevbe avbe odibo ẹre. 42Ohanmwẹ gbe mwẹ, wa ma rhie evbare mẹ, ohanmwẹ amẹ gbe mwẹ wa ma samẹ mẹ wọn, 43I re orhunmwuyẹn, wa ma rhie mwẹ la owa rua, I rre irhunmwirhun, wa ma rhie ukpọn rhuan mwẹ, I khuọnmwi, I rre uwu eghan, wa ma do miẹn mwẹ.’ 44Ẹkpo nii iran ghi wanniẹn tama rẹn wẹẹ, ‘Nọyaẹnmwa, de ẹghẹ ne ima ya miẹn uẹn vbe ohanmwẹ gbuẹ ne ima ma na rhie evbare nuẹn, ra vbe ohanmwẹ amẹ gbuẹ, ra zẹ vbe erhunmwuyẹn ra vbe u rre irhunmwirhun ra vbe u khuọnmwi ra vbe u rre uwu eghan ne ima ma na ru iyobọ nuẹn?’ 45Ọba ghi wanniẹn tama iran wẹẹ, ‘Ne I tama uwa, ẹghẹ ne uwa ma na ru ẹe ne ọkpa vbe uwu iran ne a i mobọ ka yọ ni, mẹ ọre uwa ma ru iyobọ na.’ 46A ghi hẹ iran na gha rrie uwu irrioya ne ẹ i mwẹ ọfo, avbe emwata ghi gha rrie arrọọ etẹbitẹ.”
Currently Selected:
Matiu 25: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
